द्वलंद्व नेवाःत पाखें संविधानसभा घेराउ

ऐतिहासिक नेपालमण्डल लागाया आदिवासी नेवाःतय्सं क्वःछिनातःगु इलय् हे संविधान जारी यायेमाःगु व उकी नेवाःतय् अग्राधिकार सहित नेवाः स्वायत्त राज्य दुथ्याकेमाःगु माग यासें मंगलवाः संविधानसभा भवन घेराउ याःगु दु । नेवाः स्वायत्त राज्य मंकाः संघर्ष समितिया नेतृत्वय् जूगु संविधानसभा घेराउ ज्याझ्वलय् स्वनिगः नापं पिनें वःपिं द्वलंद्वः नेवाःतय्सं थःपिनिगु अधिकार सनिश्चितताया माग यासें संविधान सभा भवन घेराउ याःगु खः ।

न्हूगु संविधानय् नेवाःतय् अग्राधिकार सहित नेवाः स्वयात्त राज्यया सुनिश्चितता, जातीय स्वशासन नापं आत्मनिर्णयया अधिकार दयेमाःगु, ऐतिहासिक नेपालमण्डलया नेवाः बाहुल्यता दुगु लागायात नेवाः स्वयत्त प्रदेशय् दुथ्याकेमाःगु माग यासें नेवाःतय्सं संविधानसभा भवन घेराउ याःगु खः ।




घेराउ ज्याझ्वः न्ह्यः येँया लाय्कू, गौशाला, कोटेश्वर व यलया मंगलय् मुनाः तःजिगु जुलुस सहित संविधानसभा भवन घेराउलय् ब्वति कायेत वःगु खः । अथेहे ख्वपः, थानकोट, भ्वँत आदि लागां नं आपालं नेवाःत घेराउ ज्याझ्वलय् ब्वति काःगु खः । न्हिनसिया निताः इलं निसें प्यताः ई तक संविधानसभा भवनयात पश्चिम, दक्षिण व उत्तरया गेटय् न्ह्यने च्वनाः स्वंगू थासं घेरे याःगु खः । उगु इलय् स्वंगू थासय् बिस्कं बिस्कं सभा यानाः नेवाः नेतातय्सं सम्बोधन यानादीगु खः ।

सभायात माओवादीया सभासद् दिलिप महर्जन, कांग्रेसया सभासद् तीर्थराम डंगोल, एमालेया सभासद् मंगलसिद्धि मानन्धर, नेपाः राष्ट्रिय पार्टी पाखें सभासद् बुद्ध साय्मि, नेपा: राष्ट्रिय पार्टीया नाय: डा. केशवमान शाक्य, नेवाः स्वायत्त मंकाः संघर्ष समितिया संयोजक सुजिव बज्राचार्य, नेवाः देय् दबूया नायः नरेश ताम्राकार, देय् दबूया संरक्षक मल्ल के सुन्दर, नेपाल आदिवासी महासंघया अध्यक्ष राजकुमार लेखी लगायतं सम्बोधन यानादीगु खः ।

प्यताः ई लिपाः संघर्ष समितिया संयोजक सुजिव बज्राचार्यं संविधानसभा अध्यक्ष सुवाष नेम्वाङयात नेवाः स्वायत्त राज्यया सुनिश्चितता नापं इलय् हे न्हूगु संविधान जारी यायेमाःगु माग दुथ्याःगु ज्ञापनपत्र लःल्हाःगु खः । ज्ञापनपत्र लःल्हाना कयादिसें अध्यक्ष नेम्बाङं राजनीतिक सहमति जुइ थाकुयाच्वंगु इलय् थंज्याःगु दबाव मूलक ज्याझ्वः यानातुं च्वनेमाःगु खँय् बः बियादिसें जनजातितय् अधिकार सुनिश्चिताया निंतिं थःम्हं फ्क्वः कुतः यायेगु धयादिल ।

नेवाःतय्सं या:गु संविधानसभा भवन घेराउ ज्याझ्वलय् एक्यबद्धता प्वंकूसें नेपाल आदिवासी जनजाति संघ व संघीय परिषदं नं संविधानसभा घेराउ ज्याझ्वलय् ब्वति काःगु खः ।

मेमेगु आपालं किपाया लागि थन क्लिक यानादिसँ

More Stories Like this