राष्ट्रिय शाक्य समाज अधिवेशन: छपुलु

डा. केशवमान शाक्य

*द्वःछि दां ल्हापं कयाः शाक्य संगठनया नामय् पाँच तारे होटलय् पारिवारिक पिकनिक यायेगु परम्परां पिहां वयाः जा, केँ, तरकारी, अचारया तसकं सादा भोजन नयाः झितका दां जक ल्हापं पुलाः थ्व अधिवेशन (सम्मेलन) सुथां लाःगु जुल ।

न्ह्यखँ:
शाक्य कुलय् बूगु ल्याखं २१ औं शताब्दीया नेपाःया शाक्य समाजया न्हापांगु राष्ट्रिय अधिवेशनय् ब्वति कायेगु थःगु कर्तब्य भाःपाः २०६६ चैत्र २७ व २८ गते निन्हुयंक मेमेगु दक्व ज्याखँ त्वःताः म्हंमफुगु तकं ल्वःमंकाः पूवंक ब्वति कया। नेपाःया थीथी जिल्लां उत्साहपूर्वक बिज्याःपिं ३०० म्ह प्रतिनिधित अन सहभागी जूगुली पेशाया कथं सफल व्यापारी, उद्योगपति, उच्च ओहोदाय् थ्यंपिं सरकारी पदाधिकारी, राजनैतिक नेता, बरिष्ठ डाक्टर, इन्जिनियर, प्राध्यापक, समाजसेवी, विद्वान, धर्मगुरुपिं दुथ्याःगु खनेदत। थ्व शाक्यतय् छगू अभूतपूर्व सम्मेलन क्वचाःगु जुल।
खय्तला थ्व भेलायात अधिवेशन धायेगु स्वयां नं सम्मेलन धायेगु उपयुक्त जुइ। अधिवेशनया दक्व अंगत पूवंसां थ्व सम्मेलनया कथं जक ताःलाःगु खनेदत। विधानया बारे सहलह जूसां पारित यायेगु एजेण्डा मदुगुया नापं स्वंगू पुचःया कार्यशालाय् नं शाक्य समाजयात न्ह्याकेत तसकं महत्वपूर्ण विषयस सहलह जूसां निर्णयत पास यायेगु एजेण्डा मदुगु जुल। छुं नं प्रस्तावत हथासं पारित यानाः लागू याये मफइगु परिस्थितियात ध्यानय् तयाः अन सहलह जूगु विषयवस्तुयात शाक्यतय्गु छेँखा छेँखापतिं सहलह ब्याकाः जक शाक्य समाजया स्वशासनया खाका तयार यायेगु खँ बुद्धिमतापूर्ण जू। अन सहलह जूगु विषयवस्तुत छगू एकिकृत दस्तावेज कथं दयेकाः पारित जुल धाःसा शाक्यतय्गु स्वशासनया कानूनी आधार तयार जुइफु। गथे भारतय् मुस्मांतय्गु पर्सनल ल (Muslim Personal Law) दु अथेहे शाक्यतय्गु नं पर्सनल ल (Shakya Personal Law) तयार जुइफु। अन सम्मेलनय् छपुचः शाक्यतय्सं पूर्वाग्रह तयाः ब्वति मकाःगु खँ धाःसा वसपोलपिंके हीनताबोध व बडप्पनया अभिव्यक्ति जूगु तायेकल। थ्व दुःखया खँ खः ।

मूखँ:
सम्मेलनय् सहलह जूगु छुं छुं बुँदात थन न्ह्यब्वये -
१) पहिचानमूलक उलेज्या - थुगु सम्मेलनय् उलेज्या मौलिक व गौरवमय ढंगं जुल। दकलय् न्हापां शाक्य समाजया पहिचानयात परिभाषित यायेकथं प्यपु ध्वाँय्या झण्डोत्तोलन जुल। शाक्य जुइत विहारय् प्रबजित जुइमाःगु मान्यता कथं प्रबजित शाक्यया लू दुगु शाक्य समाजया ध्वाँय्, शाक्यत धइपिं नेवाः जाति खः धइगु प्रतीक कथं नेवाः स्वायत्त राज्य मंकाः संघर्ष समितिं पित बिउगु नेवाः राज्यया ध्वाँय्, शाक्यत धइपिं बौद्ध खः धइगु कथं पञ्चरश्मी बौद्ध ध्वाँय्, अले शाक्य समाजया दुजःत नेपाःमि खः धइगु ल्याखं नेपाःया राष्ट्रिय ध्वाँय् ब्वयेकाः शाक्यतय्गु म्हसीका अनुमोदन याःगु जुल। अनंलि मेमेगु उलेज्या समारोहस प्रयोजन जुइकथं गणेद्यः दुगु त्वाःदेवा/सुकुन्दा मच्याकुसे सप्ततिंस बोधिपाक्षिय धर्मया प्रतीक स्वीन्हय्प्वाः देवा दुगु प्रकाश वृक्ष (जःया बोधिवृक्ष) थीथी जिल्लां वःपिं प्रतिनिधिपिंसं प्रज्वलित याःगु जुल। अनंलि स्वनिगःया दकलय् ज्याथःपिं १०१ दँया ख्वपया छलकुमारी व ९६ दँया येँया भाजुरत्नपिंत सम्मान यायेधुंकाः वसपालेपिनिगु ल्हातिं राष्ट्रिय शाक्य समाजया अधिवेशनया ब्यानर उलेज्या जुल। थुकथं मूपाहाँया बन्देज मुक्त जुयाः सम्मेलनया मौलिक उलेज्या जूगु जुल ।

२) प्रेरणामूलक प्रवचन - शाक्यतय्सं आत्मसात यायेमाःगु आदर्श बारे निम्ह अनुकरणीय ब्यक्तित्वपिंपाखें प्रेरणामूलक प्रबचन जुल। शाक्यत अप्वः धइथें व्यापार व उद्योगया पेशा ज्यानाच्वंपिं जूगुलिं छम्ह सफल व्यापारी व उद्योगपति कर्ण शाक्यपाखें आत्मनिर्भरताया बारे प्रबचन जुल। कर्ण शाक्य छम्ह सफल पेशापति जक मखु, वसपोल छम्ह प्रेरणा साहित्यया दकलय् लोकप्रिय च्वमि नं खः। सकारात्मक सोचया च्वमि कर्ण शाक्यया 'सोच' सफू २८ गू संस्करण बिक्री जुइ धुंकूगु दु। मनुखं मेहनत यात धाःसा अवश्य सफल जुइ धइगु बारे थःगु अनुभव कनेगु नापं शाक्यतय्सं न्ह्याक्व हे दुःख जूसां फ्वना मनः व पौरखी खः धइगु खँ लुमंकाबिल। अथेहे मेम्ह वक्ता खः शाक्यकुलं थेरवादी भिक्षु जुयाबिज्याःम्ह बौद्ध विद्वान भिक्षु ञाणपूर्णिक महास्थविर। वसपोलपाखें धर्म व न्याय विषय प्रवचन बियाबिज्यासें शाक्य समुदायं राष्ट्र/अन्तर्राष्ट्रय् योगदान बिउगु खँ लुमंकाबिज्यात। थौं नेपाः देशय् बांलाःपिं नेतात मदुगुलिं धर्म व न्याय क्षेत्रय् ह्रास जुयाच्वंगु जुल। देश व समाज च्वन्ह्याकेत नेतापिंके दयेमाःगु १० गू राजधर्मया व्याख्या यानाबिज्यासें शाक्य नेतृत्व वर्गं थुगु धर्म पालन यायेमाःगु खँ कनाः शाक्य समाज न्ह्याः वनेत हःपाः बियाबिज्यात ।

३) प्यंगू विषय समूहगत सहलह - समूहगत सहलहया प्यंगू विषयत खः। क) शाक्यपिंसं हनेमाःगु परम्परागत संस्कार पद्धतिइ सुधार, ख) शाक्यपिनिगु पूजाआजाय् सुधार, ग) पेशागत अभिवृद्धि व घ) समाजया उद्देश्य, लक्ष व विधान। मचा प्वाथय् दुसांनिसें दिवंगत जुइधुंकाः तक याना वयाच्वंगु परम्परा व संस्कारय् थौंया ई ब्यःयात ल्वयेक वैज्ञानिकता व व्यवहारिकतायात ध्यानय् तयाः आपालं सुधार यायेमाःगु खँ पिहां वल। नखःचखः, गुथिगाना, पूजाआजाय् अय्लाः, थ्वँ, लाया अनावश्यक उपभोग व बौद्ध धर्मया प्रतिकूल कथं न्ह्यानाच्वंगु शक्ति व तान्त्रिक पूजा विधिइ व्यापक सुधार हयेमाःगु व बौद्ध ब्राम्हणवादं मुक्त जुइमाःगु खँ पिहां वल। पेशागत अभिवृद्धि व आर्थिक समृद्धिया खँय् सहकारिता, ल्याय्म्हपिन्त शिक्षा व पेशागत तालिम लिसें उद्योग, वाणिज्य व बैंकिंगय् पहुँच व क्षमता बृद्धि यायेमाःगु खँ पिहां वल। अले समाजयात सनांगुथिया बाबांलाःगु पक्षत गथेकि अनुशासन, शिष्टाचार, कार्य विभाजन, जिम्मेदारी, सपथग्रहण, जवाफदेहिता, सहभागिता, पारदर्शिता, प्रणाली, मिसा मिजंया सम्मानजनक भूमिका व थाय्, पचिंम्हिचाया व्यवस्थापन, आत्मनिर्भरता थेंज्याःगु पक्षत नाला कायेगु नापं आधुनिक व लोकतान्त्रिक संगठनात्मक स्वरुपयात नं ल्वाक्यानाः उद्देश्य व लक्ष प्राप्त यायां समाज न्ह्याकेमाःगु खँ वल। थुकथं थुपिं प्यंगू विषयगत सहलह भविष्यय् शाक्य समुदाययात गुकथं न्ह्याकेगु धइगु मार्ग निर्देशनया खाका तयार यायेगु प्रारम्भिक ज्या जूगु जुल ।

४) जिल्लाया शाक्यतय्गु प्रतिवेदन - राष्ट्रिय शाक्य समाज स्वनिगःया शाक्यतय्त जक मखु, नेपाःया थीथी जिल्लाय् च्वंपिंत नं महत्वपूर्ण जूगु खँ जिल्ला जिल्लां बिज्याःपिं प्रतिनिधिपिनिगु प्रतिवेदनं क्यन। अझ जिल्लाया प्रतिवेदनय् ला शाक्यतय्सं संस्कार, समाज सुधार व पेशा अभिवृद्धिया नापनापं राजनैतिक विकासय् नं ध्यान बीमाःगु खँ तल। गथेकि सुनसरीया प्रतिनिधि पूर्णकाजी शाक्यया प्रतिवेदनय् थुकथं च्वयातल, 'संविधान सभाको चुनावमा... समानुपातिकमा आफ्नो भोट नेपाः राष्ट्रिय पार्टीलाई एक भोट दिनुहोस् भनेर प्रचार गर्‍यौं, किनभने संविधानसभामा नेवारहरुको आफ्नो पहिचान र भविष्यबारे नेवारको प्रतिनिधिले मात्र कुरा राख्न सक्दछ, अरु सभासदहरुले वास्ता गर्ने छैन।' नापं नेवाः देय् दबू थेंजाःगु नेवाःतय्गु राष्ट्रिय संगठनं कुंखिनेगु व बेवास्ता यायेगु नापं उकिया नेतातय्सं गैर नेवाःतय्गु पार्टीया पक्षपोषण याना जूगु दुःखदायी खः धकाः तकं च्वया तल ।

लिखँ:
राष्ट्रिय शाक्य समाज नेपालया राष्ट्रिय अधिवेशनया नामं जूगु थ्व सम्मेलनं नेपाःया शाक्यतय्गु राष्ट्रिय संगठन दयेकेगु ज्या न्ह्याकूगु दु। बौद्ध धर्मयात सर्वोपरि निर्देशक सिद्धान्त कथं हनाः २१ औं शताब्दीयात मल्वः कथंया अन्धविश्वास, हिन्दूवादी कर्मकाण्ड व पुरोहितवादं मुक्त जुयाः आर्थिक, सामाजिक, साँस्कृतिक व राजनैतिक लक्षत क्वःछिनाः न्ह्याःवनेगु संकल्प याःगु दु। जातिय पहिचान, राष्ट्रियता व बौद्धधर्मयात क्वबियाः शाक्य ल्याय्म्ह/ल्यासेतय्त अभिप्रेरित यायेगु हे शाक्य समाजया औचित्यता खः। थुगु सम्मेलनया विशेषता धइगु न्यासः द्वःछि दां ल्हापं कयाः शाक्य संगठनया नामय् पाँच तारे होटलय् पारिवारिक पिकनिक यायेगु परम्परां पिहां वयाः जा, केँ, तरकारी, अचारया तसकं सादा भोजन नयाः झितका दां जक ल्हापं पुलाः थ्व अधिवेशन (सम्मेलन) सुथां लाःगु जुल। थुगु सम्मेलन ताःलाकेत स्वयम्सेवीपिं, दां व जिन्सी बिउपिं दानीपिं व अनेक ज्याखँ त्वःताः गम्भीरपूर्वक ब्वति कयादीपिं फुक्कं सुभाय्या पात्र खः। थुगु सम्मेलनय् शाक्यतय्गु दथुइ आत्मीयता, गौरव व प्रेरणा ब्वलंगु दु। राष्ट्रिय शाक्य समाजं शाक्यतय् जन्म सार्थक जुइत तिबः बी फयेमा। थुगु अधिवेशन पूवंकेत तःदँ न्ह्यःनिसें मदिक्क मेहनत याना बिज्याःम्ह सुवर्ण शाक्यप्रति कृतज्ञता प्वंकाच्वना। नापं नेवाः जातिया मेमेगु समाजयात नं प्रेरणा दयेमा धकाः जिगु थ्व अवलोकन सार्वजनिक यानागु जुल। भिंतुना ।

More Stories Like this