दुने व पिने निथासं उथलपुथल एमाले
पिने माओवादीं आमहडताल मार्फत कडा दवाव बियाच्वंगु इलय् दुने हानं थःपिनि हे आन्तरिक कचवनं यानाः देय्या सत्तारुढ पार्टी नेकपा (एमाले) थ्व इलय् तःधंगु संकटय् लानाच्वंगु दु। एमालेया हे नेता प्रधानमन्त्री जुयाच्वंगु इलय् माओवादीं थज्याःगु कठोर आन्दोलन यानाः जनतायात कष्ट बियाच्वंगु दु। तर जनतायात न्ह्याक्व हे कष्ट जूसां एमालेया प्रधानमन्त्री राजीनामा बीत धाःसा पटक्क हे तयार जुयाच्वंगु मदु। थुकिं यानाः माओवादीपाखें आजित हे जुइधुंकूपिं जनता नं आः एमालेया आलोचक जुयाः पिहां वयाच्वंगु दु। छाय्धाःसां संविधानसभाया चुनावं माओवादीयात बहुमत बिउगु व अन्तरिम संविधानय् नं बहुमतीय मखु कि सहमतीय सरकार दयेकाः न्ह्याः वनेमाः धकाः च्वयातःगु कारणं अज्याःगु सरकार दयेकेमाः धकाः माओवादीं बियाच्वंगु तर्कया लिउने छुं हे दम मदु धायेमछिं। थज्याःगु अवस्थाय् एमालेया थःहे छुं वरिष्ठ नेतातय्सं आः प्रधानमन्त्री राजीनामा बियाः निकासया लुखा चायेका बी माल धकाः पार्टी अध्यक्षयात ज्ञापनपत्र बिउगु कारणं एमाले बाह्य राजनीतिइ जक मखु आन्तरिक राजनीतिइ नं उथलपुथल अवस्थाय् लाः वंगु दु। थ्व एमालेया लागिं अतिकं खतरनाक अवस्था खः। थुकिं पार्टीयात हानं छक्वः विभाजनपाखे यंकीगु उतिकं प्रवल सम्भावना दु। थ्व इलय् एमाले विभाजन जुइगु धइगु पार्टी जक मखु मुलुकया लागिं नं घातक ज्या जुइ। म्हिगः तक एमाले व माओवादी दथुइ समन्वयकारी भूमिका म्हिता वयाच्वंगु एमाले थौं थःहे विवादया चाकलय् लाः वःगु नेपाली राजनीतिया लागिं हे दुर्भाग्यया खँ खः। थुकी नेतातय्सं गम्भीर चिन्तन याये हे माः ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
