ख्वपय् गोली चले जुल
माओवादी व युथ फोर्स कार्यकर्ता ल्वापु
ख्वप (सन्ध्या टाइम्स)/माओवादी आम हडतालया झ्वलय् थौं सुथय् ख्वपय् माओवादी कार्यकर्ता व एमाले समर्थित युथ फोर्सं पिकाःगु प्रतिकार जुलुस दथुइ ल्वापु जुयाः गोली समेत चले जूगु दु ।
ख्वपया च्वछेँ त्वालय् निथ्वःसिया दथुइ उगु ल्वापु जूगु खः। ल्वापुया झ्वलय् हे गोली चले जूगु खःसा गोली चले याःपिं युथ फोर्सया कार्यकर्तात खः धकाः माओवादीं द्वपं बिउगु दु। युथ फोर्सया कार्यकर्तात गोली कयेकाखतं बिसिउँ वंगु खँ माओवादी कार्यकर्तां धाःगु दु। गोली काण्ड लिपा नं माओवादी कार्यकर्तातय्सं जुलुस पिकयाः थीथी लागा चाःहिउगु खः। लिपा उगु जुलुस तौमधिइ थ्यंकाः छगू सभा यासें क्वचाःगु खः। वंगु आइतवाः निसें शुरु जूगु आमहडतालया झ्वलय् ख्वपय् माओवादीं पिकाःगु थ्वहे दकलय् तःधंगु जुलुस व सभा खः धाःगु दु। प्रतिकार जुलुसया नेतृत्व एमाले युवा संघया नायः महेश बस्नेतं याना वःगु खँ नं धाःगु दु। ल्वापु जूगु थासय् ९ एमएलया गोली छगः नापं गोलीइ तयेगु म्यागेजिन नं लुइकूगु दु। गोलीं कयाः माओवादीया छम्ह कार्यकर्ता नं घाःपाः जूगु दु ।
युथ फोर्सया कार्यकर्तातय्सं तौमधि लागां जुलुस पिकाःगु अले सुकुलध्वाकाय् थ्यंकाः नेपाली कांग्रेसया कार्यकर्तात नं ल्वाकज्यानाः मंकाः जुलुस पिकाःगु खः। थ्व निगुलिं जुलुस च्वछेँय् थ्यंकाः चुलिंचू जुइवं ल्वापु जूगु खः ।
