आन्दोलनयात कयाः नेवाः सरोकार

थौंकन्हय् न्ह्यानाच्वंगु माओवादीया आमहडतालयात कयाः खास यानाः स्वनिगःया नेवाःतय्सं नं थःपिनि चिउताः प्वंकाहःगु दु। स्वनिगः नेवाःतय्सं दयेका तःगु नेवाःतय्गु हे लागा खः। उकिं थन जुइगु छुं नं तःधंगु वा चीधंगु घटनाक्रमयात थनया जिम्मेवार नागरिकया रुपय् नेवाःतय्सं चिउताः तये हे माःगु आवश्यक दु। उकिसनं थौंकन्हय् माओवादीं गुगु विषययात कयाः थ्व आन्दोलन ल्ह्वनाच्वंगु खः उकी नेवाःतय्सं न्हापांनिसें सरोकार क्यना वयाच्वंगु खँत हे आपालं दुथ्याः। गथे कि संघीय व्यवस्था व उकी नेवाः स्वायत्त राज्यया पलिस्था, धर्म निरपेक्ष राज्य, गणतन्त्र नेपाःया ग्यारेन्टी। थुपिं नेवाः आन्दोलनं नं न्हापांनिसें ल्ह्वना वयाच्वंगु विषय खः। थ्वहे विषययात कयाः थौं गुगुं नं पुचलं राज्यशक्तियात हे दवाव बीगु कथंया आन्दोलन यात धाःसा उकी नेवाःतय्सं थःपिनि चिउताः मक्यँसें च्वने फइ मखु। उकिसनं थौं थ्व गुगु आन्दोलन जुयाच्वंगु खः थ्व नेवाःतय्गु हे आदिभूमि स्वनिगलय् केन्द्रित दु, थुकिया लागिं पिने जिल्लाया लखौं मनूत स्वनिलय् दुहां वयाच्वंगु दु। थ्व फुक्कं खँ नेवाःतय्गु चिउताःया घेरा दुने लाः। उकिं थ्व आन्दोलनकारीतय्सं ल्ह्वनाच्वंगु कम से कम नं नेवाः सरोकारया मागत याकनं पूवंकि धकाः राज्य सत्तायात दवाव बीगु झी नेवाःतय्गु दायित्व नं जुइ। अले आन्दोलनं यानाः नेवाः जनतायात गुगु कष्ट जुयाच्वंगु खः उकी चिउताः प्वंकाः आन्दोलनयात फक्व याकनं क्वचायेकि धकाः आग्रह यायेगु नं झीगु कर्तव्य खः। थुपिं हे खँत न्ह्यःने तयाः नकतिनि नेवाः न्ह्यलुवातय्सं गुगु सरोकार क्यन, व च्वछायेबहः जू। उकियात निगुलिं पक्षं महत्व बीमाः ।

More Stories Like this