राष्ट्रघाती विरुद्ध छप्पँ जुइ

डी.आर. खड्गी

यदि पासपोर्ट भारतय् छापे याकल धाःसा कट्टर मुस्मांतय्गु रेकर्ड दयेकाः 'एक्सन' कायेत स्वयाच्वनीगु जक मखु, राष्ट्रवादी नेपाःमितय्त नं भारतं 'एक्सन' कायेगु ज्या यानाच्वनी ।

सिक्किमया अन्तिम जुजु चोग्यालं प्रजातन्त्र व मानव अधिकार हनन यात धकाः जुजु विरुद्ध जनता सतकय् वल।
जुजुया स्वेच्छाचारी विरुद्ध संघर्षया नेतृत्व लेन्दुप दोर्जेया पार्टी व मेमेगु पार्टीत छप्पँ जुयाः यासें जुजुयात वांछ्वया बिल। जुजु चीका छ्वयेधुंकाः संविधानसभाया चुनाव घोषणा यानाः चुनाव नं पूवंकल। सिक्किमया चुनाव क्षेत्र ३२ गू दु। फुक्क थासय् शान्तिपूर्ण ढंगं संविधानसभाया प्रतिनिधित नं त्याना वल। संविधानसभाया बहुमत सभासदं लेन्दुप दोर्जेयात मुख्यमन्त्री दयेकल। छुं ला लिपा संविधानसभाया मुँज्यां संवैधानिक जुजुया रुपय् स्वीकार यायेमाः धकाः नं सहलह जूगु खः। आखिरय् जुजुयात हयेगु व महयेगु विषयय् सहलह यायेगु त्वःताः भारतनाप विलय यायेगुली मुख्य मन्त्री दोर्जें प्रस्ताव हयेसातकि अत्यधिक बहुमतं अर्थात ३२ मध्ये ३१ म्ह सभासदतय्सं सिक्किमयात भारतय् बिलय यायेगु प्रस्तावय् समर्थन यानाः सन् १९७५ पाखे भारतय् विलय जुल ।

सन् १९६२ स जूगु भारत-चीन युद्धय् भारत पराजित जुल। व इलंनिसें भारत सरकारया जासुसी संस्था 'र' यात सक्रिय यानाः जःलाखःला देशय् थःगु पकडय् कायेगु नीति ज्वंगु खः। भारतं सन् १९७१ य् पाकिस्तानपाखें बंगलादेश कुचा थलेगुली नं 'र' एजेण्टया तःधंगु भूमिका दुगु खः। बंगलादेश अलग जुइसातकि सिक्किमय् 'र' एजेण्ट सक्रिय जुयाः भारतय् विलय यायेत नं ताःलाःगु खः। थौंकन्हय् भारतया मिखा नेपालय् लानाच्वंगु कारण नं थःगु शक्ति सुदृढ यानाः चीनयात काउण्टर बीत खः। यदि भारत प्रजातन्त्र व मानव अधिकार पक्षधर खःसा भूटानय् प्रजातन्त्र व मानव अधिकार प्राप्त यायेगु निंतिं संघर्ष यानाच्वंपिंत ग्वाहालि यायेमाःगु खः। तर भारतं ग्वाहालि मयाःगु जक मखु प्रजातन्त्रवादीतय्त क्वत्येलेगु निंतिं सीमदयेक ग्वाहालि जकं यानाच्वंगु खनेदु। भारत भूटानया जुजुया पक्षय् वनाच्वंगुलिं झीसं अनुमान यायेफु कि चीनयात काउण्टर बीगु निंतिं भूटान, नेपाल अझ बंगलादेशयात नं थःगु ल्हातय् तयेगु कुतः यानाच्वंगु दु ।

२०६३ सालय् झीथाय् जूगु निक्वःगु जनआन्दोलनयात नं भारतं सक्रिय ग्वाहालि याःगु कारण नं नेपाःया प्रजातन्त्र व मानव अधिकारयात क्वातुकेगु लागिं मखु, थ्व देय्या नेतातय्त थःगु पाल्हातय् तयेगु नितिं खः। २०४६ सालया आन्दोलन स्वयां नं २०६३ सालया जनआन्दोलन लिपा नेपाःया देशभक्त व राष्ट्रवादी शक्ति कमजोर जुया वनाच्वंगुलिं विदेशी शक्ति हावी जुया वयाच्वंगु खः। विदेशी शक्ति भारतं फुक्क पार्टीया नेतातय्त थःगु मुठ्ठीइ तयाः नेपाःयात थःगु इच्छा कथं छ्यलेत स्वयाच्वंगु खः। २०६३ सालया सफल जनआन्दोलन लिपा विदेशीतय्त अःपुक नागरिकता बीकेगु निंतिं नेतातय्त दबाव बियाः नागरिकता विधेयक संसदं याउँक पास याकल। नागरिकता बिधेयक पास जुइसातकि विहारीत गांगामं दना वयाः चांचां नेपाःया नागरिकता कायेगु यानाच्वंगु दु। यदि थ्व ल्याः अप्वया तुं वनाच्वन धाःसा नेपाःमित अल्पमत् लाइगु निश्चित दु। पार्टीत जानाः विहारी मूलया मनूतय्त नागरिकता बीकाच्वंगु जक मखु, फुक्क पार्टीपाखें धमाधम अनुमोदन यायेगु नं यानाच्वंगुलिं थ्व संविधानसभाय् २०० म्ह विदेशी मूलया सभासद दुथ्यानाच्वंगु दु। २०० म्ह विदेशी मूलया सभासदत संसद भवनय् हल्लाखल्ला यानाः अधिकारया नामं पदय् च्वनाः देय्या धुकू लुटे यानाच्वंगु दु। विदेशी मूलया २१ गू प्रतिशत जनतां मन्त्रीमण्डलया उच्च पदया ४५ प्रतिशत भाग लाकाः मन्त्री जुइत ताःलानाच्वंगु नं भारतया दबाब नं खः। नेतात नं भारत भक्ति क्यनेगु नितिं नं मन्त्रीमण्डलय् विदेशी नेतात दुथ्याकातःगु खः। विदेशी शक्ति भारतया उजं कथं नेतात वनाच्वंगुया अर्थ खः, भविष्यय् वनाः सिक्किमीकरणया अवस्था जुइगु ।

अथेहे मेशिन रिडेबल पासपोर्ट भारतय् छापे याके बीमाः धकाः मधेशवादी नेतात खुल्ला रुपं न्ह्यःने वयाच्वंगु दु। छाय्धाःसा उमिगु दुनेया तातुना थन राजनीति यानाः नेपाःयात भज्यंक स्यंकेगु खः। तर विडम्बना नेपाली कांग्रेसया नेतृ सुजाता कोइराला नं भारतया पक्षय् वकालत यानाच्वंगु दु। जनतां थथे नं धायेगु यानाहल, न्हूम्ह लेन्दुप दोर्जेया थाय् कायेत स्वयाच्वंगुला मखुला धकाः। यदि नेतात देशभक्त खःसा द्वलंद्वः विगाहा जमीन त्यलाः कयातःगु, जग्गा क्वत्यलाः बँ दयेकाः नेपाःया भूमि डुबानय् लाकाच्वंगु, सीमा रक्षक दल धकाः भारतया एसएसबी नेपालय् दुहांवयाः ताण्डव नृत्य यानाच्वंगु थें जाःगु हस्तक्षेप व मिचाहा प्रवृत्तिया विरोध यायेमाः। छु थजाःगु ज्याया विरोध यानाः भारत विरोधी जुइला? देय्यात आँच लाइगु ज्या यानाच्वन नं नेतात सम्क च्वनाच्वंगु खनाः नेतात भारतया स्वार्थपूर्ति यायेगु नितिं जक ज्या यानाच्वंपिं खः ।

मेशिन रिडियबल पासपोर्ट भारतय् छापे यायेमाः धकाः भारतया राजदूत राकेश सूदं नेपाः सरकारयात दबाब बीगु झ्वलय् थथे स्पष्ट यात कि थ्व भारतया सुरक्षाया चासोया विषय खः। राजदूतं थथे नं धाल कि खुल्ला सिमानाया कारणं आतंकवादी नेपाः जुयाः स्वंगूगु देशय् वनाच्वंगु नं थुकियात पनेत नं पासपोर्ट भारतय् छापे याकेमाः। यदि पासपोर्ट भारतय् छापे याकल धाःसा कट्टर मुस्मांतय्गु रेकर्ड दयेकाः 'एक्सन' कायेत स्वयाच्वनीगु जक मखु, राष्ट्रवादी नेपाःमितय्त नं भारतं 'एक्सन' कायेगु ज्या यानाच्वनी। भूटानं भारतय् पासपोर्ट छापे मयाकुसे स्वंगूगु देशय् छापे याकल। स्वयम् भारतं नं न्हापा अष्ट्रेलियाय् पासपोर्ट छापे याकाःहइगु खः ।

थज्याःगु राष्ट्रघाती पासपोर्ट काण्डया विरुद्ध बामपन्थी पार्टी न्ह्यःने वःगु खनाः जनता उत्साहित जुयाच्वंगु दु। अझ माओवादी पार्टीं राष्ट्रघाती पासपोर्ट काण्डया खुल्ला रुपं न्ह्यःने वयाः सशक्त ढंगं विरोध यानाः खारेजी यायेत बाध्य याकेत ताःलाःगुलिं जनतां सुभाय् नं बियाच्वंगु दु ।

More Stories Like this