भुइजःसिइ हवाइ फायर
थाय्थासय् बन्द विरुद्ध प्रतिकार समिति
येँ (सन्ध्या टाइम्स)/माओवादी आम हडतालया झ्वलय् थौं सुथय् येँया भुइजःसि लागाय् हडताल याः वयाच्वंपिं माओवादी जुलुस व प्रतिकार पुचःया जुलुस चूलानाः ल्वापु जुइवं उकियात नियन्त्रणय् कायेत प्रहरीं प्यंगू राउण्ड हवाई फायर याःगु खः ।
अन माओवादी व एमाले-कांग्रेस कार्यकर्तातय् दथुइ अप्पां कयेकाः ल्वापु जूगु खः। उकी लानाः छम्ह मचा घाःपाः जूगु दु। घाःपाः जूम्ह मचायात अस्पताल यंकूगु दु। निगू अलग अलग थासं पिहां वःगु जुलुस भुइजःसिया प्रहरी चौकी लागाय् चूलायेवं ल्वापु जूगु खः। ल्वापुं यानाः अप्रिय घटना मजुइमा धकाः अन आः ब्यापक रुपं हे प्रहरी परिचालन याःगु दु। आः प्रहरीं अन लँया दथुइ च्वनाः उखें थुखें मनू वये-वने याके मबिसे तया तःगु दु। ल्वापु लिपा एमाले व माओवादी दथुइ ल्वापु मयायेगु सहमति जूगु दु ।
वंगु चान्हय् हे एमाले-कांग्रेस कार्यकर्तातय्सं खड्ग भद्रकाली, चपली, महांकाल व विष्णु गाविसय् मुनाः आमहडतालया विरुद्ध प्रतिकार यायेगु तयारी यानाच्वंगु खः। उमिसं प्रतिकारया हे झ्वलय् जुलुस पिकायेवं निगू पुचःया दथुइ ल्वापु जूगु खः ।
उखे ख्वपय् नेपाली कांग्रेसया भ्रातृ संगठन नेपाल तरुण दलयात आमहडताल विरुद्ध प्रतिकार याकेत ख्वपया झिंखुगू गाविसय् तरुण दलया वसः पुंकाः तयारी यानातःगु दु ।
