अमेरिकाय् करुणामयया पुजा

- अमेरिका थेंज्याःगु देशय् वयाः नं सप्तविधानुत्तर पुजा थेंज्याःगु ज्याझ्फ्वः याये खनाः अनया नेवाःत लय्ताः ।

अमेरिकाय् च्वंपिं नेवाःतय्सं चायेकातःगु संस्था नेवाः अर्गनाइजेशन अफ अमेरिका (एनओए) पाखें अमेरिकाय् हे न्हापांखुसी नेवाः बौद्ध संस्कृति कथं सप्तविधानुत्तर पुजा यात। थ्व खास यानाः येँया जनबाहाःद्यः अर्थात आर्यावलोकितेश्वर करुणामयया नामय् याइगु छगू तःधंगु पुजा खः। वंगु मे २ तारिख कुन्हु अमेरिकाया राजधानी वाशिंगटन डीसीया मेट्रोपोलिटन एरियाय् जूगु खः ।

मेरिल्याण्ड पोटोमक धाःथाय् च्वंगु हरेकृष्ण देगलय् जूगु उगु पुजाय् ब्वति कायेत अमेरिकाय् च्वंपिं आपालं नेवाः व नेपाःमित उत्सुक जूगु खः। ज्याझ्वलय् अमेरिकाया निंतिं नेपाःया राजदूत डा. शंकरप्रसाद शर्मा लगायत दूतावासया मेपिं नेपाःमि कर्मचारीतय्सं नं ब्वति काःगु खः। वय्कलं ज्याझ्वलय् थःगु बिचाः प्वंकुसें अमेरिका थेंज्याःगु तापाःगु थासय् वयाः नं नेपाःया मौलिक संस्कृति कथं कायम जुयाच्वंगु थज्याःगु महान पुजा कर्म याःगु व उकी थः नं सहभागी जुइ खनाः ग्वसाः खलःयात आपालं सुभाय् बियादीगु खः ।

सुथय् ८:२० बजे शुरु जूगु उगु पुजा न्हिनय् २ बजे तिनि क्वचाःगु खः। पुजा न्ह्यः एनओए या नायः राजेश श्रेष्ठं सकलें सहभागीतय्त लसकुस यानादीगु खःसा उगु पुजा थौंकन्हय् अमेरिकाय् दीम्ह डा. नरेशमान वज्राचार्यं गुर्जु जुयाः सम्पन्न यानादीगु खः ।

पुजा न्ह्याना वंलिसे डा. डिना वाङ्देलं हरेक ज्याखँया आशय बारे सहभागीतय्त जानकारी यानादीगु खः। वय्कलं पुजाया फुक्कं ज्याखँ बारे कनादीगुलिं सहभागीतय्सं पुजाया आशय समेत थुइकेगु अवसर चूलाःगु बिचाः प्वंकूगु खः। अथे हे मूल पुजारी जुयादीम्ह डा. नरेशमान वज्राचार्यं नं उगु पुजाया अर्थ, उकिया दर्शन,महत्व व थ्व पुजापाखें जुइगु पुण्यलाभ बारे कनादीगु खः। पुजा पूर्ण रुपं नेवाः धार्मिक सांस्कृतिक रुपं सम्पन्न जूगु खः ।

पुजा सिधयेकाः सहभागी सकसितं साकाहारी प्रसाद प्रदान याःगु खः गुकी हलुवा, पुरी, माल्पा व चिया दुथ्याः ।

अमेरिकाय् च्वंपिं नेपाःमितय्सं अन याइगु ज्याझ्वः धइगु अप्वः यानाः सांगीतिक, शैक्षिक व सांस्कृतिक जक जुइगु खः। तर थुगुसी नेपाः बाहेक मेथाय् गनं हे स्वये मदइगु सप्तविधानुत्तर थेंज्याःगु पुजा जूगुलिं सहभागी सकसिनं छगू बिस्कं कथंया अनुभव यायेखंगु खँ कन। लिसें थज्याःगु पुजाआजापाखें अमेरिकाय् जन्म जुयाः अन हे ब्वलंपिं नेवाः मस्तय्त थः पुर्खाया संस्कृति, धर्मया बारे जानकारी कायेगु ह्वःताः नं चूलाःगु खँ धाःगु दु ।

अमेरिकाय् नेवाः संस्कृति म्वाकेत थज्याःगु महत्वपूर्ण ज्याझ्वः याये खनाः थःपिंत गर्व जूगु खँ नेवाः अर्गनाइजेशन अफ अमेरिकाया नायः व मेपिं दुजःतय्सं नं व्यक्त याःगु दु ।

More Stories Like this