सरकारं प्रतिकार याइगु
आन्दोलन बारे झिगू दललिसे सहलह / प्रमं सेना लिसे नं सहलह ब्याकल
येँ (सन्ध्या टाइम्स)/माओवादीं जेठ १८ गतेनिसें न्ह्याकेगु धकाः तयारी यानाच्वंगु आन्दोलनयात विफल यायेगु लागिं सरकार उकिया प्रतिकारय् कुहां वइगु जूगु दु। थुकिया लागिं सरकारं माःगु तयारी यानाच्वंगु दु ।
थ्व बारे सहलह यायेत थौं प्रधानमन्त्री माधव नेपालं सरकारय् दुथ्याःगु झिगू राजनीतिक पार्टीलिसे खँल्हाबल्हा यानाच्वंगु दु। थौं सुथय् प्रम निवास वालुवाटारय् झिगू दलया नेतातलिसे माओवादी आन्दोलनया प्रतिकार गय् यानाः यायेगु धइगु बारे सहलह यानादीगु खः ।
अथे हे वयां लिपा थौं हे प्रम नेपालं सरकार दुथ्याःगु थीथी दललिसे आवद्ध १३ गू युवा संगठनलिसे नं सहलह यानादीगु दु। माओवादी आन्दोलनयात प्रतिकार यायेगु लागिं हे युवा संगठनतलिसे हे उगु सहलह याःगु खः। लुमंकेबहः जू, एमालेलिसे आवद्ध युवा संघं छुं न्हि न्ह्यः तिनि नेपाली सेनाया जर्नेलतलिसे गोप्य रुपं वार्ता यानाः माओवादी आन्दोलन बारे सहलह ब्याकूगु खः ।
म्हिगः बहनी प्रधानमन्त्री माधव नेपालं नं सेनाया प्रधानसेनापति लगायत थीथी जर्नेलतलिसे सहलह ब्याकादीगु खः। उगु इलय् रक्षामन्त्री विद्या भण्डारी नं नापं दीगु खः। सेनां छुं न्हि न्ह्यः तिनि सम्पूर्ण सैनिकतय्त सतर्क जुया च्वँ धकाः परिपत्र छ्वःगु खः। माओवादी आन्दोलनयात कयाः सरकारं सेनालिसे खँल्हाबल्हा यानाच्वंगुलिं थुकियात मनूतय्सं रहस्यमय रुपं कया हःगु दु ।
उखे थौं प्रहरी व नेवि संघया विद्यार्थी दथुइ जुयाच्वंगु ल्वापु बाग बजाःया पद्मकन्या कलेजय् हानं तच्वःगु दु। थौं कलेजया पिने विद्यार्थी व प्रहरी दथुइ अप्पां कयेकाः ल्वापु जूगु खः ।
