सिंहदरवारय् गोली प्रहार

धर्ना च्वंवःपिंत प्रहरी हस्तक्षेप

येँ (सन्ध्या टाइम्स)/एकीकृत नेकपा (माओवादीं) थौं सुथय् ९ बजेनिसें शुरु याःगु सिंहदरवार घेराउ ज्याझ्वलय् प्रहरीं हस्तक्षेप यानाः रबरया गोली समेत प्रहार याःगु दु। उकी लानाः करिब छगू दर्जन कार्यकर्ता घाःपाः जूगु दु। अथे हे ल्वापुया झ्वलय् माओवादी कार्यकर्तां करिब छगू दर्जन ति हे सरकारी गाडी नं तोडफोड याना बिउगु दु ।

शान्ति व संविधानया निंतिं सरकार विघटन यानाः संयुक्त राष्ट्रिय सरकार दयेकेमाःगु माग यासें माओवादीं थौं सिंहदरवार केन्द्रित आन्दोलन याःगु खः ।

घेराउया रवलय् माइतिघर मण्डला लागाय् प्रहरीं हस्तक्षेप याःगु दु। धर्नाय् वःपिं माओवादीतय्त न्ह्यःने मतसे लिना छ्वःगु खःसा उलि यानाः नं मजिसेंलि उमित टियर ग्याँस कयेकूगु खः। प्रहरीया थ्व हस्तक्षेप लिपा माओवादीया कार्यकर्तातय्सं सरकारी गाडीइ अप्पां कयेकाः तोडफोड शुरु याना हल। लिसें उगु लागाय् थःगु शक्ति थपे यायेत बानेश्वरपाखें द्वलंद्वः कार्यकर्ताया जुलुस थ्यंकः वयेवं भिडन्त तच्वः जूगु खः ।

प्रहरीं भिड तितरबितर यायेत रबरया गोली प्रहार यायेवं अन तसकं भागाभाग जूगु खः। गोलीं लानाः व दयाः घाःपाः जूपिं कार्यकर्तातय्त अस्पताल ब्याकूगु दु। छुं ईया भिडन्त लिपा उगु लागा हानं शान्त जूगु दु ।

माओवादी कार्यकर्तातय्सं भद्रकाली, सिंहदरवारया पूर्व गेट व पद्मोदय मोडय् च्वनाः घेराउ यानाच्वंगु दु। थ्व घेराउया कारणं यानाः उगु लागां सिंहदरवार दुहां वनेगु फुक्क हे लँपु बन्द जुयाच्वंगु दु। इमिसं सरकार विरुद्ध नारावाजी यानाच्वंगु दुसा गनं गनं म्येँ हालाः प्याखं नं हुलाच्वंगु दु।
घेराउया हे झ्वलय् सिंहदरवारया कर्मचारीतय्त दुत छ्वयेगु सवालय् प्रहरी व प्रदर्शनकारीतय् दथुइ भद्रकाली लागाय् नं छझाः कचमच जूगु खःसा लिपा कर्मचारीतय्त तकं अन पनेगु ज्या जूगु दु ।

थौं सुथय् ९ बजेनिसें न्ह्याःगु उगु घेराउ सनिलया ५ बजे तक जारी जुइगु खँ माओवादीया येँ जिल्ला इन्चार्ज पवनमान श्रेष्ठं कनादीगु दु ।

आमहडताल लित कायेधुनेवं माओवादीं म्हिगः देय्न्यंकं सभा याःगु खःसा थौं सिंहदरवार घेराउ ज्याझ्वः याःगु खः। माओवादी कार्यकर्तातय्सं जिल्ला प्रशासन ज्याकू नं घेराउ यानाच्वंगु दु ।

माओवादीतय्सं थौं नं सिंहदरवार दुने सुं हे मन्त्रीतय्त हे दुत मछ्वयेगु धकाः तयारी याःगु खःसां मन्त्रीत धाःसा सुथय् हे दुहां वनाच्वंगु खः। माओवादीया थ्व ज्याझ्वलं यानाः राजधानीया यातायात अस्तव्यस्त जुयाच्वंगु दु। माओवादीं आःयात थ्वहे ज्याझ्वःयात निरन्तरता बीगु व जेठ १४ जःखः मेगु ज्याझ्वः बीत्यंगु दु ।