राजीनामां हे निकास वइ

तारण शाक्य

माधव नेपालं यानाः माओवादीं हाकनं मेगु जनयुद्ध यायेत्यंगु दु। तर थुपालय् माओवादीं जंगलय् च्वनाः मखु येँ शहरय् च्वनाः जनयुद्ध यायेत्यंगु दु ।

देशय् जुयाच्वंगु राजनीतिक अन्यौलयात गथे खः अथे हे त्वःताः प्रधानमन्त्री माधव नेपाल हथासं सार्क शिखर सम्मेलनय् निं ब्वति कायेत उखे ब्वाँय् झाल। देशय् संविधान दयेकेत यायेमाःगु ज्यायात अथें त्वःताः भूटानया थिम्पुइ प्राप्त जुइगु राजकीय सम्मानया लोभी जुयाः वय्कः उखे निं वंगु खः ।

देय्या प्रधानमन्त्री न्ह्याम्हे जूसां नैतिकवान व चरित्रवान जुइ हे माः। अलोकतान्त्रिक छबीयाम्ह मनू जुल धाःसा वं प्रधानमन्त्री जुयाः नं देश व जनताया लागिं छुं याये फइ मखु। व खँ ला थौं झीसं भोगे हे यानाच्वनागु जुल। तर ततःधंगु राजनीतिक पार्टीतय्सं हे अज्याःपिं अलोकतान्त्रिक नेतातय्त देशया ताःचा लःल्हाना बिल धाःसा जनतां जक छु याये फइ? थौं देशय् नैतिक व चरित्रवान नेतातय् म्हो जुयाच्वंगु कारणं यानाः हे देय्या राजनीतिं स्थिरता काये मफयाच्वंगु खँयात झीसं थुइकेमाः। नेपाः आः तकं गरीब तिनि। अय् जूगुलिं जनतां थ्व देय्यात न्ह्यागु हे राजनीतिक प्रणालीपाखे यंकूसां नं आपत्ति याइगु खने मदु। तर नेता खराबम्ह वल धाःसा उकी जनतां अवश्य आपत्ति याइ। २०४६ सालंनिसें देशय् नेतागिरीतन्त्र जक चले जुयाः जनतां आपालं दुःख सी माल। नेता धाःपिं फुक्क हे यथास्थितिवादीत। उकिं जनतां चाहना यानाच्वंगु हिउपाःया आशायात उमिसं थुइके मफुत। उकिं आः दयेकीगु न्हूगु संविधानय् जनतां याइगु अज्याःगु हिउपाःया चाहनायात आत्मसात यायेगु चरित्र नं नेतातय्के दयेमाः धइगु प्रावधान उल्लेख जुइमाः ।

थौं प्रधानमन्त्री माधव नेपालया राजनीतिक यात्रा नं संविधान निर्माण यायेगुपाखे सिबें नं थःगु सरकार टिके यायेगुपाखे हे जक केन्द्रित जुयाच्वंगु दु। यदि थःगु सरकार क्वःथलेगु खःसा सदनय् ३०१ सिट दयेकाः वा धकाः थःगु बहुमतया दम्भ क्यनाः नेतागिरीपहः ब्वयाच्वंगु दु। उकिं हे संसदया विपक्षी दलं थःगु शक्ति प्रदर्शन यासें देय्न्यंकंया कार्यकर्तात येँय् सःताः प्रधानमन्त्रीया हाथ्या बियाच्वंगु दु। प्रम माधव नेपालं माओवादीया शक्ति गुलि दु धइगु खँ मसिउगु खइ मखु। अथे सीक सीक नं उकियात वास्ता मयासे माओवादीं थौं तेश्रो जनआन्दोलन घोषणा यायेधुंकाः नं थः चाहिं विदेश भ्रमणय् निं ब्वाँय् जुइगु वय्कःया ज्या धाथें निन्दनीय जू। न्हापा पार्टीतय्गु हे लापर्वाहीं यानाः माओवादीत जंगलय् च्वनाः जनयुद्ध याःगु खः। आः एमालेया प्रधानमन्त्री माधव नेपालं यानाः माओवादीं हाकनं मेगु जनयुद्ध यायेमाःगु अवस्था वयाच्वंगु दु। तर थुपालय् माओवादीं जंगलय् च्वनाः मखु येँ शहरय् च्वनाः जनयुद्ध यायेत्यंगु दु। न्हापा थें जंगलय् बिसिउँ वनाः मेगु पार्टीया भ्रष्ट नेतातय्त हाई सञ्चो याना बी धकाः आशा मयाःसां जिउ। उकिं अझ नं ई दनि, एमालेया नेतात व प्रधानमन्त्री संयम जुयाः राजनीतिक निकास लुइकेगु ज्या याये माःगु दु ।

प्रतिकार यायेगु धकाः लगे जुल धाःसा उकिं जनताया मेगु दुर्दशा जुइ। छुं जुयाः थ्व आन्दोलनपाखें बांमलाःगु लिच्वः लात धाःसा उकिया दोषी प्रधानमन्त्री माधव नेपाल याकःचा जक मखु एमाले पार्टीं नं काये माली। माओवादीं संविधानय् धयातःकथंया सरकार दयेकेत, न्हूगु संविधान इलय् हे दयेकेत बीत व देशय् धाथेंया शान्ति कायम यायेत थ्व आन्दोलन यानाच्वंगु खः। आः एमाले नेतातय्सं छु धायेगु? थःगु कुर्सी छगूया लागिं देय् व जनताया चिउताः मतइम्ह प्रधानमन्त्रीया लिउ लिउ वनेगु लाकि वयात हटे यानाः देश व जनता प्रतिया थःपिनि इमान्दारिता क्यनेगु? निर्णय यायेगु ज्या एमाले नेतातय्गु हे खः ।

More Stories Like this