थुकथं घेरे याइ चक्रपथ
येँ (सन्ध्या टाइम्स)/थःपिंसं न्ह्याकाच्वंगु अनिश्चितकालीन आम हडतालया झ्वलय् थौं माओवादीं येँया चक्रपथ घेरे याइगु जूगु दु। ह्याउँगु वसः पुनातःपिं कार्यतय् माः हयाः २७ किलोमिटर ताःहाकःगु उगु चक्रपथ पूवंक हे घेरे यायेगु ज्याझ्वः दयेकूगु खः। थुकी माओवादीया द्वलंद्वः कार्यकर्तातय्सं ब्वति काइगु खँ धाःगु दु ।
थौं सनिलया ५ बजेनिसें ६ बजे तक चक्रपथ छचाःलिं हे ल्हाःल्हाः ज्वनाः झ्वः छुसें थ्व घेराउ याइगु ग्वसाः दु। कार्यकर्तातय्सं ह्याउँगु वसः पुनाः चक्रपथ घेराउ याइगु जूगुलिं थ्व ज्याझ्वःया नां हे 'ह्याउँगु चक्रपथ अभियान' धकाः बिउगु दु ।
येँ व यल समेत थिउगु २७ किलोमिटर ताःहाकःगु थ्व चक्रपथ घेरे यायेत थ्यंमथ्यं खुद्वः कार्यकर्ता माःगु ल्याःचाः पिकयातःगु दु। तर माओवादीं चक्रपथयात छचाः जक मखु निचाः स्वचाः हे जुइक घेरे यायेगु ज्याझ्वः दुगु खँ माओवादी येँ जिल्ला इन्चार्ज पवनमान श्रेष्ठं कनादीगु दु ।
थौंया थुगु घेराउ अभियानया नेतृत्व माओवादी अध्यक्ष प्रचण्डं हे यानादीगु खँ नं धाःगु दु। लिसें माओवादीया उपाध्यक्षपिं मोहन वैद्य, डा. बाबुराम भट्टराई, नारायणकाजी श्रेष्ठ, महासचिव राम बहादुर थापापिं नं थुकी सहभागी जुसें चक्रपथ घेराउया अवलोकन यानादीगु ग्वसाः दु। थ्व घेराउ ज्याझ्वःया केन्द्र बालाजुयात दयेकूगु दु। अनंनिसें घेराउ शुरु जुयाः अन हे क्वचायेकीगु खँ धाःगु दु। रिंगरोड लागा कोटेश्वर, कलंकी, चाबही, ग्वंगःबुँ आदि थ्यंकं थ्यं ।
