चीधंगु आन्दोलन झन हिंसात्मक जुइफु

नेकपा (माओवादीं) खुन्हु तक याःगु आमहडताल स्थगित यायेधुंकाः आः आन्दोलनयात सिंहदरवार केन्द्रित याःगु दु। तर सिंहदरवार केन्द्रित आन्दोलनया म्हिगः न्हापांगु न्हि हे व्यापक तोडफोड व गोली समेत कयेके माःगु अवस्था वल। माओवादीं यायेत्यंगु थ्व आन्दोलन आः पूरा नेपाःव्यापी मजुसे सिंहदरवार लागा जःखःया छकू थासय् जक सीमित जूसां थुकिया स्वरुप धाःसा उकुन्हु स्वयां आक्रामक जुइफु। कारण छु धायेबलय् देशव्यापी आमहडताल स्थगित याःगु कारणं माओवादीया आपालं कार्यकर्तात निराश जुयाच्वंगु दु। उकिं उपिं आः उकुन्हु थें संयमित व शान्त जुयाः आन्दोलन कुहां मवयेफु। अथे हे मेगु खँ, आमहडताल स्थगन लिपा माओवादीया आन्दोलनय् कुहां वइपिं कार्यकर्ताया ल्याः म्हो जूगु दु। मनू म्हो जुल कि अज्याःगु आन्दोलन हिंसापाखे वनीगु सम्भावना अप्वः दु। म्हिगःया ज्याझ्वः अथे हे जूगु खः। आः म्हिगः अथे जूगुलिं उकिया ब्वलासायेमाः धकाः कन्हय् नं उकथंया ज्या मजुइ धाये मफु ।

अय् जूगुलिं थज्याःगु गतिविधियात इलय् हे नियन्त्रण यायेमाःगु आवश्यकता दु। थः कार्यकर्तायात नियन्त्रण यायेगु माओवादीया ज्या खः, तर माओवादीं यानाच्वंगु थ्व आन्दोलनयात याकनं दिके बीगु धाःसा सरकारया कर्तव्य खः। माओवादीं ल्ह्वनाच्वंगु मागयात फयांफछि याकनं संवोधन यानाः उमित नं सन्तुष्ट यायेगुपाखे आः सरकार व सत्तारुढ दलतय्सं पलाः न्ह्याकेमाः। यदि थ्व इलय् माओवादीयात हायेकेगु कथंया गतिविधि जुयाच्वन धाःसा उपिं अझ उग्र जुयाः पिहां वइगु खतरा दु। थुकिं राज्यसत्ता विशेष रुपं सतर्क जुइ हे माः ।

More Stories Like this