हडतालं अस्तव्यस्त बजाः व्यवस्थापन
माओवादीं न्ह्याकूगु अनिश्चितकालीन आम हडताल देशवासीतय् लागिं कष्टकर जुयाच्वंसां छुं मनूतय् निंतिं धाःसा थ्व छगू हाकुगु ज्या यानाः कमे यायेगु बांलाःगु अवसर नं जुयाच्वंगु दु। पसः, बजाः फुक्कं बन्द जूगु मौकाय् लाकाः अप्वः अप्वः ध्यबा कयाः खाद्यान्न मीगु ज्याय् छपुचः हाकुबन्जाःत सक्रिय जुयाच्वंगु खनेदु ।
तर दुगु सामग्री थुकथं मीगु ज्या जुयाच्वंसां मेखे बजारय् आः अत्यावश्यक सामग्री हे बुलुहुँ बुलुहुँ म्हो जुजुं वनाच्वंगु दु। पिनें हयेमाःगु खाद्यान्न लगायतया ज्वलं यातायात बन्दं यानाः स्वनिगलय् दुहां मवयेवं बजारय् नये-त्वनेगु ज्वलंया अभाव नं शुरु जुया वःगु दु। यदि थ्व आमहडताल थथे हे छुं न्हि अझ न्ह्याना वन धाःसा खाद्यान्न व मेमेगु अत्यावश्यक ज्वलंया अभाव जुयाः देशय् हाहाकारया अवस्था ब्वलनेफु। खुद्रा पसलं कःघानाच्वंगु थ्व बजाः निन्हु प्यन्हु हे जक चले जुइगु खनेदु ।
न्हिंन्हिं उत्पादन यानाः न्हिंन्हिं हे मी माःगु कृषिजन्य खाद्यान्नत अथें सितिं वनाच्वंगु दुसा मेखे वहे खाद्यान्न न्यायेगु मदयाः हाहाकारया अवस्था नं जुयाच्वंगु दु। थ्व अवस्था ताःहाकः जुया वन धाःसा जनताया आक्रोश सरकारपाखें फहिलाः आन्दोलनकारीपाखे धस्वायेफु। मनूतय् म्वायेगु आधार तक हे ध्वस्त जुइगु अवस्था वल धाःसा जनता प्रतिकारय् कुहां वइगु अस्वाभाविक मखु। देशय् अज्याःगु अवस्था वयेमा व जनतां आन्दोलनकारीतय्त बहिष्कार यायेमा धकाः सरकारं इच्छा याइगु स्वाभाविक खः। उकिं थुकियात कयाः आन्दोलनकारीतय्सं हे माःगु अनुगमन व निगरानीया ज्या नं न्ह्याकेमाःगु आवश्यकता दु ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
