मिति लिछ्याःसा नेपाल बन्द

जनजातितपाखें दलतय्त निगू सर्त

येँ (सन्ध्या टाइम्स)/नेपाःया आदिवासी जनजातितय्गु मंकाः संगठन नेपाल आदिवासी जनजाति महासंघं न्हूगु संविधान जारी यायेगु ई थप यायेगु खःसा जेठ १४ गतेया दुने हे संविधानया मस्यौदा तयार यानाः जनताया छेँय् छेँय् थ्यंकेमाःगु नापं गबलय् तक न्हूगु संविधान जारी यायेगु खः उकिया तिथि घोषणा यायेमाःगु सर्त तःगु दु ।

उगु निगू सर्त पालना मयासे संविधान जारी यायेगु मिति लिछ्यायेगु घोषणा यात धाःसा घोषण याःकुन्हुनिसें हे नेपाल बन्द यायेगु ख्याच्वः जनजाति महासंघं बिउगु दु ।

नेपाल आदिवासी जनजाति महासंघया न्हूम्ह नायः राजकुमार लेखीं 'सन्ध्या टाइम्स'लिसे खँ ल्हासें थःगु नेतृत्वय् दुगु जनजाति महासंघया ग्वसालय् थौं छगू ज्याझ्वःया दथुइ थुगु खँ सार्वजनिक यायेगु जानकारी नं बियादिल ।

यक्व प्रदेश दंगु प्रदेश दयेकेमाः धइगु अवधारणा तयादीम्ह जनजाति महासंघया नवनिर्वाचित नायः राजकुमार लेखीं राज्य पुनर्संरचना यायेगु इलय् नेपाःया आदिवासी जनजातिया भावनायात वेवास्ता यात धाःसा आन्दोलन यायेगु बाहेक जनजातियाके मेगु विकल्प दइ मखु धकाः नं धयादिल ।

जनजातित 'पिउ व स्व'
येँ (सन्ध्या टाइम्स)/देय्या राजनीति तसकं तरल जुयाः मूमू स्वंगू राजनीतिक पार्टीत स्वखे स्वयाच्वंगुलिं आः दलतय्सं छु याइ धकाः नेपाःया आदिवासी जनजातित 'पिउ व स्व' नीतिइ च्वनाच्वंगु दु। निसःगुलिं मल्याक आदिवासी जनजातितय्गु थीथी कथंया खलः पुचः, पार्टीया जातीय मोर्चात दुथ्याःगु आदिवासी जनजाति वृहत् मोर्चा नेपाःया छ्याञ्जे डा. कृष्णबहादुर भट्टचनं 'सन्ध्या टाइम्स' लिसे खँल्हासें आः दलत गुगु कथं वनी उकिया आधारय् जक थःपिं न्ह्याः वनेगु जुइ धयादिसें उकिया निंतिं वइगु १७ गते मोर्चाया मुँज्या च्वनेत्यनागु जानकारी बियादिल। दलतय्सं आदिवासी जनजातिया सवालयात गुगु कथं कयाः छु पार्टी न्ह्याः वनी अले आदिवासी जनजातिया भावना कथं राज्य पुनर्संरचनाया अवधारणा हइ कि महइ वहे स्वयाः जक थःपिनिगु हक अधिकारया निंतिं नेपाःया आदिवासी जनजातित आन्दोलनय् कुहां वनी धकाः नं वय्कलं धयादिल। अथे हे राजनीतिक पार्टीया जातीय संगठनतय्गु मंकाः मोर्चाया नं मोर्चा आदिवासी जनजाति वृहत् संयुक्त मोर्चाया छ्याञ्जे कुमार योन्जनं थःपिं नं आः 'पिउ व स्व' नीतिइ दु धयादीगु दु ।