बिसिउँ बिसिउँ जक वनाः न्यायेकीगु बिस्काः जात्रा

सु-कि

आः ला मखु, मेगु न्यय्दँ ति लिपा छगू थज्याःगु घटना जुइफु। घटना छु धायेबलय् अमेरिकाय् 'सेटल' जुइधुंकूम्ह सुं छम्ह नेवाःया कायमचा (वा म्ह्याय्मचा) थःगु कलेजया थेसिस यायेत नेपाः वल हं। आखिर थःगु देशया माया ला सुया मदइ हं ! थन वयाः छुकिया बारे थेसिस च्वये धकाः बिचाः याःबलय् वयात सुं छम्ह मनुखं ख्वपया बिस्काः जात्राया बारे थेसिस च्वःसां जिउ धकाः सुझाव बिल हं ।

थुकिया बारे वं थः ममी डेडीलिसे कन्सल्ट याःबलय् उपिं नं भेरी भेरी ह्याप्पी जुल। अले वं थुकी हे अध्ययन शुरु यात। निक्वः ति ख्वपय् थः हे वनाः बिस्काः जात्रा नं स्वल। थीथी थासय् न्यनेकने नं यात ।

प्राक्टिकल व थ्योरिकल अध्ययन लिपा वं बिस्काःया बारे थःगु थेसिस च्वयेगु शुरु यात। लाबला लिपा थेसिस च्वये नं सिधल। थेसिस बांलानाः हे मखा जुइ, अमेरिकाय् वयात मेरिट हे प्राप्त जुल। लिपा वं थःगु थेसिसयात सफूया हे रुपय् प्रकाशन यात। उगु सफुली बिस्काः जात्रायात छाय् बिस्काः धाल धइगु खण्डय् थथे च्वयातःगु जुयाच्वन - बिस्काः जात्रा छगू तसकं जोशपूर्ण जात्रा खः। थ्व जात्रा मुलतः वं वयात वं वयात अप्पां कयेकाः न्यायेकीगु जात्रा खः। जात्राय् अप्पां जक कयेकेबलय् मोनोटोनस खने दइ धकाः दथु दथुइ निगू रथ नं सालेगु याइ। जात्राया लागिं प्रशस्त अप्पा माः धकाः ख्वपय् प्रशस्त मात्राय् अप्पा भत्ता नं चायेकातःगु दु। थथे अप्पां कयेकीबलय् छले जुइत मनूत उखें थुखें व थुखें उखें बिसिउँ जुइमाः। गबलें क्वःने च्वंपिंसं थःने च्वंपिंत बिसिके छ्वइ, गबलें थःने च्वंपिंसं क्वःने च्वंपिंत बिसिके छ्वइ। थथे वं वयात बिसिकेगु, वं वयात बिसिकेगु ज्या यानाः न्यायेकीगु जात्रा जूगुलिं हे थ्व जात्राया नां 'बिसिकाः' जात्रा धाःगु खः। थ्वहे 'बिसिकाः' खँग्वः लिपा वनाः 'बिस्काः' जूगु खः। थौंकन्हय् थ्व जात्रायात बिस्काः जात्रा धाःसां पुलांपिं मनूतय्सं अझ नं बिसिकाः हे धायेगु याःनि।' (स्वयादिसँ, पिहां मवःनिगु उगु सफूया पेज २७, झ्वः २८।)

'ह्वाउ ! इट्स मार्बुलस !' सफू ब्वनेधुंकाः नारायणमान बिजुक्छेँया छय् भाजु जोनाथनमान बिजुक्छें आश्चर्य प्वंकल, 'बिस्काःया रियल मिनिङ्ग ला थ्व धकाःसा जुयाच्वन। ग्व, जिमि बाज्यापिंसं थज्याःगु खँ सिउगु हे मखु। सिउगु खःसा जिमित नं कना तइगु खः नि। न जिमि बाज्यां कन, न जिमि बानं कन। इडियट् बुरात !'

ब्वँमिपिं, धन्दा कयादीम्वाः। थ्व थौंया खँ मखु। मेगु न्यय्दँ लिपाया खँ खः। बरु अबलय् थज्याःगु थेसिस च्वयेत माःगु पूर्वाधार ला झीसं आः हे तयार याना थके माल मखु ला?

More Stories Like this