मे दिवस धाथें मजदूर दिवस जू ला?

विश्वया थीथी देशय् थें नेपालय् नं म्हिगः देय्न्यंकंया मजदूरतय्सं थीथी कथंया ज्याझ्वः यानाः मे दिवस न्याये कल। नेपालय् थीथी राजनीतिक पार्टीया थःथःगु हे मजदूर कवः दु। वहे मजदूर कवःतय्सं थःथःगु हैसियत कथं थ्व दिवस हनेगु ज्या म्हिगः जूगु खः। उकी मध्ये माओवादी तःधंगु पार्टी जूगुलिं वं तःधंगु हे ल्याखय् सतकय् 'मजदूर'त क्वकयाः दिवस न्यायेकल। मेमेगु चिचीधंगु पार्टीतय्सं चाहिं चिची हे धंक दिवस न्यायेकल। वास्तवय् थ्व मजदूर दिवस न्यायेकेगु ज्यापाखें हे नेपाःया मजदूरतय्गु विडम्बना प्रस्ट जू। नेपाःया मजदूरत थःपिनि नामय् स्वनातःगु दिवस तकं थःयत्थे न्यायेकेत स्वतन्त्र मदु। उपिं थः आवद्ध पार्टीं गज्याःगु दिवसया आयोजना याना बी अज्याःगु हे दिवस न्यायेकाः मजदूर जुयाया कर्म पूवंकेत विवश जुयाच्वंगु दु। नेपाःया मजदूर युनियनत राजनीतिक पार्टीया कवलय् सीमित जुयाच्वंगु कारणं सुं नं मजदूर युनियन थःपिनि पार्टी लाइन स्वयां पाक्क मुक्कं मजदूर जक जुयाः बिचाः अभिव्यक्त यायेत सक्षम जुयाच्वंगु मदु। मात्र मजदूर जुयाः ज्या याये मफइगु कारणं यानाः देय्या मजदूर आन्दोलन व मजदूर संगठन सशक्त नं जुइ फयाच्वंगु मदु। राज्यसत्ताया न्ह्यःने मजदूरतय्सं थःपिनि धाथेंया माग तयेगु हिम्मत नं याये फयाच्वंगु मदु। मात्र राजनीतिक पार्टीया ल्वाभः जुयाः सक्रिय जुइत बाध्य जुयाच्वंपिं नेपाःया मजदूरतय्सं 'विश्वया मजदूरत छप्पँ जु' धइगु नारा थ्वयेकीबलय् उकियात मनूतय्सं हास्यास्पद तायेकेगु याः। मजदूर दिवस मात्र मजदूरतय्गु नखः कथं राजनीतिक पार्टीतय् हस्तक्षेपं मुक्त जुयाः न्यायेके खंसा हे जक सार्थक जुइगु खइ ।

More Stories Like this