सतक माओवादी कब्जाय्
येँ (सन्ध्या टाइम्स)/माओवादीया आह्वानय् न्ह्यानाच्वंगु आमहडतालया थौं निन्हुया न्हि नं शान्तिपूर्ण रुपं न्ह्यानाच्वंगु दु। थौं नं स्वनिगः नापं देय्या थीथी नगरया सतकया दुवातय् च्वनाः माओवादी कार्यकर्तातय्सं म्ये हालेगु व भाषण बीगु ज्या यानाच्वंगु दु। थौं रत्नपार्क दुवातय् जुइगु सभाय् माओवादी महासचिव रामबहादुर थापा (बादल) पाखें संवोधन जुइगु खँ धाःगु दु। लिसें अन माओवादीया थीथी सांस्कृतिक पुचःतय्सं नं ज्याझ्वः न्ह्यब्वइगु ग्वसाः दु ।
थौं थीथी थासय् माओवादीं जुलुस पिकायेगु झ्वलय् येँया दुनेया लागाय् नेवाः राष्ट्रिय मुक्ति मोर्चां धिमे थानाः जुलुस पिकाःगु दु। उगु जुलुसं नेवाःतय्त नं सतकय् कुहां वयाः आन्दोलनय् ब्वति कायेत आह्वान याना वःगु खः ।
माओवादी बन्दं यानाः थौं नं देय्न्यंकंया सतक बजाः, शिक्षण संस्था, यातायात आदि पूर्ण रुपं ठप्प जुयाच्वंगु दु। राजधानी त्वःताः पिहां वनेमाःपिं आपालं यात्रुत विमानपाखें वनेगु यानाच्वंगु दुसा विमानं वने माःपिं यात्रुत थःगु सामान क्वबियाः पैदल हे विमानस्थलपाखे वनाच्वंगु खनेदु।
माओवादीं म्हिगः सनिलया ६ बजे पसः बजाः चायेके बिउगु खःसां उगु इलय् ततःधंगु मसाल जुलुस पिकयाः प्रदर्शन याःगु खः। थौं नं अज्याःगु ज्याझ्वः दु ।
