संकटय् लात नागरिक आन्दोलन
येँ (सन्ध्या टाइम्स)/२०६२/६३ या जनआन्दोलनय् तःधंगु भूमिका म्हितूगु डा. देवेन्द्रराज पाण्डेया नेतृत्वय् दुगु लोकतन्त्र व शान्तिया नितिं नागरिक आन्दोलन आः वयाः संकटय् लाःगु दु ।
क्वःछिनातःगु इलय् हे संविधान जारी यायेमाः धकाः माग यानाः दबाव बीगु ला कि मबीगु धइगु खँय् आन्दोलनया नेतृत्वपंक्तिया दथुइ मतभेद जूगुलिं अथे आन्दोलन हे संकटय् लाःगु खः। वंगु छुं दिं न्ह्यः तक नं संविधान जारी यायेमाः धकाः माग यानाः संविधानसभा घेराउ यानाच्वंगु उगु आन्दोलनं लिपा वयाः छुं नं कथंया ज्याझ्वः यायेमजिउनि धकाः क्वःछिउगुलिं हे संकटय् लाःगु खः ।
नागरिक आन्दोलनया न्ह्यलुवा श्याम श्रेष्ठं 'सन्ध्या टाइम्स' लिसे खँ ल्हासें इलं मलाये धुंकूगु अवस्थाय् क्वःछिनातःगु इलय् हे संविधान जारी यायेमाः धकाः नं धाये मफुगु अले संविधानसभाया म्याद थप यायेमाः धकाः धाल धाःसा संविधान दयेकेगु ज्या लिबाकाच्वंपिं नेतातय्त ज्याछिनीगु जुयाः व नं धायेमफुगुलिं समस्या ब्वलंगु खः धकाः धयादिल। अय्नं थः धाःसा उच्चस्तरीय राजनीतिक संयन्त्रया मुँज्या सःताः गबलय् तक दलया नेतात सहमतिइ वइमखु अबलय् तक निरन्तर रुपं घेराउ यायेगु ज्याझ्वः पितबीमाः धयागु पक्षय् दु धकाः नं धयादिल। तर आन्दोलनया नेतृत्व पक्ष थम्हं धइथे मदुगु खँ नं वय्कलं स्पष्ट यानादिल ।
