संविधान मवःसा जनजातियात मार

संविधान इलय् मवइगु खँ बुलुहुँ प्रचारय् वयेवं देय्या आन्दोलनरत जनजातितय्सं नं थःपिनि सरोकार क्यना हःगु दु। संविधान जारी मयायेगु घोषणा राजनीतिक दलतय्सं गय् यानाः याइ धकाः आःयात जनजातित 'पिउ व स्व' धइगु रणनीति दयेकाः च्वनाच्वंगु दु। यदि राजनीतिक पार्टीतय्सं जनजातियात घात जुइ कथं संविधान जारी मयायेगु षडयन्त्र यात धाःसा उकिया विरुद्ध तःधंगु आन्दोलन यायेत तयार जुयाच्वनेमाः धइगु मनस्थिति नं जनजातितय्सं दयेकाच्वंगु दु ।

वास्तवय् न्हूगु नेपाःया न्हूगु संविधान मवइगु धायेसातकि दकलय् सतर्क जुइमाःगु सुं दुसा व आदिवासी जनजाति हे खः। छाय्धाःसां आः यदि संविधान मवल धाःसा उकिं दकलय् तःधंगु लिच्वः लाइपिं आदिवासी जनजाति हे खः। नेपाःया राज्य पुनर्संरचना जुइमाः धइगु माग हे जनजातियात अधिकारसम्पन्न यायेत न्ह्यःने वःगु खः। आदिवासी जनजातितय्सं दशकौं न्ह्यवंनिसें ल्ह्वना वयाच्वंगु मागयात संवोधन यायेत हे २०६२/६३ या आन्दोलन जूगु खःसा उकियात पूवंकेगु ज्या नं जूगु खः। उकिं छुं जुयाः न्हूगु संविधान मवइगु खँ जुल धाःसा सीकेमाः व तप्यंक हे आदिवासी जनजाति विरुद्ध यायेत्यंगु षडयन्त्र खः। उकिया विरोधय् दनेगु लागिं जनजातिं आवंनिसें हे तयारी याये हे माः। संविधान मवल धाःसा अधिकारपाखें बंचित जुइ मालीपिं जनजाति हे जूगु कारणं न्ह्याथे यानाः नं थःपिनि पक्षया संविधान पिकयां तुं त्वःतेत जनजातितय्सं माःथासं माक्व दवाव बी हे माः। जनजातिं आः बीगु दवाव हे अन्तिम दवाव बी। थुकी चुके जुल धाःसा व ऐतिहासिक गल्ती जुइ ।

More Stories Like this