कलात्मक कुमारी चोकया जीर्णोद्धार

ख्वपया कुमारी चोकयात विश्वया हे दकलय् उत्कृष्ट वास्तुकलाया नमूना धाःसां पाइ मखु। छक्वः अन दुने दुस्वये धुंकूपिं थज्याःगु नं मानव निर्मित कला दु खनिं धकाः चकित जुइ माली। थज्याःगु वास्तुकलाया अद्वितीय नमूना धाःसा थौं स्वयां न्यासःदँ न्ह्यः जुजु जगर्ज्योति मल्लया पालय् निर्माण जूगु खः। उकियात ख्वपया लिपांम्ह मल्ल जुजु जितामित्र मल्लं थौं स्वयां स्वसःदँ न्ह्यः नेपाल संवत् ८०८ य् जीर्णोद्धार यानाः थौंया न्हूगु रुपय् हया बिल ।

धाथें हे जगर्ज्याति मल्लं नेपाल संवत ७५२ पाखे थुगु कुमारी चोक निर्माण याःगु इलय् उलिं ग्यंगु मखयेफु। तर भूपतीन्द्र मल्लं ९९ चोकया निर्माण लिपा दकलय् कलात्मक व महत्व बियाः दयेकूगु जुयाः थौं कुमारी चोक संसारय् हे न्ह्यथनेबहगु वास्तुकलाया नमूना जुयाच्वंगु दु। स्वसःदँ पुलां जुइधुंकूगुलिं थज्याःगु अद्वितीय नमूना कुमारी चोकया थीथी भवनय् वा ज्वया वयेगु क्रम शुरु जूगु दु। उकिं यानाः वंगु निदँत्या न्ह्यवंनिसें थ्व भवनया जीर्णोद्धारया ज्या शुरु जूगु खः। छगू भवनया जीर्णोद्धार ज्या पूवने नं धुंकूगु दु ।

कुमारी छेँ कथं कयातःगु उगु थासय् कुमारीयात धाःसा मोहनिबलय् जक प्रवेश याकी। मेमेबलय् अन न्हियान्हिथं पूजा याइम्ह पुजारी बाहेक सुयातं दुत छ्वइ मखु। तलेजु गुथिया मूल नाइके नरेन्द्रप्रसाद जोशीं 'सन्ध्या टाइम्स' नापं खँ ल्हासें दशैं घर नं धाइगु थुगु कुमारी छेँ व कुमारी चोक थेंज्याःगु भव्य व अति कलात्मक थाय्बाय् विश्वय् शायद हे जक गनं दइ धयादी। दकलय् अप्वः जीर्ण जूवंगु कुमारी छेँया दक्षिणपाखेया ब्वय् अति चित्ताकर्षक झ्याःत निर्माण जुयाच्वंगु दु, उकियात हे पुरातत्व विभाग व ख्वप नगरपालिकां निदँ न्ह्यवंनिसें जीर्णोद्धार न्ह्याकूगु खः। विश्व प्रसिद्ध लुँझ्यालं दुहां वनाः बेक्वः चोक, मू चोक जुनाः थुगु कुमारी चोक वनेमाः ।

विश्वया हे उत्कृष्ट नमूना जुयाच्वंगु थज्याःगु भवन दुने छुं ई न्ह्यवंनिसें चिकंलापां बास याना वयाच्वंगु दु। अन चान्हय् जुइवं द्वलंद्वः चिकंलापा दुहां वनी। न्हिनय् उपिं अन दुने सुम्क च्वनाच्वनी। कुमारी चोक नापं च्वंगु मूल चोकया दक्षिण पश्चिम कुनय् च्वंगु भवन ल्ह्वनेगु ज्या नं आः जुयाच्वंगु दु। उकिया लागिं ख्वप नगरपालिका सम्पदा शाखाया प्रमुख इन्जिनियर कृष्णगोपाल प्रजापतिया नेतृत्वय् प्राविधिक पुचः खटे जुयाच्वंगु दु। भवन न्हापा गथे खः अथे हे यानाः दयेकेमाःगु जुयाः उकिया रुप रंग स्यनी धकाः ग्यायेमाःगु खः ।

महानवमि कुन्हु श्री एकान्त कुमारीया भव्य पूजा जुइगु जुयाः उगु चोकयात दशैं घर नं धाः। अन कुमारी विराजमान याये धुंकाःलि मेमेगु ज्या न्ह्याकी। अन दुने ल्वहँया देगः, हिति, बैठक क्वथा नापं फुक्कं अतिकं कलात्मक ढंगं निर्माण जुयाच्वंगु दु। पञ्चमुखी हनुमान, भगवतीया मूर्ति वा मेमेगु फुक्कं चीज नापं भित्ते चित्र नं उलि हे चित्ताकर्षक जुयाच्वंगु दु। सलंसःया ल्याखय् दुगु कलात्मक झ्याः, ब्वने व स्वये थाकुइ धुंकूगु भित्ते चित्र अनया अमूल्य सम्पदा खः ।

मल्लकालीन भवन खःसां अन दुने थीथी रंग रुपया बुट्टा धाःसा प्राचीन खनेदु। शुरुं ८० द्वः दां ख्वप नपां व मेगु थप १ लाख ३१ द्वः दां तयाः थ्व ज्या यायेत्यंगु दु। न्हूगु ज्याया लागिं नरेन्द्रप्रसाद जोशीया संयोजकत्वय् तलेजु भवानी आगम मर्मत उपभोक्ता समिति नीस्वंगु दु। थुलि भव्य भवनयात आः न्हापा गथे खः अथे हे तःजिक निर्माण यानाः हानं छक्वः विश्वया न्ह्यःने झीगु सम्पदा ब्वइ धकाः सकस्यां आशाकुति जुयाः स्वयाच्वंगु दु ।

More Stories Like this