हडताल लित व राजीनामा नापं

प्रमयाके पार्टीं राजीनामा कयातयेधुंकल?

येँ (सन्ध्या टाइम्स)/छखे माओवादीं आम हडताल लित कायेगु व उखे एमालें प्रधानमन्त्री माधव नेपालया राजीनामा कायेगु नितां ज्या छन्हुं हे जुइ फइगु सम्भावना अप्वया वंगु खँ सूत्रं धाःगु दु। यदि थुकिया लागिं निगू दलया नेतातय् दथुइ गोप्य रुपं जुयाच्वंगु कुतः ताःलात धाःसा सार्क शिखर सम्मेलय् ब्वति काः झाःम्ह प्रधानमन्त्री माधव नेपाल येँय् लिथ्यनेवं हे आन्दोलन लित कायेगु व प्रमं राजीनामा बीगु नितां घोषणा जुइफुगु खँ नं सूत्रं धाःगु दु ।

सूत्रं बिउगु जानकारी कथं राजनीतिक गतिरोध तसकं तच्वः जुयावंगुलिं एमाले स्थायी समितिं प्रधानमन्त्री माधव नेपालयात राजीनामा या धकाः निर्देशन बीधुंकूगु दु। तर पार्टीं थुकियात आःयात सार्वजनिक मयायेगु निर्णय याःगु दु। यदि माओवादी थःपिनि आन्दोलन लित कायेत तयार जुल धाःसा राजीनामाया घोषणा नं अबलय् हे यायेगु सहमति जुयाच्वंगु दु ।

सूत्रया कथं वंगु वैशाख १३ गते च्वंगु स्थायी समितिया बैठकं प्रमयात थ्व निर्देशन बिउगु खः। पार्टीं निर्णय हे यानाः बिउगु उगु निर्देशनय् प्रम नेपाल लगायत स्वम्ह मन्त्री व खड्ग ओलीं नोट्स अफ डिसेन्ट च्वया थकूगु खँ सूत्रं धाःगु दु।
उगु इलय् प्रम नेपालं माओवादीया आन्दोलन दिकेगु जक मखु थः धुंकाः वइम्ह विकल्प सु खः व नं स्पष्ट यायेमाः धकाः माग यानादीगु खः। माओवादी अध्यक्ष प्रचण्डयात ला थम्हं पद त्वःतेगु खँ जुइ मखु धासें प्रम नेपालं थःत न्हापा राष्ट्रपति चुनावय् माओवादीं स्वीकार मयाःगु प्रशंग नं अन उल्लेख यानादीगु खः ।

तर उकिया लिसलय् उपाध्यक्ष वामदेव गौतमं न्हापा प्रचण्डं जितः थथे धाःगुलिं आः जिं नं वयात अथे हे याये धया जुइगु धइगु ह्याउँमचा खँ जुल धासें राजनीतिइ थज्याःगु खँ ल्हानां समाधान लुइके फइ मखु धकाः सचेत यानादीगु खः ।

सूत्रया कथं पार्टीपाखें राजीनामा बीमाः धइगु दवाव वयेवं प्रम नेपालं वकुन्हु हे थः सल्लाहकारत सःताः सहलह यानादीगु खः। उकी अप्वःसिनं वय्कःयात पद त्वःते हे मते धकाः सुझाव बिउगु खः। वयां लिपा प्रधानमन्त्रीं तुरुन्त हे १० दलया बैठक सःताः अन नं राजीनामा बीमालीगु खः लाकि धकाः बिचाः तयादीगु खः। १० दलया बैठकं वय्कःयात राजीनामा यायेम्वाः धइगु सुझाव बिउगु खः ।

आः न्हूगु विकास जूगु राजनीतिक अवस्था कथं प्रम नेपाल थिम्पुइ सार्क सम्मेलनय् ब्वति कयाः नेपाः लिहां वयेवं हे राजीनामा बीगु सम्भावना दु। वय्कः नेपाः वयेवं हे माओवादी आन्दोलन लित कयागु जुल धकाः घोषणा याइगु व प्रमं
राजीनामा घोषणा याकेगु निगू ज्याझ्वः छक्वलं याकेगु बारे तीव्र ढंगं तयारी जुइ फइगु खँ नं धाःगु दु ।