धाःधाःथाय् वनीगु ल्वाभः

युद्धया विरोध यानाः चुनाव त्याका वःम्ह अमेरिकी राष्ट्रपति बाराक ओबामां छगू थज्याःगु ल्वाभः दयेकेगु बारे सोचे यानाच्वंगु दु गुकिया ग्वाहालिं विश्वया न्ह्यागु हे देशय् नं अमेरिकां थःगु मिसाइल कुर्के फइ। अमेरिकाय् तुं च्वनाः विश्वया न्ह्यागु हे देशय् नं घौछिया दुने थःगु मिसाइल कुर्के फइगु थ्व अत्याधुनिक प्रविधि बारे थौंकन्हय् ह्वाइट हाउस दुने व्यापक चर्चा जुयाच्वंगु दु। अमेरिकाय् च्वनाः विश्वन्यंकं थःगु ल्वाभः कयेकेगु थ्व प्रविधिया नां खः - प्रम्प्ट ग्लोबल स्ट्राइक ।

थ्व छगू थज्याःगु प्रविधि खः यदि ओसामा बिन लादेन विश्वया गुगुं कुंचाय् सुलाच्वंगु दु धइगु पाय्छि जानकारी वल धाःसा वयात अनं हे ज्वने फइ, यदि उत्तर कोरियां गनं आणविक ल्वाभः सुुचुकातःगु दु धइगु सिल धाःसा वयात अमेरिकाय् हे च्वनाः जफत याये फइ, छुं जुयाः इरानं मिसाइल त्वःतीन धइगु खँ सिल धाःसा वयात त्वःते न्ह्यः हे ध्वस्त याये फइ ।

अमेरिकाय् च्वनाः विश्वया गुगु नं थासय् प्रहार याये फइगु थ्व ल्वाभः अतिकं संवेदनशील जुइगु खँ वैज्ञानिकतय्सं धाःगु दु। थ्व ल्वाभः पृथ्वीया वायु मण्डल जुयाः सः स्वयां नं तीव्र गतिं ब्वाँय् वनी। थुलि तीव्र गतिं ब्वाँय् वन धाःसा थुकिं हे तसकं क्वाःगु ताप उत्पन्न याइ। थ्व तापं यानाः ल्वाभः जायेका हःगु मिसाइल थः हे नाया वनीगु तकं खतरा दु। अय् जूगुलिं थ्व मिसाइलयात तसकं क्वाःगु सह याये फइगु विशेष कथंया धातुं हिनेमाःगु आवश्यकता दु ।

उलि जक मखु, तसकं बेगं ब्वाँय् वनीगु थ्व मिसाइल कर्पिनि देशया सर्गः च्वं नं ब्वये मालीगु जुइ। थःपिनि सर्गः च्वय् गुगुं नं देशया थज्याःगु मिसाइल ब्वाँय् जुइगु सुयां यइ मखु। मनूतय्सं मसियाः उकियात कुर्केगु धकाः लँ दथुं हे प्रहार याइगु नं उतिकं सम्भावना दु। थ्व खतरायात ध्यानय् तयाः अमेरिकाया थुगु सोच बारे जानकारी दयेवं हे रुसी राष्ट्रपतिं विरोध समेत यायेधुंकूगु दु ।

खतुं आःयात थुकिया कयाः खँ ति न्ह्यात। तर अमेरिकी रक्षा मन्त्रालय पेन्टागनं धाःसा यदि थ्व ल्वाभः द हे दयेकेगु धकाः सुरे जुल धाःसा सन् २०१५ तकया दुने थुकियात अमेरिकी राष्ट्रिय रक्षाया छगू अंग दयेके फइगु खँ धाःगु दु ।

यक्वसिया चिन्ता छु धायेबलय् थ्व ल्वाभलय् अमेरिकां मेमेगु सामान्य ल्वाभःया पलेसा आणविक ल्वाभः तयाः थ्व मिसाइल छ्वये फइ। यदि सामान्य ल्वाभः तयाः थ्व प्रविधि प्रयोग याये माल धाःसा थ्व अमेरिकां मेगु छगू थासय् थ्यनेत ४-५ घौनिसें कयाः ९६ घौ तक नं कायेफु। यदि थ्व ईयात चीहाकः यायेगु थ्व ज्या आणविक ल्वाभलं जक सम्भव याये फइ ।

खतुं थज्याःगु ल्वाभः दयेकेगु थ्व ग्वसाः बाराक ओबामां हे हःगु मखु। थ्व पुलांम्ह राष्ट्रपति जर्ज बुशया पालय् न्हापा हे पिहां वयाच्वने धुंकूगु खः। तर अबलय् थज्याः थज्याःगु हे थीथी समस्याया खँ पिहां वयेवं थुकियात ह्वाइट दुने हे जक सीमित यानाः अनं पित महल। तर थुगुसी धाःसा ओबामां थुकियात न्ह्यःने हे न्ह्याकेगु तयारी यानाच्वंगु दु ।

More Stories Like this