न्हूगु 'भिजन' ज्वनाः वनेमाः

डी.आर. खड्गी

- झीगु स्वनिगलय् पिनें वयाच्वंपिं गैरनेवाःतय्सं बन्द, हड्ताल, जुलुस सफल याये माल कि नेवाःतय्त इनाप यानाच्वनी। जब बन्द, हड्ताल यानाः सत्ताय् वनेत सफल जुइ तब हानं नेवाःतय्गु हे छ्यनय् कःनि मुस्या सीगु शुरु याइ ।

वंगु दँय् अर्थात बैसाख २१ गते एकीकृत नेकपा (माओवादी)या नायः प्रचण्डया नेतृत्वय् संचालन जुयाच्वंगु सरकारं राजीनामा बीसातकि व इलंनिसें माधवकुमार नेपालया सरकार विरुद्ध प्रत्यक्ष वा अप्रत्यक्षरुपं चर्को विरोध याना वयाच्वंगु खः। गबलें संविधानसभा ज्यायात ठप्प यायेगु यानाच्वनीसा गबलें सतकय् वयाः चर्को आन्दोलन यानाच्वनी। प्रचण्ड प्रधानमन्त्री पदं राजीनामा बिउगु इलय् जनतां थथे नं धायेगु याः, पुलांम्ह जुजु ज्ञानेन्द्रयात चीके फुगु शक्तिशाली पार्टीं प्रधानसेनापति कटवालयात चीके मफुम्ह प्रचण्डं न्ह्याक्व हे फूर्ति याःसां नं माकः फुइँ जक जुयाच्वंगु दु। प्रधानसेनापति कटवालयात भारत सरकारया पुरा समर्थक दुगुलिं प्रचण्डं चीके मफयाच्वंगु खः धकाः जनतां धया वयाच्वंगु दु। वहे इलय् प्रचण्डं खुल्लारुपं स्पष्ट यायेमाःगु खः। भारतं यक्व हस्तक्षेप यानाच्वंगु हुनिं यानाः भारत थ्व अर्धउपनिवेशपाखें मुक्तिया निंतिं जनसमर्थन कयाः संघर्ष यायेमाःगु खः। यदि व इलय् प्रचण्डं अर्धउपनिवेशया निंतिं आह्वान याःगु खःसा भारतपरस्त पार्टी बाहेक सारा जनतां अवश्य नं साथ बीगु जुइ। नेपाली काँग्रेस प्रजातान्त्रिक पार्टी धाधां अप्रजातान्त्रिक ज्या जक यानाच्वंगु जक मखु असमान सन्धि समेत भारतनाप यानाः देय्या जलश्रोतया अधिकार भारतयात बियाच्वन। भारतं देश घातक ज्या यानाच्वंगुलिं जनतां एमाले पार्टीयात न्ह्यःने हःगु खः तर एमाले पार्टीं नं देशघातक टनकपुर (महाकाली) सन्धियात सिफारिस यासांनिसें एमाले पार्टीयात नं जनतां भरोसा यायेगु त्वःता हःगु खः ।

काँग्रेस व एमाले पार्टी देश विकास यायेगु मस्वसे खालि विदेशीतय्त लय्तायेकेगुपाखे वनाः देश बर्बाद यानाच्वंगुलिं २०५१ सालपाखे माओवादी चर्को राष्ट्रवादया नारा ज्वनाः हतियार ल्ह्वंगु खः। माओवादी पार्टी जनयुद्ध यानाच्वंगु इलय् धमाधम सुरुंग निर्माण तकं यानावंगु खः। सुरुंग निर्माण याःगु कारण खः भारतया सुरक्षाकर्मी नाप टक्कर कायेमालेफु धकाः खः। भारतया सुरक्षाकर्मीनाप प्रत्यक्षरुपं टक्कर कायेफुगु शक्ति मदुगुलिं गुरिल्ला युद्ध हायलकायेल यायेगु लागि खः। माओवादी पार्टीया दस्तावेजय् थथे धयातःगु दु। भारतं नेपाःया जनता पक्ष मवँसे न्ह्याबलें दलाल पूँजीपति सामन्ती शोषकयात समर्थन यानाच्वंपिं धकाः ठोकुवा यानातःगु दु। भारतया उद्देश्य नेपालय् कठपुतली सरकार स्थापना यानाः नेपाःया प्राकृतिक सम्पति अधिन कायेगु खः। जनयुद्ध चर्को जुयाः वनाच्वंगु इलय् अचानक माओवादी पार्टीया नेतातय्सं युद्ध दिकाः भारतया दिल्ली वनाः १२ बुँदाया समझौता यानावःगु खनाः जनता अजूचाल। छाय्धाःसा जनतां आशा भरोशा यानाः समर्थन यानाच्वंगु पार्टी जूगुलिं खः। १२ बुँदाया सम्झौता याना वयेसातकि ततःधंगु पार्टीया नेतातय्सं नागरिक विधेयकयात स्वीकृति बियाः हानं भारतमुखी जुया क्यन। नागरिक विधेयकयात स्वीकृति यायेगुलि माओवादी नेतात नं सक्रिय जूगु खनाः माओवादी पार्टी नं भारतया जालय् क्यन धकाः जनतां धायेगु यात। जब भारतं नागरिक विधेयक मार्फत विहारीतय्त लाखौंलाख नागरिकता बीकेत सफल जुल। हानं भारतं माओवादीयात माइनस यायेगु लँपुइ वन। विहारया नेतातय्सं खुल्लारुपं धायेगु यात नेपाःया देशभक्त जनता व सच्चा कम्युनिष्ट शक्तियात माइनस यायेगु निंतिं जिमिसं मधेशवादी दल व सशक्त हतियारधारी मधेशी समूहयात समर्थन ग्वाहालि यानाः खः धकाः फूर्ति यानाः धाल। मधेशी हतियारधारी समूह नं नेपालीतय्त तराई नं विस्थापित यानाच्वंगु कारणं राजनीति उद्देश्य सुलाच्वंगु दु ।

यदि थ्व खस नेतातय्के देय्यात पूरा स्वतन्त्र व सार्वभौम रक्षा यानाः देश विकास यायेगु सोच दुपिं खःसा पार्टीया स्वार्थ त्वःताः फुक्कं छप्पँ जुयाः देश विकासया निंतिं सशक्त ढंगं न्ह्याः वनेमाःपिं खः। तर नेतात नं देश विकास यायेगुपाखे वनाच्वन नं विदेशीया दलाली यायेगु त्वःतेफु। खालि खस ब्रम्हू नेतात विदेशी भक्त क्यनेगु, थःगु जातिया जक स्वार्थय् वनाः देय्यात अस्तव्यस्त यानाच्वंगु दु। माओवादी न्हापा ला अर्धसामन्ती व अर्धउपनिवेशयात मुक्तिया निंतिं धकाः संघर्षय् वःपिं खः। लिपा अप्रत्यक्ष रुपं भारतया प्रभावय् लात। हानं लिपा भारतं पेलान यायेसातकि भारत विरुद्ध खुल्लारुपं न्ह्यःने वल। फुक्क पार्टीया इतिहास व गतिविधि, विदेशी शक्तिया चलखेल स्वयेबलय् थुकिं छुं क्यनाच्वंगु दुसा छखे विदेशी शक्ति जनतायात कंगाल यानाच्वंगु दुसा मेखे खसब्रम्हू नेतातय्सं नं जनतायात गुमराह यानाच्वंगु खनेदु।
माओवादी पार्टीं वंगु बैसाख १९ गते आमहड्ताल याःगु उद्देश्य नं देय् व जनताया कल्याणया निंतिं मखु थें च्वं। खालि माधव कुमार नेपालयात चीकाः प्रचण्ड प्रधानमन्त्री जुइगु निंतिं जक खः। वास्तवय् झीत ला छम्ह ब्रम्हू वनाः मेम्ह ब्रम्हू सत्ताय् वल धकाः छुं हे फरक जुइगु मखु। न्ह्याम्ह हे ब्रम्हू नेता सत्ताय् वःसां आखिरय् जनतायात भ्रमय् तयाः थःगु जातिया स्वार्थय् जक वनीपिं खः। अथे जूगुलिं झी फुक्कं सचेत जुयाः खसब्रम्हूया फोहोरी राजनीतिइ फँसे जुइ मजिल ।

झीगु स्वनिगलय् पिनें वयाच्वंपिं गैरनेवाःतय्सं बन्द, हड्ताल, जुलुस सफल याये माल कि नेवाःतय्त इनाप यानाच्वनी। जब बन्द, हड्ताल यानाः सत्ताय् वनेत सफल जुइ तब हानं नेवाःतय्गु हे छ्यनय् कःनि मुस्या सीगु शुरु याइ। थथे बारम्बार सफल जूगु आन्दोलनं क्यनेधुंकूगु दु। यदि आः नं गैरनेवाःतय्गु थज्याःगु खँयात विश्वास यानाः झी ब्वाँय् जुल धाःसा झन हे बर्बाद जुइगु लँपाखे हे वनेगु ज्या जुइ। अथे जूगुलिं विशेष यानाः स्वनिगःया फुक्कं नेवाःत छप्पँ जुयाः थःगु थाय् सुरक्षित रक्षा व थःगु विकासया निंतिं सचेत जुयाः सशक्त ढंगं न्ह्याः वने मफुत धाःसा लिपा पश्चाताप यायां लाइ मखु ।

More Stories Like this