अबलय् छेँ छखाया झिद्वः

मधु श्रेष्ठ

जिमि बाज्यां मुलय् तयाः कनातःगु बाखं
- मथुरादेवी श्रेष्ठ, ८७ दँ

जिगु नां मथुरादेवी श्रेष्ठ खः। तःभुखाय् ब्वःबलय् झिंछदँ दत धकाः मांबौपिंसं धयादीगु लुमं। जिगु जन्म येँया दमाइ त्वालय् जूगु खः। जिमि बाया नां खड्गबहादुर श्रेष्ठ व मां विष्णुमाया श्रेष्ठ खः ।

मां बौया याकः म्ह्याय् जि। अथे खःसां झिंस्वदँ दुबलय् हे येँया न्ह्यःखाय् बिया छ्वयाहल। जिमि जहान शिवदास श्रेष्ठ जि स्वयां प्यदँ थँ। न्हापा जितः थःछेँय् जक च्वने मास्ति वइगु। छेँय् धाःसा च्वने मंमदु। मचाबलय् इहिपा याना बिउगु जुयाः थथे जूगु खःला जिं छुं हे मसिउ ।

तःधिकः जुइधुंकाः जि छेँय् च्वनेगु याना। उबलय् सुथ न्हापां दनेमाः। कोतय् बिगुल पुयाहबलय् तक वसिबँ पुइ सिधयेकेमाः। वयां लिपा वा सुयाः तिनि जा थुइगु खः। फुकसितं नकेत्वंके धुंकाः ज्या सिधयेकाः न्हिनय् हानं इताः फ्यनेगु यायेमाः। बहनीसिया ज्या फुकं सिधयेकाः आः थें खुरुक्क द्यं वने मदु। माजुयात चिकं बुकाः, तुति तीकः वनेमाः। माजुं द्यं हुँ धाल कि तिनि द्यंवनेमाः ।

इहिपा लिपा जि न्याम्ह मस्त दत। काय् प्यम्ह व म्ह्याय् छम्ह। कायपिं कृष्णगोपाल, पूर्णगोपाल, रामगोपाल व हरिगोपाल। अले म्ह्याय् राधिका। निम्ह कायपिं मदये नं धुंकल। भौपिं, जिलाजं, छय्पिं व छुइपिं दु ।

न्हापा न्हापा मिसापिंसं आखः ब्वने मजिउ धाइगु। अझ मिजंतय् तक नं आखः ब्वनेत थाकु। आः थें स्कुलत यक्व मदु। व इलय् मिस्त धइपिं याकःचा पिहां वने दइ मखु। थःछेँ छकः वनेत नं सःतके हयेमाः। पासा मदयेकं गनं वने खनी मखु। उबलय् मिस्त पसः वनेगु चलन नं मदु ।

उबलय् न्ह्यागु सामान नं तसकं दं। जिं सीकं लुँ छतोलाया न्यय्तकां लाः। छमुरि वाया न्यातका जक काइगु नं सिउ। अथे हे उबलय् नयेगु चिजबिजत नं उलि हे दं। छगः ख्येंया स्वंगः ध्यबा काइगु अले छधानि घ्यःया स्वतका व छसुका काइगु बांलाक हे सिउ। उबलय् वसः नं उलि हे दं। न्यासुका वंगु छत्वाः पर्सि तसकं बांलाः तायाः स्वत्वाः सिनागु आः तक नं लुमंनि। दुबसा दुगु मिसा लं छम्वः दामं न्याना बिउगु खः ।

उबलय् बाःपिंसं झिद्वः झिंछद्वःलं छेँ मिउगु नं बांलाक हे सिउ। व इलय् जग्गा ला झन हे दं। न्हापायापिनि जागिर नःसां आः थें यक्व ध्यबा मवः। जिमि जहानया उबलय् झिंन्यातका जक हे तलब वइगु खः। अथे खःसां फुक्कं चिज दंगु जुयाः अःपुगु ला धइथें च्वं ।

न्हापा थौंकन्हय् थें मोटर, साइकल, ट्याक्सी, बस धाःगु मदु। येँ, यल, ख्वप न्ह्याथाय् वंसां न्यासि हे वनेमाः। नखःचखः किजापुजा, मांबाया ख्वाः स्वःवनेबलय् कु यंकेत धाःसा ज्यापुत खःमू ज्वनावइ। लँय् आःथें मोटरत यक्व मदु अले लँय् जुइपिं नं आपाः मदुगु जुयाः ला गय् थें न्यासि वने नं अःपु ।

थौंकन्हय् थन लःया गुलि दुःख जुयाच्वंगु दु। न्हापा धाःसा छेँखापतिं हिति मदुसां आः थें लःया दुःख मजू। उबलय् त्वाःपतिं हिति, तुं, ल्वहंहिति, लुँहिति न्ह्याबलें लः वयाच्वनीगु जुयाः याउँसे च्वं। पशुपति, बागमती व विष्णुमती खुसिइ नं उलि हे यचुसे च्वंगु लः दयाच्वनी। खुसिइ वनाः ख्वाः सिलेगु, म्वः ल्हुइगु गुलि न्ह्यइपुसे च्वं।
न्हापा आः थें उसाँय् मदइबलय् क्यं वनेत यक्व अस्पतालत मदु। वीर अस्पताल छगू धाःसा जिं सिसांनिसें हे दु ।

थौंकन्हय् थें मचा बुइकेत अस्पताल यंकेमाः धइगु नं जिमिगु पालय् मदु। छेँय् हे अजि छम्ह हयाः मचा बुइकेगु खः। गबलें ला अजि नं दइ मखु ।

थौंकन्हय्या स्वनिगः न्हापा स्वयेबलय् यक्व हे पायेधुंकल। झ्यालं क्वस्वयेबलय् हे ग्वाःग्वाः मनूत व मोटर मोटरसाइकल चले जुयाच्वनीगु जुयाः न्ह्यइपुसे नं च्वं। छेँय् नं टी.भी. स्वये दुगुलिं न्हि वं नं मचाः। त्वालय् नं न्हापायापिं जःलाखःलात मदयेधुंकल। अप्वः हे पिने छेँ दनाः च्वं वनेधुंकल। गुम्हं विदेशय् वनेधुंकल। स्वनिगलं पिने च्वंपिं हे अप्वः खने दये धुंकल। न्हापा ससतिक छेँ मदु। अले ततःजाःगु छेँ नं मदु। थौंकन्हय् धाःसा स्वनिगलय् तजाःगु छेँत हे आपाः दु ।

जि धर्म याये तसकं न्ह्याः। न्हापा फुबलय् अपसं च्वनेगुनिसें कयाः दान यायेगु व द्यइके जुइगु नं यक्व याना। अथे जुयाः ला मसिउ निदँ न्ह्यः जितः न्ह्यलं चाःबलय् हे शेषनारायण व मेमेपिं द्यःपिंसं दर्शन बिउ वल। आः जिगु इच्छा धइगु काय्पिं, भौपिं, म्ह्याय्, मचाखाचा सकसियां भिं जुइगु स्वयेगु खः ।

More Stories Like this

जातीय संघीयताया खँय् नेमकिपा
प्राडो, पाजेरो ब्वाकेगु ख्यः मखु
राष्ट्रपति प्रणाली बारे विवाद
नेवाःतय्त जागृत याइगु 'नेपाःमिया नुगः सः'
खँ स्वनिगःया