'माओवादीयात क्वःथलेगु कुतः'
प्रतिरक्षया निंतिं माओवादीया व्यापक तयारी
येँ (सन्ध्या टाइम्स)/हिन्दु राज्यया माग यानाः संघीयताया विरोध यानावयाच्वंपिंसं प्रमुख प्रतिपक्ष एकिकृत नेकपा (माओवादी)यात क्वःथलाः न्हूगु हे कथंया राजनीतिक संरचना हयेगु कुतः यानाच्वंगु ठहर यानाः माओवादीपाखें उकिया प्रतिरक्षाया नितिं व्यापक तयारी याःगु दु ।
माओवादीया छम्ह पोलिटब्यूरोया दुजलं 'सन्ध्या टाइम्स'यात जानकारी बियादी कथं पुलांम्ह जुजु ज्ञानेन्द्रंनिसें राप्रपा नेपालया नेता कमल थापां तकं हिन्दु राज्य व संघीयताया विरोध यानाः माओवादीयात क्वःथलेत न्ह्याः वःगुलिं आः थुपिं माओवादी जक मखु संघीयता व धर्मनिरपेक्षताया पक्षधरतय्त तकं ज्यामछिंकीगु कथं न्ह्याः वःगु ठहर यानाः माओवादीं नं प्रतिरक्षाया तयारी याःगु खः।
जनआन्दोलन व जनयुद्धया इलय् नेपाःमि जनतां माग याःगु जाति, क्षेत्र व भाषाया आधारय् प्रदेश दयेकाः संघीय संरचनाय् वनेगु नापं गणतन्त्रयात संस्थागत यायेगु निंतिं माओवादीं माःगु कथं तयारी यानाच्वंगु दु धकाः नं धाःगु दु।
'प्रतिगामी'त थ्व इलय् सक्रिय जुया वयाच्वंगुलिं माओवादीं न्हापा तयारी याः कथं निगूगु धक्का बीगु ज्या बैशाख १८ गते खःसां आः आन्दोलनयात न्ह्यकयाः बैशाख १० गतेनिसें हे न्हियान्हिथं सतकय् प्रदर्शन यानावनेगु तयारी जुयाच्वंगु दु धकाः नं माओवादीया नेतातय्सं धाःगु दु ।
माओवादीं आः शान्ति, संविधान व संयुक्त राष्ट्रिय सरकारया मुद्दा यात ज्वनाः जनतायाथाय् वनेगु नापं आन्दोलन तच्वयेका यंकेगु तयारी याःगु दु ।
प्रतिगामीतय्सं आः नं संविधानसभायात भंग यानाः सैनिक शासन लागू याकेगु कुतः यानाच्वंगुलिं प्रतिरक्षाया नितिं माःगु कथं तयारी यायेगु झ्वलय् कार्यकर्तातय्त प्रशिक्षण बीगु नापं आवंलि संविधान इलय् हे जारी यायेमाःगु मुद्दायात कयाः सुनानं प्रदर्शन यात धाःसां उकियात समर्थन यानाः माःगु कथं ग्वहालि यानावनेगु रणनीति पार्टीं दयेकूगु दु धकाः नं जानकारी बिउगु दु। थीथी पार्टीया नेतातय्सं क्वःछिनातःगु इलय् संविधान दयेके फइमखु धकाः धाइगुयात तप्यंक हे विरोध यानावनेगु नं माओवादीं क्वःछिउगु दु ।
