सतकं हे संविधान जारी यायेगु उद्घोष

इलय् संविधान जारी जुइगु वा मजुइगु धइगु विषयय् विवाद वयाच्वंगु इलय् लाक्क आः यदि इलय् संविधान मवल धाःसा सतकं जूसां संविधान जारी यायेगु जुइ धइगु खँ नं पिहां वःगु दु। प्रमुख प्रतिपक्षी माओवादीं सतकं संविधान जारी यायेगु थ्व ख्याच्वः बिउगु खः। माओवादीपाखें आन्दोलनया घोषणा जुइधुंकूगु कारणं आन्दोलनया हे झ्वलय् संविधान नं जारी यायेगु खँ पित हःगु खः। तर सतकं जारी याइगु थ्व संविधान माओवादीं दयेकातःगु संविधान मखुसें वर्तमान संविधानसभाया थीथी समितिं पारित याना तःगु संविधान सम्बन्धी प्रस्तावया लिधंसाय् हे दयेकातःगु संविधान जुइ धाःगुलिं उकियात स्वीकार यायेगु वा अस्वीकार यायेगु धइगु खँय् मेपिं राजनीतिक पार्टीतय्त धर्मसंकट जुइगु धाःसा निश्चित दु। खतुं संविधानसभाय् दुथ्याःगु थीथी राजनीतिक पार्टीतय्सं नं २०६२/६३ सालया आन्दोलनय् सतकय् हे संसद च्वनाः थीथी प्रस्तावत पारित याःगु खः। उकिं सतकपाखें जुइगु थज्याःगु घोषणायात थःपिंसं मान्यता बी मखु धायेबलय् व तप्यंक ज्ञानेन्द्र शैली जू वनीगु खतरा दु। अथे खःसां माओवादीपाखें यदि सतकं संविधान घोषणा यात धाःसा उकिं मेगु कथंया द्वन्द्व सिर्जना याना बीगु धाःसा निश्चित दु। बरु माओवादीं जेठ १४ गते सतकं जूसां संविधान जारी याये धाःगु थ्व अभिव्यक्तिपाखें जेठ १४ गते संविधान वइगु सम्भावना अझ नं दनि धइगु संकेत धाःसा बिउगु दु। अझ नं राजनीतिक पार्टीत सहमत जुल धाःसा संविधान वयेफुनि। यदि मवल धाःसा सतकं संविधान वयाः जक मखु संविधान हे मवयेकेगु षडयन्त्रं यानाः नं देशय् द्वन्द्व पिकाइगु धाःसा निश्चित दु ।

More Stories Like this