निजी विद्यालयं अप्वयेकूगु शुल्क लितकाल

निजी विद्यालयतय्सं न्हूगु शैक्षिक सत्र निसें अप्वयेकूगु शुल्क लितकाःगु दुसाः उकीया विरोधय् कुहांवयाच्वंगु अखिल (क्रान्तिकारी)तय्सं नं विद्यालय बन्द यानाच्वंगु ज्याझ्वः लितकाःगु दु ।

नीन्हु दुने शुल्क समायोजन यायेगु सहमति जुइवं शुक्रवाः निसें निजी व आवसीय विद्यालय संचालन जुइगु जूगु दु । शिक्षा मन्त्रालयया समन्वयलय् बिहीवाः अखिल (क्रान्तिकारी), प्याब्सन, एन प्याब्सन व अभिभावक संघया प्रतिनिधितत दथुइ जूगु वार्ता लिपा विद्यालय च्याकेगु सहमति जूगु खः ।

वार्ताय् नियमावलीलय् व्यवस्था जूगु कथं नीन्हु दुने वैज्ञानिक व व्यवहारिक रुपय् शुल्क समायोजन यायेगु सहमित जूगु खः । वार्ताय् अज्याःगु सहमति जुइवं निजी विद्यालयतय्सं अप्वयेकूगु शुल्क आःयात स्थगन यायेगु व क्रान्तिकारीं थःपिनिगु शैक्षिक हड्ताल लितकायेगु खँ क्वःछिउगु खः ।

निजी विद्यालयं नियम विपरीत शुल्क अप्वयेकूगु धासें क्रान्तिकारी विद्यार्थीतयसं आइतवाः निसें अनिश्चिताकाली विद्यालय बन्द यानावयाच्वंगु खः ।

More Stories Like this