धाथें भयावह जुया वल राजधानी येँ देय्

वंगु शुक्रवाः शनिवाः येँया थीथी थासय् च्याःगु मिं आः आगलागीया दृष्टिकोणं नं येँदेय् असुरक्षित जूगु आभास बिउगु दु। छगू ला येँय्या छेँ तसकं दुने व गाडी तकं वने मछिंगु थासय् दयेकातःगु दु। उकिसनं थन अज्याःगु हे छुं दुर्घटना जुल धाःसा उद्धार यायेत धकाः तयातःगु दमकलया अवस्था नं थज्याःगु दु कि उकियात माःगु इलय् माःकथं प्रयोग तकं यायेगु स्थिति मदु। दमकल सेवाय् कर्मचारी अभाव व दमकलय् लःया अभावं यानाः थज्याःगु तःधंगु समस्या वयाच्वंगु खः ।

ताहाननिया छेँ मिं नःबलय् दमकलयाके लः तकं मदु। स्थानीय जनता व लः मीगु ट्यांकर हयाः तिनि मि स्याये फत। कन्हय् कुन्हु दमकलया न्ह्यःनेसं च्वंगु नेपाल बैंक मिं नःबलय् अन मि स्याः वनेत दमकल तकं मदु। शायद दुगु हे खःसां नं छ्वाकेत लः मदइगु खइ। थज्याःगु खतरां जाःगु राजधानीइ च्वनाः जनता म्वानाच्वंगु दु। राजधानी येँ देय् तसकं थित्तुंथीक छेँ दयाः नं आपालं जनता दुगु वस्ती खः। थज्याःगु थासय् चीधंगु जक दुर्घटना जुल धाःसां उकिं तःधंगु हे लिच्वः लायेफु धइगु खँ थ्व निगू दुर्घटनां क्यना बिल। भुखाय् आदि थेंज्याःगु दैवी प्रकोपया समस्या ला बिस्कं हे दनि ।

थुपिं समस्याया समाधान यायेगु सवालय् आः तक गुगुं नं राज्यसत्ताया ध्यान वंगु मदुनि। सरकारय् वइपिं मन्त्रीतय् ध्यान केवल थःथःगु जिल्लापाखे बजेट ब्वाकेगुली हे केन्द्रित जुयाच्वन। सत्ताया केन्द्रय् गबलें येँदेय् लाः वःगु मदुनि। वास्तवय् येँदेय्या थज्याःगु समस्या समाधान यायेगु लागिं हे थ्व देशय् संघीय व्यवस्थाया आवश्यकता जुयाच्वंगु खः ।

More Stories Like this