नेवाः सीपया श्रम

नेपाःया सेवा व उत्पादन क्षेत्रय् न्यनाच्वंगु श्रमिक व कर्मचारी समस्या व संस्थागत स्थिरताया समस्या समाधान यायेत गज्याःगु श्रम नीति आवश्यक दु धइगु खँयात कयाः नेपाः राष्ट्रिय पार्टीं थन छगू ग्यसुग्यंगु गोष्ठी यात ।

ज्याझ्वलय् पार्टीया मू दुजःपिं व उद्योगपति व्यवसायी, व्यापारी, संस्थानया कार्यकारी प्रमुख, सरकारी निकायया प्रमुख प्रतिनिधित लिसे अन्तर्क्रिया समेत जूगु खः। उगु अन्तर्क्रियाय् नेवाःतय्के न्हापांनिसें दुगु परम्परागत सीप व ज्ञानयात नं श्रमया रुपय् प्रयोग यानाः आय आर्जन यायेमाःगु विषयय् नं चर्चा जूगु खः ।

उगु अन्तर्क्रियाया स्रोत व्यक्ति उत्तम धाख्वाःपाखें निजी, गैरसरकारी व सरकारी सेवा व उत्पादन क्षेत्रय् विद्यमान कर्मचारी/श्रमिक व सञ्चालकपिनि दथुइ दुगु अन्तर्विरोधी सम्बन्ध (Antagonistic Relation) यात सहउर्जाय् (Synergy) रुपान्तरण यायेत सामञ्जस्यता (Harmaony) या सिद्धान्तय् श्रमनीति प्रतिपादन याये माःगु खँ ब्वःगु खः। अन्तर्क्रियाया झ्वलय् नेवाः उद्योगपतिपिं डा. हेरम्ब राजभण्डारी, लक्ष्मीदास मानन्धर व मोतिलाल शिल्पकार, संस्थानपाखें सुगतरत्न कंसाकार, सरकारी निकायपाखें डा. हिराकाजी मानन्धर लगायतया वक्तातय्सं कर्मचारी व श्रमिकतय्त पिनेया राजनैतिक पार्टीतय्सं परिचालन यानाच्वंगु कारणं सेवा व उत्पादन र्‍हास जुयाच्वंगु व संस्थानत अस्थिर व बन्द जुजुं वनाः देशया कुल गार्हस्थ उत्पादन म्हो जूगु खँ पिब्वःगु खः ।

नेपाः पार्टीया मू दुजःपिं विजय सैंजु, सुरेश प्रधान, कृष्णहरि महर्जन, पुष्परत्न शाक्य, मंगला कारंजितपिंसं नेवाः उद्योगपति, ब्यापारी, संस्थान व सरकारी निकायया उच्च पदाधिकारीपिंलिसे सहलह ब्याका च्वनेमाःगु खँ तलसा उद्योगपति अजय स्थापित, आर्थिक सल्लाहकार डा. रविन्द्र शाक्यं नेपाः पार्टीं राष्ट्रिय श्रम नीति दयेकाः न्ह्याः वनेमाःगु खँ प्वंकल ।

नेपाः पार्टीया न्वकु डा. रमेश श्रेष्ठं लसकुस यानाः न्ह्याकूगु अन्तर्क्रियाय् मेम्ह न्वकु नरेशवीर शाक्यं सुभाय् देछायेधुंकाः पार्टीया नायः डा. नरेशवीर शाक्यं नेवाः अर्थनीति, नेवाः सामाजिक रुपान्तरण, वैज्ञानिक भूमि सुधार बारे छुं छुं नीतित ज्याय् धुंकूगु व याकनं हे संघीय अर्थ व्यवस्था, जलस्रोत, संस्कृति, सुशासन व परराष्ट्र नीति बारे नं अन्तर्क्रिया गोष्ठी यायेगु खँ कनादिल।

More Stories Like this