सरकार हिलेगु औपचारिक प्रस्ताव

जनविद्रोह निस्तेज यायेत सरकार तयार: मन्त्री रिजाल

येँ (सन्ध्या टाइम्स)/थौं सनिलय् च्वनीगु उच्चस्तरीय राजनीतिक संयन्त्रया बैठकय् माओवादीं औपचारिक रुपं हे वर्तमान सरकार विघटनया प्रस्ताव यंकीगु जूगु दु ।

सहमतिया आधारय् जेष्ठ १४ गते हे न्हूगु संविधान जारी यायेत वर्तमान सरकार विघटन यायेमाःगु प्रस्ताव यंकेगु निर्णय माओवादीं याःगु खः ।

थौं संयन्त्रया बैठक च्वने न्ह्यः पार्टी सचिवालयया बैठक च्वनाः उगु प्रस्ताव यंकेगु निर्णय याःगु खः। स्ववाः न्ह्यवंनिसें दिनाच्वंगु संयन्त्रया बैठक थौं माओवादीं हे सःतूगु खः। संयन्त्रया बैठक आः स्वंगू पार्टी दथुइ पालंपाः सःतेगु सहमति जू कथं थौं माओवादीं सःतेत्यंगु खःसा थौंया बैठकया अध्यक्षता नं माओवादी अध्यक्ष प्रचण्डं हे यानादी।
थ्वहे झ्वलय् थःपिनि प्रस्तावयात कयाः सहलह ब्याकेगु निंतिं माओवादी अध्यक्ष प्रचण्डं एमाले अध्यक्ष झलनाथ खनालयात नापलानादीगु दु। अध्यक्ष प्रचण्डं उकुन्हु राजपाया अध्यक्ष सूर्यबहादुर थापायात नं नाप लानादीगु खः। थापालिसे नं प्रचण्डं सरकार परिवर्तनया हे खँ ल्हानादीगु खः ।

एमालें धाःसा थौंया संयन्त्र बैठकय् संविधान जारी यायेगु मिति थपे यायेगु प्रस्ताव हयेगु तयारी यानाच्वंगु दु। तर माओवादीं वर्तमान सरकार यथावत तयाः संविधान जारी यायेगु म्याद थप याये फइ मखु धायेधुंकूगु दु। उखे नेपाली कांग्रेसं धाःसा वर्तमान सरकारयात हे यथावत तयाः संविधान जारी यायेगु मिति थप यायेगु व यदि अथे मयायेगु खःसा हाकनं चुनावय् वनेगु धाःगु दु। स्वंगू पार्टीं स्वंगू हे कथंया अडान तयाच्वंगु इलय् थौं जुइगु संयन्त्रया मुँज्या महत्वपूर्ण जुइगु खँ धाःगु दु ।

थ्वहे झ्वलय् संस्कृति मन्त्री डा. मिनेन्द्र रिजालं माओवादीं जनविद्रोह यात धाःसा उकियात वर्तमान सरकारं निस्तेज याना बी धकाः ख्याच्वः बियादीगु दु। थौं सुथय् भैरहवाय् पत्रकारतलिसे खँल्हासें मन्त्री रिजालं थ्व ख्याच्वः बियादीगु खः ।

अमेरिकाया चिउताः
येँ (सन्ध्या टाइम्स)/प्रमुख प्रतिपक्षी माओवादीं आन्दोलनया तयारी याःगु बारे नेपाःया निंतिं अमेरिकी राजदूत स्कट एच. डेलिसीं चिउताः प्वंकादीगु दु। वय्कलं थौं सुथय् माओवादी ज्याकुथी अध्यक्ष प्रचण्डयात नापलासें उगु चिउताः प्वंकादीगु खः ।

सहलहया झ्वलय् माओवादीं थाय्थासय् यानाच्वंगु तालिमपाखें शान्ति प्रक्रियाय् पंगः ब्वलनेफु धकाः नं डेलिसीं खँ तयादीगु खः। उगु इलय् वय्कःपिनि दथुइ शान्ति प्रक्रिया नापं संविधान निर्माणया बारे नं खँ जूगु खः ।