मच्वइगु जुल जेष्ठ १४ गते न्हूगु संविधान

२०६७ साल जेष्ठ १४ । न्हू नेपाःया निंतिं न्हूगु संविधान जारी यायेमाःगु छगू मूवंगु दु । थुगु दिं वयेत आः न्यावाः जक ल्यः दनि । निदँ न्ह्यः न्हूगु समावेसी संविधान च्वयेगु व आःया अन्तरिम संविधान विस्थापीत यायेगु प्रण नापं ल्ययावःपिं संविधानसभाया दुजःत मदिक्क सत्ताया जःखः चाःहिलाच्वंगुलिं नं जेष्ठ १४ लुमना इपिं दल हे झस्केजूगु दु ।

थौं तक संघीयता व शासन प्रणालीलय् मतएकता जूगु मदु । देश संविधान विहिन जुयावनाच्वंगु दु । दलत संविधानसभायात गफ यायेगु फल्चा कथं छ्यलावयाच्वंगु दु । सभासदतय्सं ब्यवस्थापिका संसद व समितिया मुँज्याय् गएल जुयाः पार्टी व दातृनिकायया ज्याझ्वलय् ई खर्च यायेगु ज्या अझं मत्वःतूनि । संविधान सभाया मुँज्याय् हाजिर जक जुयाः तलव-भत्ता पचेयाइपिं सभासदतय्सं थौं तक नं संविधान च्वयेगु ज्याय् मन क्वसायेकूगु खनेमदु । संसदया समितिइ मतभेद अथेहे नितिसा संवैधानीक समितियात ज्या हे मदु । संविधानसभा अन्तर्राष्ट्रिय महाशाखाया कथं निदँया इलय् थीथी दलया सीच्छ व खुइनिम्ह स्वयां अप्वः सभासद म्होतिं छकः विदेश वंगु दु । थुलि तक कि संसदीय दलयात जानकारी हे मब्यूसें एनजीओ आईएनजीओया ज्याय् विदेश भ्रमण याःपिनिगु धलः ताःहाकः । संविधान च्वयेमाःगु जिम्मेवारी ल्वःमंकाः छुं सभासदतय्सं ला थ्व ई तकया दुने झिक्वलं मल्याक विदेश भ्रमण यायेधुंकूगु दु ।

संविधानसभाया मुँज्याय् खनेमदइगु तर संविधानसभाया खर्चय् दच्छिइ झिगू पुचः विदेश वंगु दु । राज्य कोषया ढुकुटीं इमिसं छगू कोटी तका स्वयां अप्वः खर्च याःगु दु । गुलि नं भ्रमण जूगु दु फुक्कं संघियता व राज्यया शासकीय स्वरुप अध्यनया निितं धयातःगु दु । तर नं बिषयगत समितिया प्रतिवेदन संविधान सभाय् थ्यंकेगु निसें बाहेक सभासदतय्सं थ्व ई दथुइ संविधाले च्वयेगु ज्याय् सिंका तकं त्वथुगु मदु । संविधानसभा समिति व संसद मुँज्याय् आक्कल झुक्कल वनेगु भत्ता पचेयायेगु व छम्हेसिनं मेम्हेसिया खँ ल्हायेगु बाहेक थौं तक सभासदतय्सं छुं हे याःगु मदु । ई बिनावनेवं कांग्रेस व एमालेया नेतातय्सं अः वयाः लाज हे पचेयाना संविधानसभाया म्याद तनेगु वा मेगु चुनाव यायेगु खँ हयाः जनताया नाडी स्वयेगु कुतलय् लगेजूगु दु । आः राज्यकोषं संविधासभाया मासिक खर्च न्हय्गु कोटी तका स्वयां अप्वः दु । छगू चुनावया जनादेश अःखः निदँ तक ल्हाः प्वःचिना च्वनेगु अले म्याद फुइत्यंकाः हाकनं मेगु चुनाव यायेगु नेतातय्गु लाइन अप्वयावनेवं जनता तकं निराश जूगु दु । निर्वाचन आयोगया कथं ०६४ चैत २८ या संविधानसभा चुनावय् निगू अर्ब चय्छगू कोटी तका खर्च जूगु खः ।

संविधानसभां जक थुगु ई दुने न्हेप्यंगू कोटि नीगू लख झिद्वः तका खर्च यायधुंकूगु दु । संविधानसभाया बिनियोजित ध्यवा स्वयां थुगु खर्च निगू कोटि तकां अप्वः । आर्थिक दँ ०६६-०६७ या निंतिं न्हय्न्हय्गु कोटी स्वीगु लख तका जक बजेट पुयागुलिइ विना उपलव्धी थ्यंमथ्यं खुइस्वंगु कोटी तका खर्च जुइधुंकूगु दु । सभासदतय्सं तलव भत्ताया नामय् जक राज्यकोषं लय् स्वंगू कोटी न्हेगु लख तका कायेगु यानाच्वंगु दु । ज्या मयायेगु तर नारा लगेयाःगु भरय् लय् स्वंगू कोटी न्हेगु लख खर्च याकीपिं सभासदतय्गु म्याद तनेगु खःसा राज्यं हाकनं अर्बौं तका विना उपलव्धी खर्च यायेमाः । थ्व गल्ती यायेगु अधीकार संविधानसभा चुनावया जनादेश धाःसा मखु । बिचाः यायेमाःगु ई वःगु दु ।

More Stories Like this