रत्नपार्कय् टियर ग्याँस
शान्ति सभाय् ब्वति कयावःपिंत आक्रमण
येँ (सन्ध्या टाइम्स)/थीथी संस्थातय् मंकाः ग्वसालय् थौं सुथय् जूगु शान्ति र्यालीइ ब्वति कयाः लिहां वःपिं सहभागीतय्त माओवादी कार्यकर्तातय्सं येँ व यलया थीथी थासय् आक्रमण याःगु दु। र्यालीइ ब्वति कयाः लिहां वयाच्वंपिं छुं मनूतय्त बागबजारय् माओवादी कार्यकर्तां आक्रमण यायेवं प्रहरीं हस्तक्षेप यानाः प्यंगू शेल टियरग्याँस कयेकूगु दु। लिपा प्रहरी व माओवादी कार्यकर्ता ल्वापु जुयाः हानं मेगु निगः टियर ग्याँस नं कयेकूगु दु ।
शान्ति र्याली सिधयेकाः लिहां वःपिं मनूतय्त माओवादीं तुयूगु वसः फिना वःपिं मात्तुमालाः आक्रमण याःगु खः। थौं शान्ति सभा जक याइगु ज्याझ्वः दुगु खःसां सभा लिपा जुलुस नं पिकाःगुलिं उकी माओवादीं आक्रमण याःगु खः। थौं शान्ति सभाय् व्यापारीत न्ह्यःने तयाः एमाले व कांग्रेस कार्यकर्तां अप्वः ब्वति काःगु द्वपं माओवादीं बिउगु दु ।
उखे यलय् नं सभाय् ब्वति कयाः लिहां वःपिं मनूत नापलायेवं मंगल बजारय् आक्रमण याःगु दु। अन छगः गाडी नं तोडफोड नं याना बिउगु खः। आक्रमणया खँ सियाः गुलिखे मनूत लँ दथुं तुं लिहां वःगु खः। पिने झापा व धनगढीइ नं र्यालीया सहभागीतय्त आक्रमण याःगु दु ।
थौं माओवादीं नं थीथी थासं जुलुस पिकायेत्यंगु दुसा थौंया ज्याझ्वः आक्रमण जुइफु धाःगु दु ।
