नेवाः राज्यय् नेवाःतपाखें कर

नेवाः स्वायत्त लागाया अनुभूति बी कथं किपुली नं नेवाःतय्सं आःयात सवारी कर कायेगु शुरु याना हःगु दु। आःयात नेवाःतय् ज्याझ्वः यायेत ग्वाहालि धकाः जक कायेगु शुरु याःगु थ्व चन्दायात लिपा 'कर' या रुपय् कया यंकेगु धकाः ज्याझ्वः दयेकूगु दु। नेवाःतय्सं थःत राज्यसत्ताया रुपय् प्रस्तुत यायेगु न्हापांगु पलाः कथं न्ह्याकूगु थ्व ज्यायात नेवाः स्वायत्त राज्यया पक्षधर सकलें नेवाःतय्सं लसकुस यायेमाः।
मेमेगु जातीय पुचःतय्सं यानाच्वंगु ज्याखँया लिधंसाय् धायेगु खःसा नेवाःतय्सं याःगु थ्व ज्या यक्व लिबाये हे धुंकूगु दु। लिम्बुवान, खम्बुवान, थरुहट आदि लागाय् न्हापा हे थज्याःगु कर कायेगु ज्या न्ह्याकेधुंकूगु दु। अय् जुयाः हे उमिगु स्वायत्त लागा सशक्त नं जुया वःगु खः। थःगु लागाय् थुकथंया गतिविधि न्ह्याकेवं हे तिनि झीगु आन्दोलन राज्यसत्तापाखे लक्षित जुयाः न्ह्याः वने फइगु खँयात झीसं ल्वःमंके मजिउ ।

बरु कर कायेगु ज्यायात जनतायात बोझ जुइ कथं धाःसा न्ह्यःने यंके मजिउ। कर कायेबलय् अर्थ आर्जन जुइगु ला ख हे खत, तर व स्वयां नं अप्वः थ्व ज्याया महत्व धइगु थःगु अस्तित्व राज्यया रुपय् स्थापित यायेगु खः। नेवाः लागाया वासिन्दातय्सं आः हे नं थीथी कथंया कर राज्ययात पुलाच्वंगु दु। उकिसनं थहां वनाच्वंगु बेसाःभावं जनताया जँ त्वःथुलाच्वंगु दु। थज्याःगु अवस्थाय् हानं मेगु कर थपे जुइबलय् थुकिं उत्साह सिबें निराशा जन्म यायेफु। थ्व खँयात समेत ध्यानय् तयाः नेवाः राज्य प्रतिया सकारात्मक भावना समेत दुथ्याःगु कर कायेगुपाखे पलाः न्ह्याकूसा उकिं आन्दोलनयात नं तिबः हे बी ।

More Stories Like this