आर्तनाद खः थ्व, न्ह्यब्वयाच्वना

नर्मदेश्वर प्रधान

- देश थौं राजनीतिक संकटय्। अले छु जुइ। हन्चा गन थ्यनी। अनिश्चित। देश तःधंगु दुर्घटनाय् लायेफु। थन गृहयुद्ध जुइफु। रक्तपात जुइफु। काटमार सम्भव दु। थ्व घडिइ देशया चिन्ता कायेमाः ।

छुं च्वये। फ्यतुइ। छु च्वये? न्ह्यसःत दनी। च्वसु न्ह्याइ मखु। सनी मखु। मन ह्वांग। शून्य थें जुइ। छुं हे मदुगु... खालीगु थल थें। प्वंगु घः थें जुइ। पलाः न्ह्याकेत स्वये। ला मदु थें जुइ। दी ।

छखें अजू चाइ। थुलिमछि विषयत दु। प्यखेरं। विषयया छु भुखा। मालामाल। राजनीतिक विषय च्वये ला? आर्थिक खँ न्ह्यथने ला? पलाःपतिं विषय। थौंकन्हय् ला झं राजनीतिक विषयया दबदबा। राजनीतिक विषय। न्ह्यागु च्वःसां छिं। च्वये जक फयेकेमाः। गुलि च्वये? गुलि न्ह्याः वने। गुलि ब्वां वने। थाय्या अभाव मजू।सिमाया बन्देज मदु। मन दयेमाः। थौं विषयया खत्ता मजू। म्ह झ्यातुइ। जोर वः थें जुइ। म्हुतु खाइसे च्वनी। पाउँ पाउँ धाइ। कपाः स्याः थें। मिखा कने मास्ते मवः थें। नये यइ मखु। म्हुतु साइ मखु। द्यां लानाच्वने। नयेमाः। सकस्यां धाइ। धयां छु याये? म्हं झ्यातुइबलय्। कथुं कुहां वनी मखु। छुं नयेत स्वये। सवाः दइ मखु। सीसां घुतुके छ्वये फइ मखु। नयेगु खनी। तं पिहां वइ। म्हं झ्यातुइबलय्। मनं मखनीबलय् न्ह्याक्व हे साःसाःगु खाना जुयां छु याये। मिखा बागलं नं स्वये यइ मखु ।

परिकारत खनी। झं ल्ह्वयेमाः थें जुइ। म्ह झ्यातुइबलय् न धाःपिं खनाः तं वइ। नसातय् बासनां हे वाकी वः थें जुइ। बरु क्वाःलः त्वने। प्वाः फुदं थें जुइ। द्यने ।

देशया परिस्थिति खनी। थौं जिगु मन झ्यातुयाच्वनी। म्हं झ्यातुइबलय्या जिगु अनुभव लुमनी। मनस्थति उकथं हे जुइ। छुं याये मन दइ मखु। आलस्यं त्वपुइ। छुं च्वयेत स्वये। झ्यातुगु मन। संके हे फइ मखु। निस्त्रि्कय। लाता थें च्वना बी। मनय् छुं हे मदु थें। खाली ।

रिक्तता। शून्यतां हय्हय् काः वयाच्वनी। धायेगु छुं हे मदु थें। नुगः हे मदुम्ह थें। विचार शून्य। कलम ल्हातिया ल्हातिइ। न्ह्याइमखु ।

थुलिमछि विषयत दु च्वयेत। थौं देशया राजनीतिया खँ ल्हानाः मब्याः। न्ह्याक्व खँ ल्हाःसां फुइ मखु। न्ह्याक्व च्वःसां क्वचाइ मखु। अन्तहीन, सीमाहीन विविध समस्या... देशया राजनीतिक ख्यलय् खने दइ। च्वये जक फयेकेमाः। लाख विषय थन दु। सुनां नं न्वाना च्वं थें, घ्वाना च्वं थें। अनुभव जुइ ।

न्वानां छु याये। घ्वानां छु याये। मन झ्यातुइबलय्। मनं मखंबलय्। सुयागुं खँ न्हाय्पनय् वनी मखु। सुयां खँ न्यने मास्ते वइ मखु। याकःचा आत्मकेन्द्रित जुइ। सुयातं न्ववाये मास्ते वइ मखु। छुं च्वये धया थें जुइ मखु। शिथिलता। निष्त्रि्कयता। शून्यबोध। जिगु च्वसुइ। थुपिं दुपी। थ्वइत जिं न्ह्याके फइ मखु। संके थाकुइ। थ्व हठ्ठी जुया बी। उइँक नं संके फइ मखु ।

देशया परिस्थिति थौं खतराय्। लेखकपिंसं सीकेमाः। चायेकेमाः। नुगः छायेके मजिउ। नायेकेमाः। नुगलय् च्वंगु खँ प्वंकेमाः। संवेदनशील जुइमाः। थथे बिचाः याइपिं दइ।
तर थौं देशया परिस्थितिं जिगु मन झ्यातुइ। जि संवेदनहीन जुइ। ल्वहं थें। नुगलय् छुं प्रतिक्रिया दनी मखु। नुगः अंगः थें जुइ। म्ह झ्यातुबलय् नसा स्वये हे यइ मखु। द्यां लाये। प्वाः खाली यानाच्वने। सन्तोष जुइ। छुं नये। प्वाः थने। मन दइ मखु। साःगु। मसाःगु। वस्तुया खँ मखु। म्हुतुं हे मबीबलय् न्ह्याक्व तःजिगु खाना नं मिखां स्वये यइ मखु। थौं जिगु मन झ्यातु। जिगु मन छुं हे खँय् आकर्षित जुइ मखु। जोर वइबलय् म्हुतु मसाइबलय्। नयेगु स्वये मयइ थें। मनं मखंगु थ्व इलय्। छुं हे विषयया नं जिं सवाः काये मफु। सवाः मथू। जिगु नुगः लाता। छुकी हे थ्वयात थी मखु। देशया परिस्थिति। न्ह्याक्व हे खतरनाक जुइ बिउ। जितः प्रभावशून्य जुइ। छुं विषय जिं विचरण याये मफु। विचरणया मन दइ मखु। विचाररहित जुया। महाशून्यय् तने। जिगु झ्यातुगु मनया इच्छा जुया बी ।

देश थौं राजनीतिक संकटय्। अले छु जुइ। हन्चा गन थ्यनी। अनिश्चित। देश तःधंगु दुर्घटनाय् लायेफु। थन गृहयुद्ध जुइफु। रक्तपात जुइफु। काटमार सम्भव दु। थ्व घडिइ देशया चिन्ता कायेमाः। मकाइम्ह मृततुल्य जुइ। सकलें दनेमाल। कलम न्ह्याकेमाल। प्यखेरं सः थ्वइ। नेतात हाली। नेतातय् सावधानी न्यने। स्वयं खुँ, डाँकातसें हुलमुलय् 'खुँ डाँकापाखें होशियार' धकाः सतर्कता थनेत स्वयाच्वंगु अनुभव जुइ। थः हे बोक्सी। थः हे धामी। नेतातय् कुत्सित खेल लुमनी। नुगः झं झ्यातुइ। नुगलं छुं बिचाः याये फइ मखु। धाये बिचाः याये फइ मखु। प्यखेरं बन्द। पःखालं घेरे यानातः थें जुइ। जिगु नुगः निस्त्रि्कय, जड, मृततुल्य जुइ। जिगु च्वसु। च्वापु थें फ्रिज जुइ। थुकिया तरलता सुइ। थ्व गतिहीन जुइ। छु च्वये? लिसः निरुत्तर जुइ। छुं धाये फइ मखु। कलम न्ह्याः वनी मखु। आचकलिं दाःम्ह थें। अचल जुइ ।

म्ह झ्यातुइ। नये यइ मखु। 'म्हुतु चकनी, नयादिसँ।' यइपुगु परिकार न्ह्यःने तइ। श्रीमतीं इनाप याइ ।

'म्हुतु हे मसाः, गय् नये?' श्रीमतीयात तं क्यने। म्हुतुइ तये। घुर्के फइ मखु। ल्ह्वया बी। मनसे वांछ्वये। थौं जिगु नुगः झ्यातु। देशप्रति उत्तरदायित्वबोध दयेमाः। इनाप वइ। दबाब बी। थुकिं सुं बिसिउँ वने दइ मखु। चिन्तित जुइमाः। उत्तेजित याइपिं दइ ।

सुयागुं दवाव, इनाप उत्तेजनां छु जुइ? जिगु नुगः हे झ्यातु। सुयागुं इनापयात घुतुके फुगु जिगु अवस्था मखु। जि दुने दुने मफु। सने हे मफु। जडवत। छुं हे विषय विचरण याये म्हां। न्ववाये मन मदु। छुं च्वये मास्ते मवः। राजनीति विषयया ला ना तकं लुमंके मयः। दुर्गन्धया अनुभूतिं पीडित जुइ। थ्व लुमन कि जिगु प्वाः हित्तु हीकी। ल्ह्वयेमाः थें जुइ। इकुसे। मिखां छुं मखं थें जुइ ।

देशया परिस्थिति डामाडोल। थौं जिगु नुगः झ्यातु। तयां तये मजिउ। अस्थीर। छुं यायेत स्वये। मन दइ मखु। छुं च्वयेत स्वये। च्वये फइ मखु। गनं पःखालय् हाः थें। न्याः थें अनुभव जुइ। थौं। जिगु नुगः झ्यातु। जिगु च्वसु मन्ह्याः। मन्ह्याःगु च्वसुया थ्व आर्तनाद। कृपया न्हाय्पं बियादिसँ। न्यनादिसँ ।

More Stories Like this