'प्रचण्ड मखु,मेम्ह हजि'
राजीनामा मवःसा जेठ १८ लिपा नं संघर्ष
येँ (सन्ध्या टाइम्स)/प्रधानमन्त्री माधव नेपालं यदि माओवादीपाखें अध्यक्ष प्रचण्डया पलेसा मेम्ह हे सुं मनूया नां प्रधानमन्त्रीया रुपय् न्ह्यःने हल धाःसा थम्हं पदं राजीनामा बी फइगु खँ कनादीगु दु ।
थीथी ल्वापुइ लानाः घाःपाः जूपिं एमालेया कार्यकर्तातय्त थौं अस्पतालय् नापलानाः खँल्हाबल्हा यायेगु झ्वलय् प्रम नेपालं थ्व खँ धयादीगु खः ।
माओवादी अध्यक्ष प्रचण्डयाके तःथाय् तःगूमछि खँ धयाः नं उकियात पालना मयायेगु, न्ववायेबलय् स्थिरता मदुगु आदि समस्या दुगुलिं वय्कःया विकल्पय् मेम्ह नेतायात प्रधानमन्त्रीया रुपय् न्ह्यःने हयेमाःगु खँ नं प्रम नेपालं कनादिल ।
यदि सरकारय् वनेगु खःसा माओवादी सुध्रे जुयाः वयेमाः धासें आःया तुं अवस्थाय् माओवादीयात सरकार त्वःते फइ मखु धकाः नं वय्कलं धयादिल। माओवादी सुध्रे जुयाः उपयुक्त विकल्प पिहां वयेवं हे थम्हं राजीनामा बीगु खँ नं प्रम नेपालं धयादीगु खः ।
माओवादीं धाःसा थज्याःगु प्रस्ताव थःगु पार्टी दुने हानं प्रचण्ड व बाबुरामया विवाद पिकायेगु षडयन्त्र जक खः धइगु थुइकाः प्रचण्डयात हे प्रधानमन्त्री दयेकेगु निर्णय याना तयेधुंकूगु दु।
उखे माओवादीपाखें मजदूर दिवस कुन्हु तःधंगु प्रदर्शन यायेधुंकाः नं यदि वर्तमान सरकार विघटन यानाः राष्ट्रिय सरकार मदयेकल धाःसा बैशाख १८ गते लिपानिसें मदिक्क हे आम हड्ताल न्ह्याकेगु खँ धाःगु दु ।
माओवादीया नेतातय्त म्हिगः नागरिक आन्दोलनया न्ह्यलुवातय्सं नापलानाः सहलह ब्याकूगु इलय् नेतातय्सं उगु बिचाः प्वंकादीगु खँ लोकतन्त्र व शान्तिया निंतिं नागरिक आन्दोलनया न्ह्यलुवा श्याम श्रेष्ठं कनादीगु दु ।
सहलहया झ्वलय् माओवादी नेतातय्सं वर्तमान सरकार विघटन यानाः संयुक्त राष्ट्रिय सरकार दयेकेगु हे मू एजेण्डा कथं न्ह्यःने यंकाच्वंगु दु धकाः नं वय्कलं कनादिल।
अथे हे नेपाली कांग्रेसया नेतातलिसे खँ जूगु इलय् नं वहे सत्ता साझेदारीया खँय् हे दलतय् दथुइ सहमति मजुयाच्वंगु खँ न्ह्यथनेगु ज्या याःगुलिं आःया अवस्थाय् दलत सरकारया खँय् हे केन्द्रित जुयाच्वंगु दु धकाः नं नागरिक आन्दोलनया श्रेष्ठं कनादीगु दु। अथे हे नागरिक आन्दोलनया न्ह्यलुवातय्सं थौं नेकपा (एमाले)या नेतातय्त नापलाना सहलह ब्याकेत्यंगु दु ।
