ठप्प जुयाच्वंगु देय् व प्रधानमन्त्रीया अडान
प्रधानमन्त्रीया राजीनामायात मूल शर्तया रुपय् न्ह्यःने तयाः माओवादीं म्हिगःनिसें शुरु याःगु आमहडतालया न्हापांगु न्हि शान्तिपूर्ण जूसां उकी दुनें 'मसां शान्ति' या गन्ध वयाच्वंगु खने दयाच्वंगु दु। माओवादीं सम्पूर्ण देय् हे ठप्प यानाः थःपिनि शक्ति छक्वः हाकनं क्यना बिउगु दुसा यदि थुलि यानाः नं प्रधानमन्त्रीं राजीनामा मबिल धाःसा वयां लिपाया अवस्था थथे हे शान्तिपूर्ण जुइ धकाः धाये मफइगु संकेत नं बिउगु दु। माओवादीपाखें याःगु थुलि तःधंगु प्रदर्शन व अवरोधयात लोकतन्त्रय् विश्वास याइगु गुगुं नं सरकारं नजरअन्दाज याये मफइगु निश्चित खः। तर नेपालय् थःत लोकतान्त्रिक पद्धति कथं वयाम्ह धकाः दावी याइगु सरकारं थज्याःगु प्रदर्शनयात चिउताः मतःगु वास्तवय् लोकतन्त्रया हे उपहास खः। राजधानीइ लखौं मनू सःताः आन्दोलनया तयारी यानाच्वंगु सीक सीकं उमित अझ भड्के यायेगु ल्याखं प्रधानमन्त्रीपाखें शनिवाः जूगु संवोधन वास्तवय् मुलुकयात भिडन्तय् यंकेत सरकारपाखें याःगु कुतः खः। माओवादीपाखें म्हिगः गुकथं मुलुक हे ठप्प जुइक प्रदर्शन याःगु खः, थ्व अवस्था मेगु छुं न्हि न्ह्याः वन धाःसा उकिं सरकार जक मखु सर्वसाधारण मनूतय् जीवनयात नं प्रभावित याना बी। सुं हे सर्वसाधारण पिहां तकं वये मफइगु अवस्थाय् थ्यनाच्वंगु मुलुकया प्रधानमन्त्री जुयाः भाजु माधव नेपालं छु उपलब्धी चूलाकीगु खः, व सुनां मसिउगु विषय जुल। लिउने च्वनाः भारतं बियाच्वंगु ढाडसया भरय् सत्ताय् च्वनाच्वनेगु सिबें देशय् वःगु संकेत प्रति जिम्मेवार जुयाः पलाः न्ह्याकूसा वय्कःया राजनीतिक उचाई अझ थहां वनीगु खइ ।
More Stories Like this
छाय् जुइ थपाय्जिगु अपराध? जनतायात सास्ती जुइगु विरोध मजिल उपप्रमपाखें भारतय् याःवंगु ब्रिफिंग अपराध व राजनीति आः नापनापं हे माओवादी सहमतिया थीथी पक्ष
