थौंया आमहड्ताल शान्तिपूर्ण
प्रदर्शनकारीतय्गु नयेगु, त्वनेगु, प्याखं हुलेगु सतकय्
येँ (सन्ध्या टाइम्स)/एकीकृत नेकपा (माओवादीं) आह्वान याःगु अनिश्चितकालीन आमहडतालया थौं न्हापांगु दिं शान्तिपूर्ण जुयाच्वंगु दु। माओवादीया द्वलंद्वः कार्यकर्तात थौं सुथंनिसें हे येँया कालिमाटी, रत्नपार्क, पुतलिसतक, कोटेश्वर, त्रिपुरेश्वर, ग्वंगःबुँ, गौशाला, सातदोबाटो, बल्खु, कलंकी नापं मूमू दुवातय् प्रदर्शन यानाच्वंगु दु। उमिसं सतकय् हे च्वनाः च्या त्वनेगु, बजि नयेगु बाजं थानाः प्याखं ल्हुइगु यानाः सतक कब्जा यानाच्वंगु दु। सरकारं थौंया लागिं जक झिंन्याद्वः जनपद व सशस्त्र प्रहरी परिचालन यानातःगु दु। सुरक्षाकर्मीत अतिकं संयमित जुयाः च्वनाच्वंगु दुसा माओवादी कार्यकर्तातय्सं नं स्वयम सेवक जुयाः व्यवस्थित यानाच्वंगु दु। सतकय् एम्बुलेन्स, प्रेस, पर्यटक गाडी जक फाट्टफुट्ट खनेदु। अथे खःसां थौ सतकय् पर्यटकत ल्ह्यइगु शटल सेवाया गाडी धाःसा न्हापा लिपा स्वयां अप्वः ब्वाँय् जुयाच्वंगु खनेदु। माओवादी कार्यकर्तातय्सं नारा थ्वयेकाः गल्लि गल्लिइ तकं चाः हिलाच्वंगुलिं गल्लि दुनेया पसः तकं बन्द जुयाच्वंगु दु ।
आमहडतालया झ्वलय् शिक्षण संस्था, उद्योग, पसः, यातायात नापं सरकारी ज्याकू तकं बन्द जूगु दु। बन्दं स्वनिगःया जनजीवन पूर्ण रुपं प्रभावित जूगु दु। स्वनिगलं पिनेया जिल्लात नं थौं पूर्ण रुपं बन्द जुयाच्वंगु दु ।
आमहडतालया दथुइ नं बहनी ६ बजेनिसें ८ बजे तक धाःसा बजाः चायेकेगु छुट बिउगु दु। माओवादीं कन्हय् नं थुकथं हे बन्द यायेगु ज्याझ्वः दयेकातःगु दु ।
