आः मागयात नं संवोधन या

थःपिंत जनताया निंतिं राजनीति याइपिं धकाः दावी याना वयाच्वंगु पार्टी माओवादीं थःपिंसं न्ह्याका वयाच्वंगु आम हडतालपाखें जनतायात तःधंगु मर्का लात धइगु खँयात महसुस यानाः अन्ततः म्हिगः निसें आमहडताल लित काःगु दु। हडताल लित कायेगु माओवादीया थ्व ज्यायात आम जनतां लसकुस याःगु दु। अथे खःसां माओवादीपाखें ल्ह्वनाच्वंगु सेना समायोजन, राज्य पुनर्संरचना आदि थेंज्याःगु मुद्दायात समर्थन याइपिं मेपिं तमाम न्यायप्रेमि जनतां धाःसा आमहडताल लित कायेगु थ्व ज्यां आः गनं थ्व मुद्दात नं ध्याकुनय् लाः वनीगु खः लाकि धकाः चिउताः प्वंका हःगु दु। माओवादीं हडताल त्वःतूसां थ्व मुद्दायात धाःसा त्वःते मजिउ व अझ नं त्वःतूगु मदुनि। उकिं आमहडताल लित काःसां हडतालया मू कारण जुयाच्वंगु मुद्दात अझं यथावत हे दनिगुलिं असन्तोष, आक्रोस व विद्रोह धाःसा कायम हे दनि। माओवादीं थःपिनि हडताल लित कायेधुंकाः आः राज्यपक्षं नं माओवादीपाखें ल्ह्वनाच्वंगु मागयात आरामपूर्वक संवोधन याना यंकेगु ज्या न्ह्याकूगु बांलाः। यदि अथे मयासे हडताल लित कायेगु निर्णययात माओवादीया कमजोरी तायेकल धाःसा उकिं कन्हय् हानं मेगु दुर्भाग्य पिकाये फुगु खँय् सकलें सचेत जुइमाः। न्ह्यागुसां खुन्हु तक देय् छगुलिं ठप्प यानाः माओवादीं थःपिंसं छु तक यायेफु धकाः क्यना बिउगु दु। अले जनतायात दुःख जुइगु हडताल ताःहाकः जुल धाःसा जनतां गय् यानाः प्रतिकार याइ धइगु खँ नं माओवादीं खंगु हे दु। निगुलिं पक्षयात थ्व छगू शिक्षा खः। कन्हय् हानं अज्याःगु स्थिति मवयेकेगु लागिं नं आः सहमति लुइका वनेगु ज्या यायेमाःगु दु ।

More Stories Like this