सेना समायोजनय् सरकारया प्रस्ताव

सेना समायोजनया लागिं सरकारपाखें छगू प्रस्ताव न्ह्यःने हःगु दु। उकी माओवादी लडाकुया स्वद्वःम्हेसित नेपाली सेनाय् समायोजन यायेगु ग्वसाः दुथ्याः। यद्यपि माओवादीं थ्व प्रस्तावयात अस्वीकार यायेधुंकूगु दु। सरकारं धाःसा माओवादी उपस्थित मजूगु छगू बैठकय् थ्व प्रस्ताव न्ह्यःने तःगु खः। माओवादीं थुकियात अस्वीकार यायेधुंकूगु कारणं सरकारपाखें वःगु थ्व प्रस्तावया औचित्य मदया बिउगु दु ।

अथे खःसां सरकारं अनेक विवादया दथुइ जूसां स्वद्वः लडाकुयात सेनाय् समायोजन यायेगु धकाः औपचारिक प्रस्ताव तःगु दु, थुकियात सकारात्मक हे धाये माली। माओवादी लडाकुयात सेनाय् समायोजन यायेगु वा मयायेगु धकाः अनेक विवाद वयाच्वंगु दु। थुकी सेनाया धापू छगूसा रक्षा मन्त्रीया धापू मेगु जुयाच्वंगु दु। थज्याःगु अन्यौल अवस्थाय् सरकारपाखें थुलि प्रस्ताव तःगु सकारात्मक खँ खः। तर थ्व प्रयाप्त धाःसा मखु। थौंकन्हय् १९,००० लडाकु दु धकाः ला अनमिनं हे प्रमाणित याना तःगु दु। थुकियात सरकारं नं स्वीकार यायेधुंकल। प्रमाणित याःगु इलय् स्वीकार याःपिं लडाकुयात आः थुलि जक काये उलि काये मखु धायेगु पाय्छि जुइ मखु। बाँकीयात छेँय् हुँ वा यःयःथे धा धकाः त्वःता छ्वयेगु बुद्धिमानी जुइ मखु। थ्व लडाकुत यदि अलपत्र जुल धाःसा थुपिंपाखें कन्हय् मेगु समस्या पिहां वइगु खँयात राज्य सत्तां बिचाः यायेमाः ।

फुक्कं लडाकुयात सेनाय् समायोजन यायेगु सम्भव मदुसा मेगु छु सुरक्षा बल दयेकाः परिचालन यायेगु खः उकिया खाका नं सरकारं तयार यानाः न्ह्यःने तया बिउगु अझ बांलाइ।
ल्वाभः ज्वनेधुंकूपिं मनूत बारे याइगु निर्णययात सरकारं थः कार्यकर्ताया बारे याइगु निर्णय थे हलुका रुपं मकाःसा हे सकस्यां कल्याण जुइ ।

More Stories Like this