जलश्रोतया धनी देशय् लःया हाहाकार

नरेन्द्रमान श्रेष्ठ 'गोगंजू'

नेपालय् जलश्रोतया अपार भण्डार दु। हलिमय् नेपाः जलश्रोतया तःमि देय्या निगूगु धलखय् लाः। थजाःगु खँ थौंकन्हय् प्रधानमन्त्री, मन्त्री, नेता अले थ्व देय्या जलश्रोतविद्तय्गु भाषणय् जक सीमित जुयाच्वंगु दु। जलश्रोतया तःमि देय् धकाः नांजाःगु देय्या जनतां थौंकन्हय् लः त्वने मखनाच्वंगु दुसा बिजुली मत न्हिं १२ घौ तक लोडसेडिङ जुयाच्वंगु दु। स्वनिगलय् थौंकन्हय् न्हियान्हिथं लःया हाहाकार जुयाच्वंगु दु। काठमाण्डौं खानेपानी उपत्यका लिमिटेड स्वनिगलय् लःया आपूर्ति यायेगुली पूवंक हे असक्षम जुयाच्वंगु दु। येँया लःया समस्या धइगु सुख्खायामया जक मखु, झिंनिलां हे जुयाच्वंगु दु। अथे खःसां सरकारं थुखेर आःतक नं ध्यान बियाच्वंगु मदुनि। दँय्दसं लःया समस्या जुयाच्वंसां सरकारया निंतिं 'काग कराइरहन्छ, पिना सुक्दै गर्छ' धाःगु उखान थें जुयाच्वंगु दु ।

जब स्वनिगलय् लःया समस्या जुइ, अबलय् मेलम्चीया खँ पिहां वइ। स्वनिगःया जनतायात लः त्वंकेगु निंतिं मेलम्चीया लः हयेगु ला छु, थ्व आयोजना बांलाक हे न्ह्याये तकं फयाच्वंगु मदु। मेलम्ची खानेपानी आयोजना धाःगु सरकार वा सत्ताधारी पार्टीतय्गु भ्रष्टाचारया अखडा कथं जक न्ह्याः वनाच्वंगु दु। स्वनिगःया जनताया निंतिं थ्व छगू गबलें पूमवनीगु म्हगस जुया बिउगु दु। सरकारी सुविधा भोग यानाः आश्रमय् जीवन निर्वाह यानाच्वंम्ह सन्त नेता कृष्णप्रसाद भट्टराइ प्रधानमन्त्री जूगु इलय् स्वदँया दुने मेलम्चीं लः हयाः स्वनिगःया जनताया त्वनेगु निंतिं जक मखु स्वनिगःया सतक तकं सिलेगु धकाः जनतायात झंगः लाःगु यक्व हे दयेधुंकल। थथे फय्गं खँ ल्हानाः जनतायात झंगः लाइपिं नेतात जक सत्ताय् थ्यनाच्वंगु कारणं जनतां दुःख सियाच्वंगु खः। धाथें धायेगु खःसा नेपालय् न्हापा पञ्चायती शासनया इलय् जुइमा वा संवैधानिक राजतन्त्रया इलय्, चाहे संघीय लोकतान्त्रिक गणतन्त्रय् हे छाय् मजुइमा, देय् व जनताया निंतिं ज्या याइपिं इमान्दार नैतिकवान अले योग्य नेतात सत्ताय् थ्यंगु मदुनि। सत्ताय् थ्यन कि थः अले परिवारया निंतिं सुख सुविधा उपभोग यायेगु, जनताया ध्यबाय् लाल कायेगु अले देय् व जनतायात ध्याकुंचाय् लाकेगु जक ज्या जुयाच्वंगु खनेदु। थथे नैतिकता मदुपिं बेइमान भ्रष्ट नेतात जक सत्ताय् थ्यनाच्वंगुलिं झीगु देय्या सर्वसाधारण निमुखा जनतां दुःख सियाच्वने माःगु खः। अले प्राणीतय्त मदयेकं मगाःगु लः तकं त्वने मखंका च्वनेमाल ।

स्वनिगलय् जनसंख्याया चाप न्हियान्हिथं अप्वया वनाच्वंगु दु। थन नेपाःया थीथी जिल्ला, गां गामं मनूत वयेगु क्रम अप्वया वनाच्वंगु दुसा सीमा पारीया मनूत नं उत्तिकं हे दुहां वयेगु ज्या जुयाच्वंगु दु। स्वनिगलय् अप्वया वनाच्वंगु जनघनत्वया कारणं नं लःया समस्या वयाच्वंगु खः धाःसां जिउ। थुकिं यानाः लः जक मखु, फोहोर व पार्किङया समस्या नं जुयाच्वंगु दु। नापं स्वनिगः अव्यवस्थित कथं न्ह्याः वनाच्वंगु दु। सरकार नापं राजनैतिक पार्टीत स्वनिगःयात व्यवस्थित यायेगु अले अप्वया वनाच्वंगु जनघनत्वयात ज्यंकेगु स्वयां थःगु राजनैतिक गतिविधि राजधानी केन्द्रित यानाः स्वनिगलय् पिने यापिं मनूत हयाः जनसंख्याया चाप अप्वयेकाच्वंगु दु। थुकिं यानाः नं स्वनिगः अस्तव्यस्त जक मखु लःया समस्याया कारणं हाहाकार हे जुयाच्वंगु दु ।

खँ, लःया समस्या जक मखु, लः इनेगु प्रणालीया नं खः। येँया छेँय् छेँय् हिति दु, तर लः मवः। येँया गनं स्वघौ प्यघौ तक लः वःसा गनं लः वइगु पालय् नं लः मवः। थ्व काठमाण्डौं उपत्यका खानेपानी लिमिटेडया कर्मचारीतय्गु लापरवाही जक खः कि? येँया तःगू थासय् थथे जुयाच्वंगु खनेदु। थ्व छु जुयाच्वंगु खः, थुकी सम्बन्धित निकायं ध्यान बियाः छानबिन यायेमाः। थौंकन्हय् येँया स्थानीय जनता दोहोरो मारय् लानाच्वंगु दु। छखे खानेपानीया ग्राहकतय्सं मवःगु लःया नं महसुल पुलेमाःगु दुसा मेखे ट्यांकरया लः थिकयेक न्यानाः त्वने मालाच्वंगु दु। थुकिं विशेष यानाः स्वनिगःया आदिवासी जनता मारय् लानाच्वंगु दु। लःया आपूर्तिया निंतिं काठमाडौं उपत्यका खानेपानी लिमिटेडं लःया नापनापं वितरण प्रणालीइ नं ध्यान बीमाःगु खनेदु ।

More Stories Like this