माओवादीया कासा आः माओवादीलिसे हे

यदि अवसर वल धाःसा प्रधानमन्त्री सु जुइगु धकाः माओवादी दुने ब्वलनाच्वंगु विवादयात अझ चर्के यायेगु ताः तयाः प्रधानमन्त्री माधव नेपालं यदि पार्टी अध्यक्ष प्रचण्डया पलेसा मेपिं सुं मनूया नां बीगु खःसा थम्हं राजीनामा बी धइगु न्हूगु प्रस्ताव न्ह्यःने तयादीगु दु। गुगुं हालतय् नं राजीनामा बी मखु धया जूम्ह प्रम नेपालपाखें आः छगू विकल्प न्ह्यःने तयाः थः राजीनामा बीत नं तयार दु धइगु संकेत बियाहःगु निश्चय नं सकारात्मक खँ खः। तर वय्कलं तयादीगु थ्व प्रस्तावं माओवादीयात धाःसा लय्तायेकीगु स्वयां तंचायेकीगु सम्भावना यक्व दु। खतुं प्रम नेपालं थज्याःगु कासा म्हितेगु सयेकूगु ला स्वयम् माओवादीपाखें हे खः। निदँ न्ह्यः राष्ट्रपति चुनावया इलय् राष्ट्रपतिया उम्मेदवार कथं एमालें माधव नेपालया नां न्ह्यःने तःबलय् माओवादीं माधव नेपाल मखु मेम्ह मनूया नां बिल धाःसा थःपिंसं समर्थन याये धकाः प्रस्ताव यंकूगु खः। आः अज्याःगु हे प्रस्ताव माधव नेपालं माओवादीया न्ह्यःने तयादीगु दु। राजनीतियात यदि कासा दयेकाः म्हितल धाःसा अज्याःगु कासा कन्हय् मेपिंसं नं म्हितेफु धइगु छगू पाठ माओवादीयात थुकिं अवश्य नं बिउगु दयेमाः ।

आः गन तक प्रचण्ड बाहेक मेपिनिगु नां हजि धकाः प्रमं तयादीगु प्रस्ताव खः, थ्व वर्तमान राजनीतिक संकटयात निकास बीगु प्रस्ताव धाःसा मखु। थज्याःगु प्रस्तावयात गथे न्हापा एमालें थःपिनि आन्तरिक मामिलाय् याःगु हस्तक्षेप धकाः ब्याख्या याःगु खः आः माओवादीं नं अथे हे आन्तरिक मामिलाय् हस्तक्षेप तायेकाः मेम्ह मनूया नां मबीगु सम्भावना यक्व दु। थौंया ई निकास मालेगु नामय् अझ नं 'म्हिताच्वनेगु' ई धाःसा मखु ।

More Stories Like this