अले जिं बांलाक थुइ

नर्मदेश्वर प्रधान

माधवकुमारं प्रधानमन्त्री पदं राजीनामा बी। कन्हय्निसें स्कूल क्याम्पस फुकं चाली। पढाई सुचारु जुइ। रडियो, टेलिभिजनं खबर वइ। छय् नं ताइ। व आक्रोशित जुइ। तं वयेकाः जिथाय् वइ। धाइ। कमरेड प्रचण्ड नं झूर खनिं।

छय्। स्कूलय् ब्वनाच्वंम्ह। खुगू क्लासय्। जितः वयाः धाइ, "जि कमरेड प्रचण्डया फ्यान। अंकल प्रचण्ड दः तसकं हे यः।" छु धाःगु थ्व? न्हापां जिं थुइके मफुत। थौंकन्हय् देशय् आन्दोलन जुयाच्वंगु। प्यखेरं जुलुस। भाषण। शायद थ्व हावां वयात नं थिल जुइ। जिं बिचाः याना। कमरेड प्रचण्ड, माधवकुमार नेपाल, झलनाथ खनाल राजनीतिक बजारय् आलु, प्याज थें जुइधुंकल। मचा, मिसा, बुरा सुयागुं नितिं नं इपिं अपरिचित मखु। अनभिज्ञ मखु। रेडियो न्यँ। टिभी स्व। अखवार ब्वँ। इमिगु हे नां, खँ लुयाच्वनी। उकिं इमित म्हसीगु स्वाभाविक खः। इपिंपाखें प्रभावित जुइगु अस्वाभाविक मखु ।

छय् नं कमरेड प्रचण्डयात म्हसीकूगु जक मखु। थःत फ्यान हे धया बिल। मतिइ वल। मचां क. प्रचण्डया साधारण परिचयया जक खँ ल्हानाच्वंगु मखु। खँ गहन। बिचाः याये। थुकी राजनीतिक अर्थ अनुभव जुया वइ। थौंकन्हय् मचातय्के नं राजनीतिक चेतना गुलि विकास जुइधुंकल। खुगू कक्षाया विद्यार्थी। मचा धयां जिल ला। कमरेड प्रचण्डयात थुइके फयेधुंकल। क. प्रचण्डया जनविद्रोहया भावं नुगलय् थिउगुलिं मखु ला छय् नं प्रचण्ड अंकलयात थः फ्यान खंकल। छय्याके लूगु राजनीतिक चेतनाप्रति छखे जि आश्चर्य चकित जुल। मेखेरं जितः गर्वबोध अनुभव जुल।
बिचाः वल, थौंकन्हय् मचातय्के याकनं हे प्रौढता वः खनिं। न्हापा न्हापा थज्याःगु उमेरय् गुच्चा म्हिती। कतांमरि म्हिताः ई छ्याइ। थौं थें नांनां अखबार मरु। टेलिभिजन, इन्टरनेट ला कल्पनाय् हे मलूनि। थौं संचारया माध्यमत यक्व वयेधुंकल। सुथय् दँसांनिसें देश, विश्वया खँत सीके फयाच्वनी। नेतातय् भाषण न्यने दयाच्वनी। चेतनामूलक खँत ताये दयाच्वनी। थौं उमेर प्रौढ जुइमाः धइगु मदु। चिचीधंगु कक्षाय् ब्वनाच्वंपिं मस्तय्सं नं देशया राजनीतिक गतिविधि स्वये खनाच्वनी। इपिंपाखें प्रभावित जुयाच्वनी। जिमि छय् नं कमरेड प्रचण्डप्रति क्यंगु आदरभावं जितः विश्वास बी। वइगु नुगलय् नं क्रान्तिचेत, विद्रोहभावया पुसां थाय् कायेधुंकूगु दु ।

सारगर्भित जुयाः जिं थ्व खँ छम्ह पासायात कना। जिम्ह छय्मचायाके खनेदुगु थज्याःगु प्रौढ राजनीतिक चिन्तन सुइत कने। सीके बी। जि धैर्यहिन जुइ। पासा नापलाइ। न्यंके। थौंकन्हय्यापिं मचातय्के इलं हःगु प्रौढ राजनीतिक चेतना इंगित याये। जिगु खँ छु न्यनी। पासां नं थःगु खँ धाये हथाय्चाइ। धाइ, "स्व रे ! भाइ जिमि छय् नं म्हिगःनिसें अथे हे। माधव अंकल धन्यवाद, छं खुब यात। तुति खाके मते।" हालाच्वनी। व नं अथेहे खुगू कक्षाय् तिनि। उमेर उलि दुगु नं मखु। तर खूब राजनीतिज्ञ जुयाः अंकल माधवया गुणगान यानाच्वनी। "राजीनामा बी दइ मखु।" छेँय् च्वनाः हालाच्वनी ।

पासाया खँ न्यने। जि झं छक्क जुइ। देशया राजनीतिप्रतिया सरोकार जिम्ह छय्याके जक खः ला। विश्वास यानाच्वनागु। पासाया छय्याके नं उत्तिकं दु खनिं। मखु छम्ह निम्ह मचातय्के जक मखु। सामुहिक रुपं हे थौंया मचातय्के राजनीतिक चेतना ब्वलना वयाच्वंगु अनुभव जुइ। झण्डा ज्वनाः मचात जुलुसय् वयाच्वंगु लु मिखाय् दं वइ।
"छं छय् व जिम्ह छय् विपरित ध्रुबयापिं जुयाच्वन। जिम्ह छय् कमरेड प्रचण्डया फ्यान। छं छय् कमरेड माधवया समर्थक। इमिके राजनीतिक चेतना जक दुगु मखु। इमि राजनीतिक विश्लेषण नं पाः खनिं।" पासायात धया। पासां धाइ। "ग्व जिं ला छुं हे धाये मफु। थ्व मचातसें थुइक धाःगु ला मथुइक। हाहालय् खँ ल्हाइगु ला। थौंकन्हय् राजनीति धइगु हाहालय् ला खः नि.... माधव अंकल धन्यवाद। राजीनामा यायेम्वाः।" छय् नं जपे यानाच्वनी। थ्व वया प्रौढ उक्ति खःला...। मचा खँ। जि ला अलमले जुइ। जिं मनय् मनय् धाये। "जिमि छय् सतक आन्दोलनया पक्षय्। श्रमिक, किसान, निम्नवर्गया समर्थनय्। जनशक्तिया पूजक। सामन्ती दलाल पुँजीपतिया खिलाफय् ....। ओहो "जिं हे थ्व फुक्क मथूनि। छय्नं गुलि दुग्यंक थूगु ....उकिं मखुला व प्रचण्ड अंकलया फ्यान जूगु। जि मन थहांवइ। पासाया छय् नं अंकल माधवया पं ली ।

"राजीनामा बी म्वाः।" हालाच्वनी। जिं बिचाः याना। पासाया छय्नं सतक विद्रोहं मखु विधि सम्मतं सरकार चीकि धाःगु जुइमाः। वं माधवकुमार नेपालयात बांलाक हे थू खनिं। उकिं हे मखुला वं अंकल माधव नेपालया पक्षय् न्ववाःगु। पासाया छय्या राजनीतिक अडान नं कम मजू। जि निष्कर्ष वये। बुरा, ल्याय्म्ह ल्यासेतय् दथुइ जक मखु। मचात दथुइ नं राजनीतिक चेतना तसकं ह्वयेधुंकल खनिं। मेगु छुं विकास मजूसां देशय् वःगु राजनीतिक चेतनाया विकासं देशया न्हाय् तया बिउगु दु। गर्व जुइ ।

देशय् वये फइगु दुर्गतियात ध्यानय् तयाः राजनीतिक दलतय्गु दथुइ सम्झौता जुइ। सतक आन्दोलन दी। माधवकुमारं प्रधानमन्त्री पदं राजीनामा बी। कन्हय्निसें स्कूल क्याम्पस फुकं चाली। पढाई सुचारु जुइ। रडियो, टेलिभिजनं खबर वइ। छय् नं ताइ। व आक्रोशित जुइ। तं वयेकाः जिथाय् वइ। धाइ। कमरेड प्रचण्ड नं झूर खनिं। सतक आन्दोलन दिके हे मजिउगु। कन्हय्निसें स्कूल वनेमाल। स्कूल बन्दं गुलि मोज जुयाच्वंगु। आन्दोलन जुयाः झं जि वया फ्यान जुया। क. प्रचण्डं आन्दोलन दिका बिल। स्कुल वने मायेका बिल। घण्टी वइ। पासाया फोन। "स्वरे पासा माधवकुमारं राजीनामा यात धकाः जिमि छय्नं जा हे मनः। अनशन च्वन। कन्हय्निसें स्कूल वनेमाल हँ। वं सुकुतिं राजीमाना याना बिल। अज्याःम्ह झूर नेता। कय्ता मदुम्ह।" जिमि छय् भुनुभुनु हालाच्वनी ।

थौंकन्हय् मस्तय्के वयाच्वंगु राजनीतिक चेतना गन थ्यं, गुलि ग्यं अले जिं बांलाक थुइ ।

More Stories Like this