विश्व न्यंकया नेवाःत टेलि कन्फरेन्सय्

(अपडेट ८:२० ताः)
मेगु छुं वाः लिपा हानं मेगु कन्फरेन्स यायेगु निर्णय सहित थौंया टेलि कन्फरेन्स उत्साहजनक रुपं बांलाक क्वचाःगु दु । कन्फरेन्सय् ब्वति कयादीपिं सकसितं त्रिभुवन तुलाधरजुं सुभाय् देछाना दिल । थुगु कन्फरेन्सय् जूगु मुख्य मुख्य खँयात डा. रोशन श्रेष्ठजुं बुँदागत रुपं न्ह्यब्वयादी धुंकाः दया शाक्यजुं सकसितं हानं सुभाय् देछासें औपचारिक रुपं कन्फरेन्स क्वचाःगु घोषणा यानादिल ।

थुगु कन्फरेन्स विश्वया थीथी थासय् च्वंपिं नेवाःतय्त छथाय् हयेगु छगू एतिहासिक पलाः जूगु दु ।

(अपडेट ८:१० ताः)
नेपाःपाखें सुनिता राजमण्डारी कन्फरेन्सय् झाःगु दु । वय्कलं नेपाःया ग्रास रुट लेभलंनिसें हे ज्या यायेमाःग व नेवाः एकतायात बः बियादीगु दु ।

आः छुं इ फोन सम्पर्क अवरुद्ध जुयाच्वंगु दु ।

(अपडेट ८:०० ताः)
डा. बालगोपाल श्रेष्ठ‌ - हरेक ख्यलय् च्वंपिं व देसं पिने च्वंपिं नेवाःत छथाय् मुनेगु व नेपाःपिने च्वंपिं नेवाःतय्सं नेपालय् च्वंपिं नेवाःतय्त ग्वहालि यायेत न्ह्यचिले माःगु दु । थीथी ख्यलय् च्वंपिं नेवाःतय्त समावेश यानाः वय्कःपिनिगु ज्ञान व शीपयात सदुपयोग याना न्ह्यायेमाःगु दु ।

थीथी संचार माध्यमपाखें खँ ब्याकाः आः दयेफुगु समस्या ज्यंकेमाःगु दु । विभिन्न देशय् दुगु नेवाः संगठनयात स्वापू तयाः न्ह्यायेमाःगु दु ।

(अपडेट ७:५० ताः)
बिचाः तयेगु ज्या निरन्तरता जुयाच्वंगु दु -
रहेना श्रेष्ठ (वेष्टर) - थःम्हं फुगु आर्थिक ग्वहालि व जिम्मेवारी इना कायेमाःगु दु । नेवाःतय्गु सामाजिक आवश्यकतायात नं ज्यंकेगुलिइ बः बिइमाःगु दु ।

(अपडेट ७:४० ताः)
बिचाः तयेगु ज्या न्ह्यानाच्वंगु दु -

विनोद साय्मि - राजनैतिक रुपं सबल जुइमाःगु दु । नेवाःत राजनीतिइ ल्यूने लानाच्वंगु कारणं नेवाःत मेमेगु यक्व थासय् ल्यूने लानाच्वंगु दु । नेवाःतय्सं व्यक्तिगत व संस्थागत रुपं न्ह्याः वनेबलय् राजनैतिक दवाव बियाः न्ह्याः वनेमाःगु दु ।

सुभाषराम प्रजापति - थीथी ख्यलय् ज्या याना च्वंपिं नेवाः विशेषज्ञतय्गु ज्ञान व शीपयात नेवाः ख्यलय् सदुपयोग यायेमाःगु दु । युवा सहभागीता अप्वयेकाः झीगु भाय् व संस्कृति अभिलेखीकरण यायेगुलिइ जोड बिइमाःगु दु ।

सिजन श्रेष्ठ - सफू वा अडियो भिजुअल माध्यमं नेवाः भाय् प्रचारया लागि ज्या याना वनेमाल । युवा सहभागीता अप्वयेकाः न्ह्याः वनेमाःगु दु ।

(अपडेट ७:३० ताः)
बिचाः तयेगु ज्या न्ह्यानाच्वंगु दु -

निलम श्रेष्ठ - नेवाः भाय् ल्हायेमसःपिं नेवाःतय्त प्रोत्साहन बिया न्ह्यायेमाःगु दु । फयाफक्व यक्व मनूतय्त दुथ्याके माःगु दु । योजना स्पष्ट यानाः समावेशी रुपं न्ह्यायेमाः ।

(अपडेट ७:२० ताः)
बिचाः तयेगु ज्या न्ह्यानाच्वंगु दु -

सुचित्रबहादुर श्रेष्ठ -न्हना वनाच्वंगु भाय् व संस्कृति थकायेत छप्पँ जुयाः न्ह्याः वनेमाः । विश्व नेवाः संगठन समावेसी व योजनावद्ध रुपं न्ह्याः वनेमाः । न्हूगु पिढीयात नं समावेस यानाः शिक्षा, स्वास्थ्य व आर्थिक लगायतया ख्यलय् न्ह्याना वनेमाःगु दु ।

आदित्यमान श्रेष्ठ - नेवाः संस्कृतिया उत्थानय् विश्व नेवाः संगठन न्ह्यलुवाः जुयाः न्ह्यायेमाल ।

रजत राजभण्डारी - भाय् झीगु म्हसीका खः । नेवाः भाय् म्वाकेत विश्व नेवाः संगठनं क्वातुगु पलाः न्ह्याकेमाल । थुकिया लागि सफू पिथना वा स्कूल चायेकाः वा गुकथं ज्यू अज्याःगु ज्यायात न्ह्याका यंकेमाल ।

कन्फरेन्सय् झायादीपिं न्हूपिं भाजु मय्जुपिं
राजिश श्रेष्ठ (सं. रा. अमेरिका)

(अपडेट ७:१० ताः)
बिचाः कालबिल न्ह्यानाच्वंगु दु

गोविन्द श्रेष्ठ - सुनां नकारात्मक रुपं खँ तयाः नेवाः एकता व संगठन छ्वासुकेगु कुतः यात धाःसा उकियात सामना यानाः छधी छप्पं जुया संगठनात्मक रुपं न्ह्याना वनेमाः । आर्थिक व संरचनात्मक रुपं विश्व नेवाः संगठन बांलाक संगठित जुइमाः ।

कृष्ण चखुं - नेवाः म्हसीका म्वाकेमाःगु व नेवाः जुइगुलिइ गौरव जुइकथंया ज्या न्ह्याकेमाःगु दु । देसं पिनेच्वंपिं नेवाःतय्सं मुख्य रुपं सल्लाहकारी भूमिका म्हितेगु व आर्थिक ग्वहालि यायेगुलिइ तिबः बिइफु ।

(अपडेट ७:०० ताः)
कन्फरेन्सय् ब्वति कयादीपिंसं थःगु बिचाः तया च्वनादीगु दु
निलम श्रेष्ठ - अष्ट्रेलियाय् 'गुथि अष्ट्रेलिया' नांया संस्था न्ह्याका छुं इ दुने हे यक्व समस्या सामना याये मालाच्वंगु दु । छगू चीधंगु संस्थाय् हे समस्या वयेफुसा नेवाःतय्गु तःधंगु विश्व संगठन चायेकेगु व न्ह्याकेगुलिइ यक्व समस्या वयेफुगुलिं आः न्हापांनिसें हे थःगु भिजन स्पष्ट यानाः न्ह्याः वनेमाः ।

(अपडेट ६:५० ताः)
त्रिभुवन तुलाधरजुं विश्व नेवाः सम्मेलन व अन्तरराष्ट्रिय नेवाः संगठन बारे छगू दशक न्ह्यनिसें जुयाच्वंगु कुतः बारे कुलादिल । पिने च्वंपिं नेवाःत छथाय् मुनाः नेपालय् नेवाःतय्त ग्वहालि यायेगु ज्या यायेमाःगु खँ न्ह्यथना दिल ।

(अपडेट ६:४५ ताः)
दया शाक्यजुं लसकुस यानादिसें औपचारिक रुपं कन्फरेन्स न्ह्याकादीगु दु । वय्कलं विश्व न्यंक च्वंपिं नेवाःतय्त छथाय् हयेगु व नेवाः म्हसीका ल्यंकेमाःगु खँय् बः बियादिल ।

बिचाः कालबिल यायेगु झ्वलय् कल्पना प्रधानं थःगु बिचाः तयादीगु दु । वय्कःया बिचाः -
सिक्किमया सन्दर्भय् नेवाः म्हसीका व इमिगु आर्थिक स्थिति थकायेमाःगु मुख्य समस्याया रुपय् खने दयाच्वंगु दु ।

कन्फरेन्सय् झायादीपिं न्हूपिं भाजु मय्जुपिं
आदित्यमान श्रेष्ठ (सं. रा. अमेरिका)

(अपडेट ६:४० ताः)
कन्फरेन्सय् झायादीपिं न्हूपिं भाजु मय्जुपिं
रविन्द्र श्रेष्ठ (बेल्जियम)
डा. ध्रुव श्रेष्ठ (नेदरल्याण्ड)
रजत राजभण्डारी (सं. रा. अमेरिका)
निलम प्रधानाङ्ग (अष्ट्रेलिया)
कल्पना प्रधान (सिक्किम, भारत)

(अपडेट ६:३० ताः)
थःगु बिचाः तयेगु ज्या न्ह्याःगु दु ।
प्रमोद श्रेष्ठ - 'नेवाः भाय् ल्हाइपिं म्हो जुयावन ।'

(अपडेट ६:२० ताः)
कन्फरेन्सय् झायादीपिं न्हूपिं भाजु मय्जुपिं
प्रमोद श्रेष्ठ (यूएइ)

(अपडेट ६:१० ताः)
कनफरेन्सय् झायादीपिं भाजु मय्जुपिं दथुइ म्हसीका कालबिल जुयाच्वंगु दु । कन्फरेन्सय् डा. रोशन श्रेष्ठं मोडरेटर जुया ज्या यानाच्वनादीगु दु ।

(अपडेट ६:०० ताः)
कन्फरेन्स कल न्ह्याःगु दु । थीथी देसय् च्वनाच्वंपिं नेवाःतय्सं टेलिफोनपाखें स्वापू तयेगु ज्या न्ह्यानाच्वंगु दु ।

आःतकया दुने क्वय् न्ह्यथना कथंया भाजु मय्जुपिं कन्फरेन्सय् झायादीगु दु ।

त्रिभुवन तुलाधर (सं. रा. अमेरिका)
डा. रोशन श्रेष्ठ (सं. रा. अमेरिका)
विनोद साय्मि (सं. रा. अमेरिका)
डा. बालगोपाल श्रेष्ठ (बेलायत)
दया शाक्य (सं. रा. अमेरिका)
रहेना वेस्टर (जर्मनी)
गोविन्दप्रसाद श्रेष्ठ (क्यानाडा)
सिजन श्रेष्ठ (सं. रा. अमेरिका)
कृष्ण चखुं (बेलायत)
सुचित्र श्रेष (सं. रा. अमेरिका)

----------------------------

आइतवाः नेपाःया इ कथं सनिलया ५:४५ ताः इलय् विश्वया थीथी थासय् च्वनाच्वंपिं नेवाःत टेलि कन्फरेन्सय् मुनीगु जूगु दु । थुगु कन्फरेन्सं वर्ल्ड नेवाः अर्गनाइजेशनया तयारी समिति नीस्वनेगु व थुगु अर्गनाइजेशनया बारे मेमेगु थीथी खँ ब्याकीगु जूगु दु ।

थुगु कन्फरेन्सया बारे मुक्कं जानकारी नेपालमण्डल डट कम पाखें कन्फरेन्स जःछि (निघौतक) हरेक १० मिनेटय् लाइभ अपडेट जुइगु जूगु दु ।

बैठकया एजेण्डा :-

१. वर्ल्ड नेवाः अर्गनाइजेशन गठनया निंतिं कुतः
क. उल्लेज्या न्वचु, लिच्वः व सुझाव/प्रतिक्रिया
२. अर्गनाइजेशन निस्वनेगु व आधिकारीकता बीगु व कार्यान्वयन यायेगु बारे सहलह
३. सुभाय् न्वचु व मुँज्याया क्व:छिना व प्रतिबद्धता

अपडेट (१:०० ताः इ)
आःतक दुने थीथी देसं करिव स्वीम्ह नेवाःतय्सं थुगु कन्फरेन्स ब्वति काइगु क्वःजिइ धुंकूगु दु । थुकिइ नेपाल, सं.रा. अमेरिकाया च्यागू राज्य, क्यानाडा, यूके, बंगलादेश, सिक्किम, यूएइ, नेदरल्याण्ड, जर्मनी आदि देसय् च्वनाच्वंपिं नेवाःत दुथ्याः ।

कन्फरेन्स कलया बारे महत्वपूर्ण जानकारी :-

कन्फरेन्स कलया निंतिं टोल फ्री फोन ल्याः- +१-८००-७८६-१९२२
ब्वति कायेगु कोड:- १९९७७८४६#

- # चिं तियादी ल्वमंकादीमते ।
- संयुक्त राज्य अमेरिका पिनेयापिंसं कन्फरेन्सय् ब्वति कयादीत थःगु ल्याण्ड लाइन फोन ल्याः त्वाःता दीमाः । लिपाः ज्याझ्वःया सहजकर्तां सम्पर्क यायेधुंकाः जक छि कन्फरेन्सय् दुथ्याइ ।
- लुमंकादिसं संयुक्त राज्य अमेरिका, क्यानेडा, हवाईम अलास्काय् दुपिंसं तप्यंक ल्याण्ड लाइन व मोबाइल फोनं फोन यानादी फइ ।
- कन्फरेन्स कल पाय्छि इलय् न्ह्याइ । उकीया निंतिं पाय्छि इलय् हे स्वापू तयादिसं ।

विश्वया थीथी थासय् थुगु कन्फरेन्स जुइगु ई थुकथं दु :-

सं रा अमेरिका, पश्चिम किनारा - पोर्टल्याण्ड ओरेगन -- ५:०० आइतवाः १८, २०१०
सं रा अमेरिका, मध्य पश्चिम - तेक्सास -- ७:०० आइतवाः १८, २०१०
सं रा अमेरिका, पूर्वी किनारा - वासिङटन डिसी, फ्लोरिडा -- ८:०० आइतवाः १८, २०१०
क्यानेडा, काल्गारी -- ६:०० आइतवाः १८, २०१०
सं अधिराज्य -- १३:०० आइतवाः १८, २०१०
जर्मनी, ह्यामब्रर्ग -- १४:०० आइतवाः १८, २०१०
युएई, आबुदाबी -- १६:०० आइतवाः १८, २०१०
नेपाः, येँ -- १८:०० आइतवाः १८, २०१०
जापान, टोकियो -- २१:०० आइतवाः १८, २०१०

More Stories Like this