माओवादीया तालिम व सेनाया सतर्कता

नेपाली सेनां न्हूगु भर्ना कयाः शान्ति सम्झौताया उल्लंघन यानाच्वन धकाः खँ पिहां वयाच्वंगु हे इलय् उखे माओवादीं नं थः कार्यकर्तायात खुकुरी व कथि ल्वाकेगु तालिम बियाच्वन धइगु मेगु विवादया खँ सार्वजनिक जूगु दु। थ्व निगुलिं घटनां यानाः देय्या वर्तमान अवस्था हाकनं छक्वः तनावग्रस्त जूवंगु दु। संविधान जारी यायेगु धकाः बियातःगु जेठ १४ गतेया न्हि न्ह्यःने थ्यंकःलिसे देशय् थज्याःगु थीथी कथंया विवादास्पद ज्याखँत यानाः झन अन्यौल पिकायेगु कुतः जुयाच्वंगु बांलाःगु मजू। थ्वहे झ्वलय् आः नकतिनि हे सेनापाखें नं देय्या शान्ति प्रक्रिया अझ नं थातय् मलाःनि धासें सेनायात सतर्क अवस्थाय् च्वनाच्वँ धकाः सर्कुलर जारी याःगु समाचार पिहां वःगु दु। छखे नेपाली सेना थुकथं तयारी अवस्थाय् च्वनेगु व मेखे माओवादी कार्यकर्तात खुकुरी व कथि थेंज्याःगु हल्काः ल्वाभः ज्वनाः कस्से जुयाच्वनेगु थ्व अवस्थां देशयात आः हानं मेगु कथंया द्वन्द्वपाखे यंकीगु खतराया आभास बिउगु दु। राजनीतिक पार्टीतय्सं थ्व खतरायात म्हो यानाः सामन्यीकरणपाखे वनेमाःथाय् अःखतं सामान्य खँयात नं तःधं यानाः अनावश्यक तनाव सिर्जना यायेत स्वयाच्वंगु खनेदु। आः खने दयाच्वंगु थ्व दृश्यं जेठ १४ या न्हि नेपाःया लागिं अनिष्टया शुरुवात जुइगु जकं मखु ला धइगु संकेत नं बियाच्वंगु दु। वकुन्हु संविधान बीगु ज्या यदि याये मफुत धाःसा देशं तःधंगु हे द्वन्द्वया सामना याये मालीगु व नेपाःया छ्यनय् बिचाः मयाः कथंया मार क्वचिउँ वइगु ग्याःचिकु नं थुकिं यानाः ब्वलंगु दु। राजनीति दलय् बुद्धिमानीपूर्ण सुझबुझ थ्व इलय् अझ अप्वः आवश्यक जुयाच्वंगु दु ।

More Stories Like this