युरोपियन राजदूतत रुष्ट
सरकारं गतिरोध अन्त्य मयाःगु द्वपं
येँ (सन्ध्या टाइम्स)/युरोपियन युनियनया राजदूततय्सं वर्तमान सरकारं माःगु कथं राजनीतिक गरिरोध अन्त्यया नितिं कुतः मयाः धासें नेपाः सरकारप्रति असन्तुष्टि प्वंकूगु दु ।
उपप्रधानमन्त्री एवं परराष्ट्र मन्त्री सुजाता कोइरालायात थौं सुथय् नापलानाः युरोपियन युनियनया राजदूततय्सं थ्व असन्तुष्टि प्वंकूगु खः। राजदूततय्सं माओवादीं आम हडताल लित कायेधुंकूगु थ्व इलय् आः याकनं हे सरकारपाखें राजनीतिक सहमति ब्वलंकाः शान्ति प्रक्रियायात गति बीमाः धइगु बिचाः प्वंकूगु खः ।
उपप्रधानमन्त्री कोइरालाया निवास मण्डिखाटारय् जूगु उगु सहलहया झ्वलय् राजदूततय्सं दलतय् दथुइ विश्वासया वातावरण तयार यायेत बः बिउगु खः। 'गतिरोध अझ नं अन्त्य जुइ मफुगुप्रति वय्कःपिंसं चिन्ता प्वंकादिल' सहलह लिपा उप प्रधानमन्त्री कोइरालां धयादिल, 'सहमतिया नितिं कुतः यायेत इनाप यानादीगु दु ।'
सहलहया झ्वलय् युरोपियन युनियन नापं अमेरिका व अष्ट्रेलियाया राजदूतत नं दुथ्याःगु खः। राजनीतिक गतिरोध झन् झन स्वत्तुमत्तु स्वया वंलिसे नेपालय् अन्तर्राष्ट्रिय समूदायया चिउताः झन अप्वया वंगु दु ।
सी दु कथं उकुन्हु माओवादीयात आम हडतालया ज्याझ्वः लित कायेकेगु ज्याय् युरोपियन युनियनया राजदूततय्गु हे तःधंगु भूमिका दु। युरोपियन युनियनया राजदूततय्सं यदि माओवादीं आमहडताल लित काःसा वयां लिपा प्रधानमन्त्रीया राजीनामा कायेत थःपिंसं पहल याये धकाः बचं बिउगु खँ नं सूत्रं धाःगु दु। वय्कःपिंसं आः प्रमयात नं नापलानाः थःपिनि चिउताः प्वंकेत्यंगु दु ।
