आन्दोलनयात युद्धय् यंकेगु षडयन्त्र

माओवादीया नेतृत्वय् न्ह्यानाच्वंगु वर्तमान आन्दोलन शान्तिपूर्ण जुयाच्वंगु हे थुकिया तःधंगु विशेषता खः। तर थज्याःगु आन्दोलनयात आः हिंसापाखे यंकेगु लागिं सत्तारुढ पार्टी एमाले व नेपाली कांग्रेसया भ्रातृ संगठनत लगे जुयाच्वंगु खने दयावःगु दु। ख्वपय् जूगु ल्वापुइ एमाले समर्थित युथ फोर्सं गोली समेत चले याःगु प्रमाण लूगु दु। थःपिंसं गोलीं कयेकाः उकिया दोष माओवादीयात बीगु निकृष्ट ज्या तकं उमिसं याःगु दु। थ्व वास्तवय् शान्तिपूर्ण आन्दोलनयात हिंसात्मक यायेत राज्यपाखें जुयाच्वंगु षडयन्त्रया दसि खः ।

आन्दोलनया प्रतिकार यायेत थीथी थासय् प्रतिकार समितित गठन जूगु खबर नं वयाच्वंगु दु। थ्व नं वास्तवय् स्वतस्फुर्त रुपं वःगु मखु कि राज्यया मतियारत हे लगे जुयाः प्रायोजित रुपं जुयाच्वंगु ज्याखँ खः धइगु खँ थुकिं पुष्टि जूगु दु। थुकिं आन्दोलनयात हिंसात्मक दयेकाः देय्यात गृहयुद्धपाखे न्ह्याकेगु ज्या जक याइ। यदि अज्याःगु अवस्था वल धाःसा थुकिं देय् व जनता सुयां नं भिं मजुइगु निश्चित दु। आन्दोलनकारीत ल्वाभः ज्वनाः वयाच्वंगु खःसा उकिया प्रतिकार यायेगु पाय्छि नं जुइगु खः। तर निहत्था सतकय् वयाः शान्तिपूर्ण आन्दोलन यानाच्वंपिं जनताया प्रतिकार यायेगु धइगु राज्यसत्ता घोर तानाशाहीकरण जुयावंगुया दसि जक जुइ। उकिं थज्याःगु ज्यायात तुरुन्त दिकेमाः। यदि गनं स्वतस्फुर्त रुपं थज्याःगु ज्या जूगु खःसा ला उकियात पनेमाःथाय् अःखतं थःपिं हे जानाः ग्वाकेगु ज्या यानाः राज्यसत्तां थःगु लोकतान्त्रिक ख्वालय् हाकः इकेगु ज्या याःगु दु। राजनीतिक पार्टी व वया भ्रातृ पुचःतय्सं थ्व ज्या मयाःसा हे बांलाः ।

More Stories Like this