भूटानय् सार्कया झिंखुक्वःगु सम्मेलन

दक्षिण एशियाली देय्तय् संगठन सार्कया १६ क्वःगु शिखर सम्मेलन म्हिगःनिसें भूटानय् शुरु जुयाच्वंगु दु। भूटानय् जुयाच्वंगु सार्कया थ्व न्हापांगु सम्मेलन खः। सार्क संगठन नीस्वंगु नीन्यादँय् क्यंगु इलय् जुयाच्वंगु थ्व सम्मेलनं सार्क संगठन नीस्वनेधुंकाः थ्व लागाय् गुलि विकास एवं प्रगति जुल व उकी सार्क संगठनया गुलि योगदान दु धइगु खँया मूल्यांकन यायेगु छगू अवसर नं चूलाःगु दु ।

थुगुसी भूटानय् सार्कया शिखर सम्मेलन जुयाच्वंगु नेपाःया लागिं मेगु छगू नं अवसरया विषय खः। भूटानं लिना हःपिं करिब छगू लाख शरणार्थीत नेपाःया थीथी शिविरय् च्वनाच्वंगु दु। थ्व समस्या मुक्कं सार्कया समस्या मखुसां सार्क दुने हे च्वंगु निगू चिचीधंगु देय्या समस्या धाःसा खः। तर सार्क संगठनया विडम्बना छु धाःसां थन दुने निगू देय्या समस्या ल्ह्वनेगु अनुमति मदु। भूटानय् हे जूगु सम्मेलनय् नं भूटानपाखें जूगु ज्यादति बारे खँ ल्ह्वने मदुगु कारणं थुकिं नेपालं खास हे लाभ काये फइगु अवस्था मदु। अथे खःसां निगू पक्षीय वार्तापाखें नेपालं थ्व समस्या ज्यंके जिउ। थिम्पुइ हे नेपाःया प्रधानमन्त्रीं भूटान व भारतया समेत अधिकारीत तयाः त्रिपक्षीय वार्ता याःसा छुं ठोस निकास पिकाये फइगु खः ।

थुगुसी जुयाच्वंगु सार्क सम्मेलनं तःगु एजेण्डा धाःसा नेपाःया लागिं नं अतिकं सान्दर्भिक जू। पर्यावरणीय समस्यां नेपाःयात गज्याःगु लिच्वः लायेफु धकाः नेपालं छुं ई न्ह्यः तिनि सगरमाथाया बेस क्याम्पय् मन्त्रिपरिषद बैठक तःगु खः। आः थ्व समस्यायात सार्कपाखें समेत ल्ह्वनेगु ज्या जूगु सकारात्मक खँ जूगु दु ।

More Stories Like this