राजनीतिक दलतय् दुने सहलह
जेठ १४ लिपा छु जुइ? / एमाले सरकार त्वःतेगु मुडय्
येँ (सन्ध्या टाइम्स)/जेठ १४ गते संविधान मवइगु लगभग निश्चित धाःसां जिल। उकिं आः राजनीतिक पार्टीतय् दुने जेठ १४ कुन्हु संविधान मवइगु जूगुलिं वयां लिपा छु यायेगु धइगु खँयात कयाः सहलह शुरु जूगु दु ।
थुकिया बारे दकलय् गम्भीर सहलह सत्तारुढ दल एमाले दुने हे शुरु जूगु खँ सूत्रं धाःगु दु। म्हिगः च्वंगु एमाले स्थायी समितिया दुजः सहितया संसदीय दलया बैठकय् आः १४ गते लिपा छु यायेगु धइगु बारे सहलह जूगु खः। उकी न्ववाःपिं सभासद्तय्सं आः जेठ १४ य् संविधान मवल धाःसा संविधान मवःगु दोष एमालेयात वइगु जूगुलिं प्रधानमन्त्री माधव नेपालं सरकार त्वःतेमाः धइगु माग याःगु खः। उकी छुं नेतातय्सं धाःसा आः थ्व इलय् वयाः अथें सरकार त्वःतल धाःसा संविधान दयेके मफयाः हे सरकार त्वःतूगु खः धकाः झन् हे प्रमाणित जुइगु जूगुलिं अथें सरकार त्वःते मजिउ धया हःगु दु ।
तर सूत्रं धाःसा संविधान दयेके मफइगु जूगुलिं एमालें नं सरकार त्वःतेगु कथंया सोच दयेका हयेधुंकूगु विश्लेषण याःगु दु। थ्वहे सोच तयाः एमालें आः नकतिनि माओवादीयात प्यंगू शर्त न्ह्यःने तसें यदि माओवादी थ्व शर्त पूरा यायेत सहमत जुल धाःसा थःपिं नं सत्ता त्वःतेत तयार धइगु प्रस्ताव तःगु खः ।
तर माओवादीया म्हिगः च्वंगु पोलिटब्युरो बैठकं एमालेया थ्व शर्तयात अस्वीकार याःगु दु। सत्तापक्षं प्रतिपक्षी समक्ष शर्त तइगु चलन संसारय् गनं नं मदु धासें एमालेया थ्व शर्त लोकतन्त्र विरोधी खनेदु धकाः नं द्वपं बिउगु दु। एमालेया शर्तय् माओवादीं कब्जा यानातःगु छेँबुँ लित बीमाःगु, वाईसीएल विघटन यायेमाःगु आदि खँ दुथ्याः। लिसें माओवादीं यदि संविधान मवल धाःसा झिलामछि सरकारय् च्वनाः नं छुं याये मफुगुलिं हे संविधान मवःगु खः धकाः एमालें दोष स्वीकार यायेमाः धकाः माग याःगु दु ।
माओवादीं यदि एमाले सरकार त्वःतेत तयार दुसा जक जेठ १४ लिपा नं संविधानसभाया म्याद थपे याकेत थःपिं सहमत जुइ धकाः धायेधुंकूगु दु ।
