राजनीतिक गतिरोध तत्काल क्वचायेकेत देय् दबूया इनाप

नेवाःतय् राष्ट्रिय संगठन नेवाः देय् दबूं वर्तमान राजनीतिक गतिरोध तत्काल क्वचायेकाः समस्या समाधानया उपाय अवलम्बन यायेत दलतय्त इनाप याःगु दु ।

देय् दबूया नायः नरेश ताम्राकारं छगू प्रेस विज्ञप्ति पिथनाः प्रमुख प्रतिपक्षी दल एनेकपा (माओवादीं) यानाच्वंगु अनिश्चितकालीन आमहड्तालं ब्वलंगु स्थिति व देय्या वर्तमान अवस्थाय् खनेदुगु अनिश्चित व अन्यौलता प्रति थःगु गम्भीर ध्यानाकर्षण जूगु खँ विज्ञप्तिइ न्ह्यथंनातःगु दु ।

अथेहे प्रमुख राजनैतिक दलत दथुइया सैद्धान्तिक असहमतिया कारणं न्हूगु संविधान दयेकेगु महत्वपूर्ण ज्या अवरुद्ध जूगु व उकीया कारणं लोकतान्त्रिक जनआन्दोलन पाखें प्राप्त उपलब्धी तकं तनेफइगु खतरा प्रति दक्वं नेवाः समुदाय चिन्तित जूगु खँ विज्ञप्तिइ न्ह्यथंनातःगु दु ।

विज्ञप्तिइ राजनैतिक गतिरोध ज्यंकाः शान्ति प्रकृयायात तार्किक निष्कर्षय् थ्यंकाः लोकतान्त्रिक गणतन्त्र, संघीय राज्य, समावेशीय शासनप्रणाली, धर्मनिरपेक्ष राज्य सहित नेवाः स्वायत्त राज्य सुनिश्चितन जुइगु संविधान इलय् हे जारी जुइगु वातावरण मिले यायेत राजनीतिक दलतय् ध्यानाकर्षण याःगु दु ।

अथेहे विज्ञप्तिइ वर्तमान राजनैतिक समस्या इलय् हे समाधान यायेमफयाः जारी आन्दोलनं निरन्तरता काःगु खण्डय् अर्धैयता व असहिष्णुताया कारणं स्थितियात उत्तेजित यायेत व प्रतिगामी तत्वतय्सं चलखेल यायेदइगु नापं छगू पक्षं मेगू पक्ष विरुद्ध कुहांवइगु अवस्था ब्वलनेफइगु अकलप्नीय हिंसात्मक द्वन्द्वया खतरा पाखे नं सजग जुइता इनाप यानातःगु दु ।

More Stories Like this